ប៉ូឡូញ ចាប់ខ្លួនបុរសម្នាក់ ដែលគេចាត់មក ឲ្យធ្វើឃាតលោក Zelensky

តាមសេចក្តីរាយការណ៍របស់ BBC កាលពីថ្ងៃព្រហស្បតិ៍ទី១៨ខែមេសា ប្រទេសប៉ូឡូញ បានចាប់ខ្លួនបុរសម្នាក់ និងចោទប្រកាន់ពីបទសហការជាមួយចារកម្មរុស្ស៊ី ដើម្បីធ្វើឃាតឬជួយរៀបចំផែនការសម្លាប់ ប្រធានាធិបតីអ៊ុយក្រែនលោក Volodymyr Zelensky។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

រដ្ឋអាជ្ញាប៉ូឡូញអះអាងថា តាមការឲ្យការណ៍ពីអ៊ុយក្រែន, ខ្លួនចាប់បានបុរសម្នាក់ឈ្មោះ Pawel K ដែលគេចាត់មកឲ្យប្រមូលព័ត៌មានអំពីអាកាសយានដ្ឋាន Rzeszow-Jasionka ក្នុងប្រទេសប៉ូឡូញ ដែលលោក Zelensky តែងតែធ្វើដំណើរឆ្លងកាត់។

យ៉ាងណាក្តី អាជ្ញាធរមិនទាន់បញ្ជាក់ច្បាស់ទេថាតើគាត់ បានផ្តល់ព័ត៌មានអ្វីខ្លះហើយទៅឲ្យរុស្ស៊ី ប៉ុន្តែបើរកឃើញមានកំហុសមែន គាត់ត្រូវប្រឈមមុខជាប់ពន្ធនាគាររយៈពេល៨ឆ្នាំ ត្បិតខណៈពេលនេះ គាត់កំពុងជាប់ឃុំ ហើយការស៊ើបអង្កេតកំពុងធ្វើឡើង។

មិនត្រឹមតែលោក Zelensky ទេ, ព្រលានយន្តហោះ Rzeszow-Jasionka ក៏ជាកន្លែងមេដឹកនាំពិភពលោកផ្សេងទៀតត្រូវឆ្លងកាត់ដែរ សូម្បីតែប្រធានាធិបតីអាមេរិក Joe Biden ពេលដែលចង់ទៅអ៊ុយក្រែន។

មិនត្រឹមប៉ុណ្ណឹង យន្តហោះយោធានិងដឹកទំនិញមកពីសហរដ្ឋអាមេរិក ក៏ដូចជាទូទាំងទ្វីបអឺរ៉ុប តែងហោះហើរចេញចូលអាកាសយានដ្ឋាននេះ ដើម្បីផ្តល់គ្រឿងផ្គត់ផ្គង់ដល់រថយន្តដែលរង់ចាំយក រួចដឹកបន្តចម្ងាយ១០០គីឡូម៉ែត្រ ឆ្ពោះទៅកាន់ព្រំដែនអ៊ុយក្រែន។

មុនការវាយលុកពេញទំហឹងលើអ៊ុយក្រែន, Rzeszow-Jasionka គឺគ្រាន់តែជាព្រលានយន្តហោះក្នុងតំបន់តូចមួយប៉ុណ្ណោះ ប៉ុន្តែចាប់តាំងពីពេលនោះមក វាបានក្លាយជាមជ្ឈមណ្ឌលដ៏សំខាន់ ដើម្បីផ្គត់ផ្គង់ជំនួយយោធារបស់លោកខាងលិច ទៅឲ្យអ៊ុយក្រែន។

សូមបញ្ជាក់ជាថ្មី នៅថ្ងៃទី២៤ខែកុម្ភៈឆ្នាំ២០២២ រុស្ស៊ី បានបើកប្រតិបត្តិការយោធាពិសេសក្នុងប្រទេសអ៊ុយក្រែន ជាមួយគោលបំណងរំដោះតំបន់ Donbass ព្រោះថាបើយោងតាមភាគីរុស្ស៊ី, នៅទីនោះប្រជាជននៃសាធារណរដ្ឋ Donetsk និង Lugansk បានរស់នៅក្រោមគ្រាប់ផ្លោងរបស់កងកម្លាំងទីក្រុងកៀវ សឹងរាល់ថ្ងៃ៕

អត្ថបទ៖ សុខ សុវណ្ណ

ចុចអាន៖ លោក Zelensky ថា រុស្ស៊ី ដឹងក្រឡាដើរ របស់លោកខាងលិចអស់ហើយ