សម្ព័ន្ធមិត្តរុស្ស៊ី ថា ជោគវាសនាពិភពលោក គឺត្រូវកំណត់នៅ អ៊ុយក្រែន

យោងតាមសារព័ត៌មាន RT, ប្រធានាធិបតីនៃប្រទេសបេឡារុស ដែលជាសម្ព័ន្ធមិត្តចាក់ទឹកមិនលិចរបស់រុស្ស៊ី បានប្រកាសយ៉ាងច្បាស់ៗកាលពីថ្ងៃពុធទី២៤ខែមេសាថា ជម្លោះនៅអ៊ុយក្រែន គឺជាព្រឹត្តិការណ៍ដ៏ធំមួយ ដែលក៏អាចកំណត់ពីជោគវាសនារបស់ពិភពលោកដែរ ហើយម្យ៉ាងវិញទៀតឥទ្ធិពលរបស់លោកខាងលិច ហាក់ចុះខ្សោយកាន់តែខ្លាំងដោយសារតែទីក្រុងកៀវ។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

ក្នុងអំឡុងពេលថ្លែងសុន្ទកថាទៅកាន់សភាប្រជាជនបេឡារុស លោកប្រធានាធិបតី Alexander Lukashenko ក៏បញ្ជាក់យ៉ាងច្បាស់ផងដែរថា ប្រទេសរបស់លោក មិនឱនក្បាលចំពោះសម្ពាធពីលោកខាងលិច ដូចអ្នកជិតខាងរបស់ខ្លួននៅភាគខាងត្បូងឡើយ។

លោកលើកឡើងថា “អ្នកគ្រប់គ្នាយល់ហើយថា សព្វថ្ងៃ អ៊ុយក្រែនគឺជាដែនយោធា ដែលអាចសម្រេចពីអនាគតពិភពលោក។ ឥឡូវ មហាអំណាចនុយក្លេអ៊ែរធំបំផុត កំពុងធ្វើសង្រ្គាមដោយប្រយោល ឬសូម្បីដោយផ្ទាល់ នៅលើទឹកដីរបស់ពួកគេ។ លើសពី​នេះ អាជ្ញាធរ​ទីក្រុងកៀវ ដល់ថ្នាក់​ចរចា​ជាមួយ​លោក​ខាង​លិច ​ដើម្បី​ដោះដូរ​អាវុធ​សម្រាប់​ជីវិត​ប្រជាជន​អ៊ុយក្រែនថែមទៀត។ នេះគឺ​ជា​រឿងដ៏​ឈឺ​ចាប់”​។

លោកព្រមានថា ទីក្រុងកៀវកំពុងគិតខុស! ការដែលពួកគេបម្រើចៅហ្វាយនាយ មុននិងក្រោយគង់តែចាញ់ទេ ហើយអ៊ុយក្រែន ​កំពុង​ដាក់​ភាពជា​រដ្ឋ​របស់​ខ្លួនស្ថិតក្នុ​ងហានិភ័យ ព្រោះពួកគេបាន​ក្បត់​អតីតកាល និង​ប្រពៃណី​របស់ខ្លួន​។

ទោះបីជាយ៉ាងណាក៏ដោយ លោក Lukashenko ក៏បញ្ចេញយោបល់ផងដែរថា ការប្រឈមមុខដាក់ណាមួយគ្មាននាំផលចំណេញអ្វីទេ ប្រទេសទាំងឡាយគួរគិតគូរអំពីការបំពេញតួនាទីរបស់ខ្លួនដើម្បីកិច្ចការពិភពលោកល្អជាជាង។

សូមបញ្ជាក់ជាថ្មី រុស្ស៊ី បានបើកប្រតិបត្តិការយោធាពិសេសនៅប្រទេសអ៊ុយក្រែនកាលពីថ្ងៃទី២៤ខែកុម្ភៈឆ្នាំ២០២២ ក្នុងគោលបំណងរំដោះតំបន់ Donbass ព្រោះថាបើយោងតាមភាគីរុស្ស៊ី, នៅទីនោះប្រជាជននៃសាធារណរដ្ឋ Donetsk និង Lugansk បានរស់ក្រោមគ្រាប់ផ្លោងរបស់កងកម្លាំងទីក្រុងកៀវ សឹងរាល់ថ្ងៃ។

យោងតាមតួលេខក្រៅផ្លូវការបានបង្ហាញថា គិតត្រឹមពេលនេះ តួលេខទាហាននិងជនស៊ីវិលស្លាប់សរុបចូលគ្នាក្នុងជម្លោះនេះ មានជាង ៥០ម៉ឺននាក់៕

អត្ថបទ៖ សុខ សុវណ្ណ

ចុចអាន៖ សម្ព័ន្ធមិត្តចាក់ទឹកមិនលិចលោក ពូទីន ថា ទ័ពណាតូជាង ៣ ម៉ឺននាក់រំកិល​ចូលកៀកព្រំដែន រុស្ស៊ី-បេឡារុស