ចប់សង្ក្រាន្ត ថៃផ្ទុះកូវីដខ្លាំង ឆ្លងជាង១ពាន់ករណី មានទាំងអ្នកស្លាប់

យោងតាមនាយកដ្ឋានគ្រប់គ្រងជំងឺ (DDC) ថៃ បានឲ្យដឹងថា តួលេខអ្នកឆ្លងជំងឺកូវីដ១៩ នៅក្នុងប្រទេសនេះ បានហក់ឡើងខ្លាំងបន្ទាប់ពីការប្រារព្ធពិធីបុណ្យសង្ក្រាន្តឆ្នាំថ្មី ខណៈមេរោគបំប្លែងខ្លួន JN.1 ត្រូវបានតេស្តឃើញច្រើនជាងគេ។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

អគ្គនាយក DDC លោក Thongchai Keeratihattayakorn ត្រូវបានដកស្រង់សម្តីដោយ Bangkok Post ដែលនិយាយកាលពីចុងសប្តាហ៍កន្លងទៅថា មានអ្នកជំងឺកូវីដថ្មីចំនួន១ ០០៤នាក់ ពោលជាមធ្យមមួយថ្ងៃឆ្លង១៤៣ករណី និងការស្លាប់មនុស្សចំនួន៣នាក់ ក្នុងរយៈពេលមួយសប្តាហ៍គិតត្រឹមថ្ងៃទី២០ខែមេសា។

ក្នុងនោះអ្នកស្លាប់ ត្រូវបានគេអះអាងថា ជាមនុស្សស្ថិតក្នុងក្រុមហានិភ័យដូចជាមនុស្សចាស់ អ្នកមានជំងឺរ៉ាំរ៉ៃ និងស្ត្រីមានផ្ទៃពោះជាដើម។

ចំពោះរោគសញ្ញា កូវីដបំប្លែងខ្លួន JN.1 ក៏ស្រដៀងជំងឺផ្លូវដង្ហើមធម្មតាដែរ ដូចជាគ្រុនក្តៅ ក្អក ឈឺក ឈឺចុកចាប់ពេញខ្លួន ឈឺក្បាល និងហៀរសំបោរ។

សម្រាប់ហេតុផលនៃការឆ្លងខ្លាំងនេះ ត្រូវបានលោកវេជ្ជបណ្ឌិត Thongchai គូសបញ្ជាក់ថា បណ្តាលមកពីអ្នកជំងឺចេញរោគសញ្ញាស្រាលស្រដៀងផ្តាសាយ ធ្វើឲ្យពួកគេមិនចាប់អារម្មណ៍ ​ហើយក៏ចូលរួមក្នុងសកម្មភាពអបអរនានាក៏ដូចជាជប់លៀង អំឡុងពិធីបុណ្យសង្ក្រាន្ត។

ទោះបីជាយ៉ាងណាក៏ដោយ គ្មានព័ស្តុតាងណាបង្ហាញថា JN.1 បណ្តាលឲ្យអ្នកចាក់វ៉ាក់សាំង ឈឺធ្ងន់ជាងមេរោគកូវីដ ប្រភេទមុនៗនោះទេ៕

អត្ថបទ៖ សុខ សុវណ្ណ

ចុចអាន៖ សម្ដេច ហ៊ុន ម៉ាណែត៖ អំឡុងពេលវិបត្តិកូវីដ-១៩ បានបង្ហាញទិដ្ឋភាពសំខាន់ ​២ ក្នុងវិស័យសុខាភិបាល