ភ្លើងឆេះភ្នំសំរាមនៅឥណ្ឌា ជះផ្សែងពុលគ្រោះថ្នាក់ លើប្រជាជន

អ្នកក្រុងញូវដែលីនៃប្រទេសឥណ្ឌា កំពុងរងទុក្ខដោយសារផ្សែងពុលដ៏ក្រាស់ ហុយចេញពីភ្នំសំរាម ដែលត្រូវអគ្គិភ័យឆាបឆេះអស់រយៈពេលជាច្រើនថ្ងៃមកហើយ។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

តាមការចុះផ្សាយរបស់ CNN កាលពីថ្ងៃអង្គារទី២៣ខែមេសា អគ្គិភ័យនៅ Ghazipur ដែលជាវាលចាក់សំរាមធំជាងគេបំផុក្នុងទីក្រុងញូវដែលី បានចាប់ផ្តើមតាំងតែពីថ្ងៃទី២១ខែមេសាមកម្ល៉េះ ដោយវាបានបញ្ចេញសារធាតុពុលដ៏គ្រោះថ្នាក់និងកម្តៅជះទៅលើរដ្ឋធានីនៃប្រទេសឥណ្ឌា។

ភ្លើងឆេះកន្លែងចាក់សំរាម ជារឿយៗកើតឡើងដោយសារតែឧស្ម័នមេតាន ដែលបញ្ចេញកម្តៅពេលសំរាមរលួយ។ ព្រោះរឿងនេះ អ្នករស់នៅតំបន់ក្បែរៗនោះ បានត្អូញត្អែរថា ពួកគេឈឺភ្នែកនិងរលាកបំពង់ក ដោយសារតែខ្យល់ពុល ហើយបញ្ហានេះទៀតសោត ធ្វើឲ្យរដ្ឋាភិបាលឥណ្ឌាឈឺក្បាល និងខិតខំស្វែងរកដំណោះស្រាយអស់រយៈពេលជាច្រើនឆ្នាំមកហើយ។

អ្វីដែលកាន់តែព្រួយបារម្ភគឺថា ការស្រូបឧស្ម័នមេតានក្នុងរយៈពេលយូរ អាចបណ្តាលឲ្យជំងឺសួតកាន់តែអាក្រក់ រួមទាំងកើតជំងឺហឺត និងបង្កើនហានិភ័យនៃជំងឺដាច់សរសៃឈាមខួរក្បាលទៀតផង។ ម្យ៉ាងទៀត បើយោងតាម អង្គការមិនរកប្រាក់ចំណេញ Global Clean Air, ឧស្ម័នមេតាន មិនមែនជាប្រភពតែមួយនៃការបំភាយជាតិពុលចេញពីភ្នំសំរាមនោះទេ ពោលគឺថា រាប់ទសវត្សរ៍មកនេះ ជាតិពុលពីសំរាម បានជ្រាបចូលទៅក្នុងដី ធ្វើឲ្យពុលដល់ប្រភពទឹកសម្រាប់ពលរដ្ឋរស់នៅជុំវិញនោះ រាប់ម៉ឺននាក់ទៅទៀត។ 

ជារៀងរាល់ឆ្នាំ នៅពេលសីតុណ្ហភាពហក់ឡើងខ្ពស់នារដូវក្តៅ កន្លែងចាក់សំរាមក្នុងទីក្រុងញូវដែលី តែងឆាបឆេះជាអណ្តាតភ្លើង ហើយបើយោងតាមទីភ្នាក់ងារត្រួតពិនិត្យការបំភាយឧស្ម័នពីផ្កាយរណប GHGSat បានឲ្យដឹងថា ឥណ្ឌាគឺជាប្រទេសបញ្ចេញឧស្ម័នមេតានពីកាកសំណល់ធំជាងគេបំផុតលើពិភពលោក។

យោងតាមរបាយការណ៍ឆ្នាំ២០២៣ ដោយមជ្ឈមណ្ឌលវិទ្យាសាស្ត្រនិងបរិស្ថាន ក្នុងទីក្រុង ញូវដែលីបានបង្ហាញថា ក្រៅពី Ghazipur ឥណ្ឌានៅមានភ្នំសំរាម ប្រហែល ៣ ០០០កន្លែងទៀត ដែលផ្ទុកកាកសំណល់រលួយ និងការបំភាយឧស្ម័នហួសកម្រិត ប៉ះពាល់ដល់សុខភាពប្រជាជន៕

អត្ថបទ៖ សុខ សុវណ្ណ

ចុចអាន៖ កម្មករ ឥណ្ឌា រាប់សិបនាក់ចេញទៅធ្វើសំណង់នៅ អ៊ីស្រាអែល