ស្វាមីរបស់អតីតសេដ្ឋិនី វៀតណាម ដែលរងទោសប្រហារជីវិត ក៏មិនរួចខ្លួនដែរ

មហាសេដ្ឋីអចលនទ្រព្យហុងកុងលោក Eric Chu កាលពីថ្ងៃសុក្រត្រូវបានកាត់ទោសឲ្យជាប់ពន្ធនាគាររយៈពេល ៩ ឆ្នាំពីបទចូលដៃចូលជើងក្លែងបន្លំជាមួយប្រពន្ធរបស់លោកឈ្មោះ Truong My Lan ដែលនាំឲ្យធនាគារ Saigon Commercial Bank (SCB) ខាតបង់ប្រាក់ ៦៧៧ ពាន់ពាន់លានដុង (២៧ ពាន់លានដុល្លារ) ។ នេះបើយោងតាមការចេញផ្សាយដោយសារព័ត៌មាន VN Express កាលពីថ្ងៃទី១២ ខែមេសាកន្លងទៅ ។

ចៅក្រមបាននិយាយនៅឯតុលាការប្រជាជនទីក្រុងហូជីមិញថា លោក Chu វ័យ ៦៨ ឆ្នាំមានទោសទណ្ឌពីបទរំលោភលើបទប្បញ្ញត្តិផ្តល់ប្រាក់កម្ចីឥណទាន ។ ក្នុងនាមជាប្រធានក្រុមហ៊ុន Times Square Vietnam ដែលកាន់កាប់ភាគហ៊ុន ៩៩ ភាគរយ, លោក Chu បានចុះហត្ថលេខាលើឯកសារដាក់អគារ Times Square ជារបស់បញ្ចាំសម្រាប់ប្រាក់កម្ចីប្រមាណ ៧៣ លើក ខណៈការយល់ព្រមមួយលើកៗនាំឲ្យធនាគារ SCB ខាតលុយចំនួន ៩.១២ ពាន់ពាន់លានដុង ។

ចៅក្រមបានលើកឡើងទៀតថា ស្វាមីរបស់អតីតសេដ្ឋិនីវៀតណាមរូបនេះជាជនបរទេស ហើយមិនចេះនិយាយភាសាវៀតណាមនោះទេ ទើបលោកផ្ដល់សេចក្ដីទុកចិត្តទៅឲ្យភរិយារបស់លោកដែលជាប្រធានក្រុមហ៊ុន Van Thinh Phat ក្នុងការចុះហត្ថលេខាលើការអនុម័តលើឯកសារ ក៏ដូចជាគម្រោងផ្សេងៗទាំងដែលមិនដឹងពីគោលបំណងច្បាស់លាស់ ។

ស្របពេលជាមួយគ្នានេះ ភរិយារបស់លោក Chu គឺលោកស្រី Truong My Lan ក៏ទើបតែត្រូវបានតុលាការវៀតណាមកាត់ទោសប្រហារជីវិតសម្រាប់បទឧក្រិដ្ឋចំនួន ៣ ករណីដូចជា ស៊ីសំណូក រំលោភលើបទប្បញ្ញត្តិធនាគារ និងកិបកេងបន្លំ ។

ចាប់ពីឆ្នាំ ២០១២ ដល់ឆ្នាំ ២០២២ លោកស្រី Truong My Lan និងបក្ខពួក បានទទួលប្រាក់កម្ចីចំនួន ២ ៥០០លើក និងបណ្តាលឲ្យធនាគារ SCB ខាតបង់ជាទឹកប្រាក់ ៦៧៧ ពាន់ពាន់លានដុង ហើយដើម្បីបិទបាំងកំហុសខុសឆ្គងនៅធនាគារមួយនេះ អតីតសេដ្ឋិនីវ័យ ៦៨ ឆ្នាំរូបនេះក៏បញ្ជាឲ្យមន្ត្រីក្រោមឱវាទទៅសូកប៉ាន់សវនករនៃធនាគាររដ្ឋវៀតណាមថែមទៀត ។ ទោះយ៉ាងណា ក្នុងទោសទណ្ឌទាំងនេះ តុលាការក៏បញ្ជាឲ្យលោកស្រីផ្តល់សំណង ៦៧៣.៨ ពាន់ពាន់លានដុងដល់ធនាគារ SCB ផងដែរ ៕

ដោយ ៖ សុខ ជីវ័ន្ត

ចុចអាន ៖ តើប្រទេស អាស៊ាន ណាខ្លះរៀបចំពិធីបុណ្យចូលឆ្នាំថ្មីក្នុងខែមេសាដូច កម្ពុជា ដែរ?