ប្រទេសនៅអាហ្វ្រិកក្លាយជាសមរភូមិដណ្ដើមឥទ្ធិពលវិនិយោគរវាងចិន និងអាមេរិក

ការប្រកួតប្រជែងអំណាចសកលរវាងចិន និងសហរដ្ឋអាមេរិកកាន់តែក្តៅថែមមួយកម្រិតទៀតក្នុងបណ្តាប្រទេសនៅអាហ្វ្រិក ជាពិសេសការដណ្ដើមដៃគូវិនិយោគ ។ នេះបើយោងតាមការចេញផ្សាយរបស់សារព័ត៌មាន CNA កាលពីថ្ងៃទី​២៥ ខែមេសាកន្លងទៅ ។

ក្នុងរយៈពេលជាច្រើនឆ្នាំមកនេះ ប្រទេសចិនបាននិងកំពុងព្យាយាមដណ្តើមយកទីតាំងនៅទ្វីបអាហ្រ្វិក ខណៈពេលដែលសហរដ្ឋអាមេរិកកំពុងស្វែងរកការជឿទុកចិត្តឡើងវិញពីដៃគូរវិនិយោគ ។ ងាកមកមើលការវិនិយោគរបស់ចិននៅតង់សានីដែលជាប្រទេសមួយមានសេដ្ឋកិច្ចរីកចម្រើនបំផុតនៅទ្វីបអាហ្រ្វិកបានកើនឡើងយ៉ាងសម្បើម ដោយក្នុងរយៈពេល ១០ ឆ្នាំចុងក្រោយនេះ ពោលចាប់ពីឆ្នាំ ២០១៣ ដល់ឆ្នាំ ២០២៣ ប្រទេសចិនបានបណ្តាក់ទុនវិនិយោគជិត ១០ ពាន់លានដុល្លារអាមេរិក ។

ក្រៅពីប្រទេសតង់សានី ចិនក៏សម្លឹងឃើញប្រទេសអ៊ូហ្គង់ដា និងស៊ូដង់ខាងត្បូងផងដែរ ខណៈនៅប្រទេសស៊ូដង់ខាងត្បូង រដ្ឋាភិបាលទីក្រុងប៉េកាំងមានចំណែកប្រហែល ៧៥ ភាគរយនៃការនាំចេញប្រេង និងដើរតួនាទីយ៉ាងសំខាន់នៅក្នុងសេដ្ឋកិច្ចរបស់ប្រទេសក្រីក្រមួយនេះ ។

ចំណែកឯ សហរដ្ឋអាមេរិកក៏កំពុងបង្កើតការវិនិយោគជាយុទ្ធសាស្ត្រ និងការពង្រឹងទំនាក់ទំនងពាណិជ្ជកម្មផងដែរ ។គិតត្រឹមខែធ្នូឆ្នាំមុន សហរដ្ឋអាមេរិកមានគម្រោងចំនួន ២៨៣ ដែលបានចុះបញ្ជីនៅមជ្ឈមណ្ឌលវិនិយោគប្រទេសតង់សានី ខណៈអាជីវកម្មទាំងនោះផ្តល់ការងារដោយផ្ទាល់ និងប្រយោលប្រហែល ៥៥,០០០ នាក់ ។

ស្របពេលជាមួយគ្នានេះ អនុប្រធានាធិបតីសហរដ្ឋអាមេរិកលោកស្រី Kamala Harris កាលពីឆ្នាំមុនបានសន្យាថានឹងជួយសម្រួលដល់ការផ្ដល់ហិរញ្ញប្បទានរហូតដល់ ៥០០ លានដុល្លារអាមេរិកដើម្បីជួយក្រុមហ៊ុនអាមេរិកនាំចេញទំនិញ និងសេវាកម្មទៅកាន់ប្រទេសតង់សានី ។

បើទោះបីជាចិនកំពុងនាំមុខក្នុងការវិនិយោគនៅអាហ្វ្រិក តែវាមិនយឺតពេលទេសម្រាប់សហរដ្ឋអាមេរិកក្នុងការព្យាយាម និងឲ្យតាមទាន់ ជាពិសេសក្នុងការលើកកម្ពស់ជីវភាពរស់នៅរបស់ប្រជាជនអាហ្វ្រិកដោយការផ្តល់នូវឱកាសការងារ និងបណ្តុះបណ្តាលជំនាញកាន់តែប្រសើរឡើងនៅទីនោះ ៕

អត្ថបទ ៖ ប៊ុន សុភាព