ព័ត៌មានអន្ដរជាតិ

រុស្ស៊ី ព្រមាន អឺរ៉ុប បើហ៊ានរឹបអូសទ្រព្យសម្បត្តិជិត ៣០០ ពាន់លានដុល្លារ

បានផុស

១០ ខែ មុន

នៅ

ថ្ងៃពុធ ២៤ មេសា ២០២៤

ដោយ

Chheang

សេចក្ដីព្រាងច្បាប់ដើម្បីចាត់វិធានការសងសឹកភ្លាមៗនឹងត្រូវអនុម័ត ប្រសិនបើអឺរ៉ុបហ៊ានតែរឹបអូសទឹកប្រាក់នៅក្រៅប្រទេសរបស់រុស្ស៊ីជិត ៣០០ ពាន់លានដុល្លារ ហើយយកទៅជួយអ៊ុយក្រែន ។ នេះបើយោងតាមការបញ្ជាក់យ៉ាងម៉ឺងម៉ាត់ពីអ្នកនាំពាក្យសភាជាន់ខ្ពស់រុស្ស៊ីគឺលោកស្រី Valentina Matviyenko ដែលធ្វើឡើងនៅក្នុងបទសម្ភាសន៍ជាមួយទីភ្នាក់ងារសារព័ត៌មានក្នុងស្រុក RIA កាលពីថ្ងៃទី២៣ ខែមេសា ។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

មន្ត្រីរុស្ស៊ីរូបនេះ បាននិយាយថា “ពួកយើងមានចម្លើយត្រៀមទុករួចហើយ ។ ពួកយើងមានសេចក្ដីព្រាងច្បាប់ ដែលត្រៀមអនុម័តភ្លាមៗបានលើវិធានការសងសឹក ហើយអឺរ៉ុបនឹងខាតបង់ធ្ងន់ធ្ងរជាងពួកយើងទៅទៀត” ។

ក្រោយពីលោក វ៉្លាឌឺមៀr ពូទីន បានចាត់ទ័ពចូលវាយលុកអ៊ុយក្រែនក្នុងឆ្នាំ ២០២២ មក សហរដ្ឋអាមេរិក និងសម្ព័ន្ធមិត្តបានហាមឃាត់ប្រតិបត្តិការសាច់ប្រាក់ជាមួយធនាគារកណ្ដាលរុស្ស៊ី ព្រមទាំងក្រសួងហរិញ្ញវត្ថុរុស្ស៊ី ដែលក្នុងនោះមានទ្រព្យសម្បត្តិប្រហែលជិត ៣០០ ពាន់លានដុល្លារស្ថិតនៅប៉ែកអឺរ៉ុប ។

មេដឹកនាំរុស្ស៊ី បានប្រាប់ថា លោកខាងលិចបានអនុវត្តសង្គ្រាមសេដ្ឋកិច្ចប្រឆាំងរុស្ស៊ី ប៉ុន្តែដោយសារភាពរឹងមាំនៃសេដ្ឋកិច្ចរុស្ស៊ី រដ្ឋាភិបាលទីក្រុងមូស្គូបែរជាមានកំណើន ៣.៦ ភាគរយលើសពីឆ្នាំមុនទៅវិញ ។ លោកបន្ថែមថា វាជាបរាជ័យនៃទណ្ឌកម្មដែលបានដាក់មកលើរុស្ស៊ី ។

រដ្ឋាភិបាលវិមានក្រឹមឡាំង បានអះអាងសាជាថ្មីម្ដងទៀតថា ការរឹបអូសទ្រព្យសម្បត្តិរបស់ខ្លួនគឺខុសពីគោលការណ៍ទីផ្សារសេរី ដែលលោកខាងលិចធ្លាប់បានប្រកាស ហើយវានឹងធ្វើឲ្យបាត់បង់សេចក្ដីទុកចិត្តនៅក្នុងលំហូរសេដ្ឋកិច្ចលុយដុល្លារ និងលុយអឺរ៉ូ ។ រុស្ស៊ីបានបន្តថា វាជារឿងដែលរារាំងការវិនិយោគសកល និងរំលោភលើសេចក្ដីទុកចិត្តសម្រាប់បណ្ដាធនាគារកណ្ដាលនៅលោកខាងលិច ។

លោក Vyacheslav Volodin អ្នកនាំពាក្យសភាជាន់ទាបរុស្ស៊ីបានលើកឡើងថា ក្នុងទំហំទឹកប្រាក់ ២៨០ ពាន់លានដុល្លារ ដែលត្រូវបានបង្កកក្រៅប្រទេសមានត្រឹមតែ ៥ ទៅ ៦ ពាន់លានដុល្លារប៉ុណ្ណោះ ដែលស្ថិតនៅសហរដ្ឋអាមេរិក ខណៈដែល ២២៤ ពាន់លានដុល្លារនៅសហភាពអឺរ៉ុប ៕

ដោយ ៖ ឈាង