ផ្ទុះភ្នំភ្លើងឥណ្ឌូណេស៊ី អាចបង្កជារលកយក្សស៊ូណាមិ ខណៈប្រជាជនជម្លៀសទាំងភិតភ័យ

តាមសេចក្តីរាយការណ៍របស់ CNA នៅថ្ងៃព្រហស្បតិ៍ទី១៨ខែមេសា, សកម្មភាពភ្នំភ្លើង Ruang  ហាក់គ្មានសញ្ញាថមថយឡើយ ដោយវាបានផ្ទុះចំនួន៥ដងរួចមកហើយ ក្នុងរយៈពេលប៉ុន្មានថ្ងៃចុងក្រោយ និងកំពុងគំរាមកំហែង បង្កជារលកយក្សស៊ូណាមិទៅទៀត។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

ដោយសារហេតុនេះហើយ ទើបក្រុមអ្នកជួយសង្គ្រោះកំពុងប្រញាប់ប្រញាល់ ជម្លៀសមនុស្សរាប់ពាន់នាក់ចេញពីតំបន់ក្រហម ហើយអាជ្ញាធរ ត្រូវបង្ខំចិត្តបិទអាកាសយានដ្ឋានមួយនៅក្បែរនោះ ថែមទាំងចេញការព្រមានឲ្យប្រយ័ត្នធ្លាក់កម្ទេចកម្ទីពីលើមេឃទៀតផង។ 

សម្រាប់ទិដ្ឋភាពដ៏រន្ធត់ គេបានឃើញរន្ទះបាញ់នៅលើមាត់ភ្នំភ្លើង Ruang ដែលកំពុងបញ្ចេញសកម្មភាពយ៉ាងខ្លាំងក្លា នាំឲ្យអាជ្ញាធរបង្កើនការប្រកាសអាសន្នឡើងដល់កម្រិតខ្ពស់បំផុត លំដាប់ទី៤។

មិនត្រឹមតែកោះ Ruang ទេ មនុស្សប្រហែល១១ ០០០នាក់ ក៏ត្រូវបានជម្លៀសចេញពីកោះ Tagulandang នៅក្បែរនោះផងដែរ ដើម្បីសុខសុវត្ថិភាពព្រោះថា គ្រោះថ្នាក់អាចកើតឡើងគ្រប់ពេលវេលា។

ស្របពេលជាមួយគ្នានោះ មន្ត្រីផ្នែកសង្គ្រោះបន្ទាន់បានគូសបញ្ជាក់ថា បុគ្គលិករបស់ពួកគេចំនួន២០នាក់ បានចូលរួមក្នុងប្រតិបត្តិការជម្លៀសនៅតាមបណ្តោយឆ្នេរសមុទ្រ។

អាជ្ញាធរក៏បានជម្លៀសអ្នកទោស១៧នាក់ចេញពីពន្ធនាគារមួយនៅលើកោះ Tagulandang រួមជាមួយមន្ត្រី១១នាក់ និងអ្នកស្រុក១៩នាក់តាមទូក ឆ្ពោះទៅកាន់កំពង់ផែសមុទ្រ Likupang នៅភាគខាងជើងកោះ Sulawesi ផងដែរ។

រម្លឹកដល់ឆ្នាំ២០១៨, កាលនោះមាត់ភ្នំភ្លើង Anak Krakatoa ចន្លោះកោះជ្វា និងកោះស៊ូម៉ាត្រា បានបាក់ចូលមហាសមុទ្រ ដោយសារបន្ទុះភ្នំភ្លើង​ បង្កជារលកយក្សស៊ូណាមិ សម្លាប់មនុស្សជាង៤០០នាក់ និងរបួសរាប់ពាន់នាក់ទៀត។

សូមបញ្ជាក់ជាថ្មី ឥណ្ឌូណេស៊ី ដែលជាប្រទេសប្រជុំកោះដ៏ធំ តែងតែជួបប្រទះការរញ្ជួយដី និងសកម្មភាពភ្នំភ្លើងញឹកញាប់ ដោយសារទីតាំងរបស់ខ្លួនស្ថិតនៅលើតំបន់ខ្សែក្រវាត់ភ្នំភ្លើងប៉ាស៊ីហ្វិក “Ring of Fire” ដែលលាតសន្ធឹងពីប្រទេសជប៉ុនឆ្លងកាត់អាស៊ីអាគ្នេយ៍ និងអាងមហាសមុទ្រប៉ាស៊ីហ្វិក៕

អត្ថបទ៖ សុខ សុវណ្ណ

ចុចអាន៖ ផ្ទុះភ្នំភ្លើងនៅឥណ្ឌូណេស៊ី ជម្លៀសមនុស្សជិត ១ ០០០នាក់