Tesla ប្រកាសប្រមូលរថយន្តអគ្គិសនីសេរ៊ីឆ្នាំ ២០២៤ ចូលរោងចក្រវិញ ដោយសារបញ្ហាឈ្នាន់ហ្គែរ

ក្រុមហ៊ុន Tesla ប្រកាសបញ្ជា​ឲ្យ​ប្រមូល​រថយន្តអគ្គិសនី Cybertruck ជិត ៤,០០០ គ្រឿងមក​វិញ​ ដោយសារ​ឈ្នាន់ហ្គែរជាប់គាំង ​ពេលជាន់ចុះក្រោម ។ នេះបើយោងតាមការចេញផ្សាយរបស់សារព័ត៌មាន CNN កាលពីថ្ងៃទី២១ ខែមេសាកន្លងទៅ ។

ការប្រកាសប្រមូលមកវិញរបស់ក្រុមហ៊ុន Tesla បានប៉ះពាល់ទៅដល់រថយន្តអគ្គិសនី Cybertruck ម៉ូដែលឆ្នាំ ២០២៤ ទាំងអស់ដែលផលិតពីថ្ងៃទី១៣ ខែវិច្ឆិកា ឆ្នាំ២០២៣ ដល់ថ្ងៃទី៤ ខែមេសា ឆ្នាំ២០២៤ ចំនួន ៣,៨៧៨ គ្រឿង ។

យោងតាមឯកសារពីរដ្ឋបាលសុវត្ថិភាពចរាចរណ៍ផ្លូវជាតិបាននិយាយថា បច្ចុប្បន្នឈ្នាន់ហ្គែររបស់រថយន្តអគ្គិសនី Cybertruck កំពុងមានបញ្ហាជាប់គាំង ខណៈនិយតករសុវត្ថិភាព (NHTSA) ក៏បានលើកឡើងដែរថា កម្មករដែលដំឡើងរថយន្តនៅរោងចក្រ Tesla ក្បែរទីក្រុង Austin រដ្ឋតិចសាស់បានប្រើប្រេងរំអិលមិនត្រឹមត្រូវក្នុងការដំឡើងបន្ទះនៅលើឈ្នាន់ហ្គែ ។

គួរបញ្ជាក់ថា NHTSA បានទាក់ទងទៅ Tesla ដើម្បីស្នើសុំព័ត៌មានបន្ថែមអំពីបញ្ហានេះ ប៉ុន្ថែ Telsa មិនបានឆ្លើយតបភ្លាមៗចំពោះសំណើសុំការអត្ថាធិប្បាយនោះទេ ខណៈនៅក្នុងខែនេះក្រុមហ៊ុនបានបញ្ឈប់កម្លាំងការងារទូទាំងពិភពលោកប្រហែល ១០ ភាគរយ ៕

អត្ថបទ ៖​ ប៊ុន សុភាព