ព័ត៌មានអន្ដរជាតិ

វៀតណាម ចង់ទិញរថក្រោះបាញ់ផ្លោងគ្រាប់ដោយស្វ័យប្រវត្តពីកូរ៉េខាងត្បូងឲ្យបានឆាប់ៗ

បានផុស

៥ ខែ មុន

នៅ

ថ្ងៃព្រហស្បតិ៍ ២៥ មេសា ២០២៤

ដោយ

Chheang

លោក Nguyen Hong Phong មេបញ្ជាការផ្នែកសព្វាវុធវៀតណាម បានបង្ហាញពីបំណងចង់ឲ្យការទិញលក់រថក្រោះបាញ់ផ្លោងគ្រាប់ដោយស្វ័យប្រវត្តម៉ាក K9 ពីប្រទេសកូរ៉េខាងត្បូង អាចដំណើរការឲ្យបានឆាប់រហ័សជាទីបំផុត។ នេះបើយោងតាមការប្រកាសរបស់ក្រសួងការពារជាតិក្រុងសេអ៊ូល នៅថ្ងៃទី២៥ ខែមេសា នេះ។

រថក្រោះកាំំភ្លើងធំ K9 អំឡុងសមយុទ្ធឆ្នាំ២០១០ (រូបថត៖ AFP)

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

គោលបណងទិញសព្វាវុធរបស់វៀតណាម ធ្វើឡើងបន្ទាប់ពីជំនួបរវាងលោក Nguyen Hong Phong និងអនុរដ្ឋមន្ត្រីក្រសួងការពារជាតិកូរ៉េខាងត្បូងគឺលោក Kim Seon-ho កាលពីថ្ងៃទី២៤ ខែមេសា អំឡុងដំណើរទស្សនកិច្ចនៅកងពលតូចសព្វាវុធវៀតណាមស្ថិតនៅក្បែរទីក្រុងហាណូយ។

មេបញ្ជាការវៀតណាម បានរៀបរាប់ថា លោកមើលឃើញផ្ទាល់ភ្នែកអំពីភាពល្អឥតខ្ចោះរបស់រថក្រោះចម្បាំង K9 ខណៈពេលលោកបានទៅធ្វើទស្សនកិច្ចនៅកូរ៉េខាងត្បូងកាលពីឆ្នាំមុន។ លោកបន្តថា ប្រសិនបើវៀតណាមទិញ K9 បានហើយ នោះវានឹងត្រូវយកទៅប្រើក្នុងកងពលតូចផ្នែកសព្វាវុធរបស់លោកផ្ទាល់។

ជាការឆ្លើយតប លោក Kim Seon-ho បាននិយាយថា ក្រសួងការពារជាតិរបស់លោក នឹងជួយសម្រួលដល់ការងារជួញដូរសព្វាវុធរបស់វៀតណាមពីកូរ៉េខាងត្បូង។

សូមរំឮកថា វៀតណាម និងកូរ៉េខាងត្បូង បានបង្កើតចំណងការទូតផ្លូវការជាមួយគ្នាចាប់តាំងពីឆ្នាំ១៩៩២មកម៉្លេះ។ បច្ចុប្បន្ន ទំហំពាណិជ្ជកម្មទ្វេភាគីរវាងសម្ព័ន្ធមិត្តទាំងពីរ មានប្រមាណជាង ៧៨ពាន់លានដុល្លារ ហើយត្រូវបានដាក់គោលដៅឲ្យឈានដល់ ១៥០ពាន់លានដុល្លារនៅក្នុងឆ្នាំ២០៣០ខាងមុខ៕