ក្រោយរដ្ឋសភាអាមេរិកអនុម័តជំនួយ លោក ហ្សេលេនស្គី ប្រកាសថា អ៊ុយក្រែន នឹងឈ្នះ

គ្រាន់តែរដ្ឋសភាអាមេរិក អនុម័តជំនួយក្នុងទំហំទឹកប្រាក់៦១ពាន់លានដុល្លារភ្លាម ស្រាប់តែប្រធានាធិបតីអ៊ុយក្រែនលោក វ្ល៉ាឌីមៀរ ហ្សេលេនស្គី ប្រកាសថា ទីក្រុងកៀវ នៅតែអាចទទួលបានជ័យជម្នះក្នុងជម្លោះជាមួយទីក្រុងមូស្គូ។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

វិក្កយបត្រចំណាយគ្រាអាសន្ននេះ ត្រូវជាប់គាំងនៅក្នុងសភាអាមេរិក តាំងតែពីរដូវស្លឹកឈើជ្រុះឆ្នាំមុនមកម្ល៉េះ ព្រោះសមាជិករដ្ឋសភាមួយចំនួន មកពីគណបក្សសាធារណរដ្ឋ កើតក្តីបារម្ភជាពន់ពេកថា ទីក្រុងវ៉ាស៊ីនតោនខ្វះយុទ្ធសាស្ត្រជ័យជម្នះ ឬដំណោះស្រាយសន្តិភាព។

កាលពីថ្ងៃអាទិត្យទី២១ខែមេសា លោក ហ្សេលេនស្គី បាននិយាយប្រាប់បទសម្ភាសជាមួយ NBC ថា “ខ្ញុំគិតថា ការគាំទ្រនេះពិតជានឹងពង្រឹងកងកម្លាំងប្រដាប់អាវុធ ហើយយើងនឹងមានឱកាសឈ្នះ ប្រសិនបើអ៊ុយក្រែនពិតជាទទួលបានប្រព័ន្ធសព្វាវុធ ដែលខ្លួនត្រូវការជាចាំបាច់មែន”។

ស្របពេលជាមួយគ្នានោះដែរ លោក ហ្សេលេនស្គី ក៏ជំរុញឲ្យសហរដ្ឋអាមេរិក សម្រេចការអនុម័តចុងក្រោយនៃវិក្កយបត្រជំនួយនេះ ឲ្យបានឆាប់តាមដែលអាចធ្វើទៅបានផងដែរ ដើម្បីចាប់ផ្តើមបញ្ជូនអាវុធបន្ថែមទៀតទៅដល់កងកម្លាំងអ៊ុយក្រែន ដែលកំពុងច្បាំងជាមួយរុស្ស៊ី។

សូមជម្រាបជាថ្មី វិក្កយបត្រជំនួយរបស់អាមេរិក ត្រូវបានអនុម័តដោយសំឡេង ៣១១ ទល់នឹង១១២ កាលពីថ្ងៃសៅរ៍ទី២០ខែមេសា នៅក្នុងរដ្ឋសភា។

យ៉ាងណា ច្បាប់នេះមិនទាន់ត្រូវបានអនុម័តដោយព្រឹទ្ធសភាអាមេរិកទេ ប៉ុន្តែគ្រោងនឹងបោះឆ្នោតនៅថ្ងៃទី២៣ខែមេសា ហើយបន្ទាប់ពីនោះ វាបន្តទៅដល់ដៃលោកប្រធានាធិបតី ចូ បៃដិន ដើម្បីចុះហត្ថលេខាតែម្តង។

តាំងពី​ដើម​ឆ្នាំ​នេះមក រដ្ឋបាល​លោក បៃដិន ត្រូវបានគេដឹងថា ខ្សត់ខ្សោយ​ថវិកាជួយដល់​អ៊ុយក្រែន​ ព្រោះ គិតត្រឹមពេលនេះ ខ្លួន​បានជះលុយជួយអស់១១៣ពាន់​លាន​ដុល្លារ រួមមកហើយ។ 

ម្យ៉ាងវិញទៀត ដោយសារតែជំនួយត្រូវជាប់ស្អិតនេះហើយ ទើបទីក្រុងកៀវ ត្រូវប្រឈមនឹងការខ្វះខាតគ្រាប់រំសេវក្នុងរយៈពេលប៉ុន្មានខែថ្មីៗ ខណៈលោក បៃដិន បានស្តីបន្ទោសសមាជិកសភាគណបក្សសាធារណរដ្ឋចំពោះបរាជ័យរបស់អ៊ុយក្រែន ក្នុងសមរភូមិ រួមទាំងការដួលរលំទីក្រុង Avdeevka នៅក្នុងខែកុម្ភៈផងដែរ៕

អត្ថបទ៖ សុខ សុវណ្ណ

ចុចអាន៖ ទីបំផុត សភាអាមេរិក អនុម័តកញ្ចប់ជំនួយដ៏ធំ ដល់អ៊ុយក្រែន