វៀតណាម បារម្ភខ្លាំង ពីភាពតានតឹងនៅមជ្ឈិមបូព៌ា

យោងតាមសារព័ត៌មាន vnexpress បានដកស្រង់នូវសម្ដីរបស់អ្នកនាំពាក្យក្រសួងការបរទេសវៀតណាម លោកស្រី Pham Thu Hang កាលពីថ្ងៃអាទិត្យថា ប្រទេសវៀតណាមមានការព្រួយបារម្ភយ៉ាងខ្លាំង ចំពោះការកើនឡើងនៃភាពតានតឹងនៅមជ្ឈិមបូព៌ា ជាពិសេសអំពើហិង្សាដែលបំពានធម្មនុញ្ញអង្គការសហប្រជាជាតិ និងបង្កការខូចខាតដល់ជនស៊ីវិល។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

ជាការឆ្លើយតបនឹងសំណួររបស់អ្នកសារព័ត៌មានអំពីប្រតិកម្មរបស់វៀតណាម ចំពោះការរារាំងគ្រាប់រ៉ុក្កែតនៅអ៊ីស្រាអែល អ្នកនាំពាក្យបានអំពាវនាវឲ្យភាគីពាក់ព័ន្ធអនុវត្តការអត់ធ្មត់ ដោះស្រាយការខ្វែងគំនិតគ្នាដោយវិធានការដោយសន្តិវិធី និងគោរពយ៉ាងតឹងរឹងទៅនឹងច្បាប់អន្តរជាតិ ធម្មនុញ្ញអង្គការសហប្រជាជាតិ និងដំណោះស្រាយពាក់ព័ន្ធរបស់អង្គការសហប្រជាជាតិ។

លោកស្រីក៏បានជំរុញឲ្យភាគីនានាត្រូវបញ្ចប់ជាបន្ទាន់ នូវអំពើហឹង្សាដែលកំពុងជំរុញឲ្យភាពតានតឹងកើនឡើង ដើម្បីជាប្រយោជន៍ដល់សន្តិសុខ សុវត្ថិភាព សន្តិភាព និងសន្តិសុខក្នុងតំបន់ និងពិភពលោកទាំងមូល។

សូមជម្រាបជូនដែរថា អ៊ីរ៉ង់បានបើកការវាយប្រហារកាលពីល្ងាចថ្ងៃសៅរ៍ លើទឹកដីអ៊ីស្រាអែល ជាមួយនឹងយន្តហោះគ្មានមនុស្សបើក និងកាំជ្រួច ដើម្បីជាការសងសឹកចំពោះការវាយប្រហាររបស់អ៊ីស្រាអែលដែលសង្ស័យទៅលើបរិវេណស្ថានទូតរបស់ខ្លួននៅក្នុងប្រទេសស៊ីរីកាលពីថ្ងៃទី ០១ ខែមេសា ដែលបានសម្លាប់មេបញ្ជាការឆ្មាំបដិវត្តកំពូល។

ការវាយប្រហារដោយកាំជ្រួច និងយន្តហោះគ្មានមនុស្សបើកជាង ៣០០ គ្រឿង ដែលភាគច្រើនបាញ់ចេញពីខាងក្នុងប្រទេសអ៊ីរ៉ង់ បានបង្កការខូចខាតតិចតួចប៉ុណ្ណោះ ខណៈដែលភាគច្រើនត្រូវបានបាញ់ទម្លាក់ដោយប្រព័ន្ធការពារ Iron Dome របស់អ៊ីស្រាអែល និងដោយមានជំនួយពីសហរដ្ឋអាមេរិក អង់គ្លេស បារាំង និងហ្ស៊កដានី៕

អត្ថបទ៖ សាង ស្រីល័ក្ខ

ចុចអាន៖អ៊ីស្រាអែល ចង់វាយប្រហារតបទៅ អ៊ីរ៉ង់ តែលោកខាងលិចឲ្យអត់ធ្មត់សិន