ព័ត៌មានអន្ដរជាតិ

កូរ៉េខាងជើង បញ្ជូនប្រតិភូសេដ្ឋកិច្ចទៅ អ៊ីរ៉ង់ សង្ស័យលួចសហការយោធាសម្ងាត់

បានផុស

១១ ខែ មុន

នៅ

ថ្ងៃពុធ ២៤ មេសា ២០២៤

ដោយ

Chheang

គណៈប្រតិភូកូរ៉េខាងជើងបានធ្វើដំណើរទៅកាន់ប្រទេសអ៉ីរ៉ង់ដោយមានលោក Yun Jong-ho រដ្ឋមន្ត្រីទំនាក់ទំនងសេដ្ឋកិច្ចអន្តរជាតិជាអ្នកដឹកនាំ ។ នេះបើយោងតាមការចេញផ្សាយរបស់សារព័ត៌មានរដ្ឋកូរ៉េខាងជើង KCNA នៅថ្ងៃទី២៤ ខែមេសា ។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

ជំនួបដ៏កម្រនេះត្រូវគេសង្ស័យថាជាកិច្ចសហការសម្ងាត់រវាងប្រទេសទាំងពីរ ពាក់ព័ន្ធនឹងកម្មវិធីផលិតគ្រឿងសព្វាវុធ ។ អ្នកជំនាញនិយាយថា កូរ៉េខាងជើងអាចទៅរកជំនួយពីអ៉ីរ៉ង់លើផ្នែកបច្ចេកវិទ្យាមីស៊ីលប្រើថាមពលចំហេះឥន្ធនៈរឹង ដូចជាការប្រើមីស៊ីលប៉ាលិស្ទិកបំពាក់ក្បាលគ្រាប់ដែលមានល្បឿនលឿនជាងសំឡេងជាដើម ។

ដំណើរទស្សនកិច្ចលើកនេះទៀតសោត ក៏ត្រូវបានគេសង្ស័យដែរថា កូរ៉េខាងជើងចង់បង្កើនចំណងសម្ព័ន្ធភាពឲ្យកាន់តែស៊ីជម្រៅជាមួយអ៉ីរ៉ង់ ចំពេលកំពុងកើតមានសង្គ្រាមរវាងរុស្ស៊ី និងអ៊ុយក្រែន ។ កូរ៉េខាងជើង និងអ៉ីរ៉ង់ គឺជាអ្នកផ្ដល់អាវុធយ៉ាងសំខាន់ឲ្យទៅរុស្ស៊ីនៅក្នុងសង្គ្រាម ។

ទំនាក់ទំនងការទូតរវាងរដ្ឋាភិបាលក្រុងព្យុងយ៉ាង និងតេហេរ៉ង់ បានបង្កើតឡើងនៅក្នុងឆ្នាំ១៩៧៣ ។ ប្រទេសទាំងពីរ ត្រូវគេដឹងឮថា មានកិច្ចសហការយ៉ាងជិតស្និទ្ធ ខណៈកំពុងស្ថិតនៅក្រោមទណ្ឌកម្មអន្តរជាតិដូចគ្នាជុំវិញកម្មវិធីផលិតគ្រឿងសព្វាវុធ ។ បណ្ដាអន្តរជាតិបានដាក់ការសង្ស័យថា សម្ព័ន្ធមិត្តទាំងពីរបានលួចផ្លាស់ប្ដូរនូវបច្ចេកវិទ្យាបង្កើតគ្រាប់មីស៊ីលប៉ាលិស្ទិក ជាពិសេសកំឡុងសង្គ្រាមអ៉ីរ៉ាក់-អ៉ីរ៉ង់ ឆ្នាំ ១៩៨០-១៩៨៨ ។

សូមរំឭកថា កាលពីឆ្នាំ ២០០៦ មេបញ្ជាការកងឆ្មាំបដិវត្តន៍អ៉ីរ៉ង់ បានប្រកាសជាសាធារណៈដោយទទួលស្គាល់ ប្រទេសរបស់លោកពិតជាធ្លាប់ទទួលយកមីស៊ីលពីកូរ៉េខាងជើងប្រាកដមែន ដោយក្នុងនោះមានដូចជា ប្រភេទមីស៊ីល Scud-B និង Scud-C ប៉ុន្តែតាំងពីនោះមក អ៉ីរ៉ង់មិនត្រូវការជំនួយពីប្រទេសរបស់លោក គីម ជុងអ៊ុន ទៀតឡើយ។

ទោះជាបែបនេះក្ដី បើតាមរបាយការណ៍ពីភ្នាក់ងារការពារជាតិសម្ងាត់របស់អាមេរិកក្នុងឆ្នាំ២០១៩ បានបង្ហាញថា មីស៊ីលប៉ាលិស្ទិក Shahab-3 ដែលអ៉ីរ៉ង់អភិវឌ្ឍគឺផ្អែកតាមបច្ចេកវិទ្យាមីស៊ីលខ្នាតមធ្យម Rodong របស់កូរ៉េខាងជើង។ មួយវិញទៀត មីស៊ីល Khorramshahr របស់អ៉ីរ៉ង់ ក៏ផលិតឡើងតាមបច្ចេកវិទ្យាមីស៊ីល Musudan កូរ៉េខាងជើងផងដែរ ៕

ដោយ ៖ ឈាង