ព័ត៌មានអន្ដរជាតិ

ជប៉ុន នឹងធ្វើរនាំងកម្ពស់២ម៉ែត្រកន្លះបាំងទេសចរមិនឲ្យមើលឃើញទេសភាពភ្នំហ្វូជី

បានផុស

១០ ខែ មុន

នៅ

ថ្ងៃសុក្រ ២៦ មេសា ២០២៤

ដោយ

Chheang

រនាំងប្រវែង២០ម៉ែត្រនិងកម្ពស់២,៥ម៉ែត្រ នឹងត្រូវចាប់ផ្ដើមដំឡើងឆាប់ៗនៅសប្ដាហ៍ក្រោយនេះ សម្រាប់បិទបាំងទេសភាពភ្នំហ្វូជី ដែលជាតំបន់ទេសចរណ៍ដ៏ល្បីមួយនៅជប៉ុន។ ការធ្វើដូច្នេះ គឺដើម្បីទប់ស្កាត់មិនឲ្យក្រុមទេសចរមួយចំនួនប្រមូលផ្ដុំគ្នាយ៉ាងអនាធិបតេយ្យគ្មានច្បាប់គ្មានទម្លាប់ត្រឹមត្រូវ។ នេះបើយោងតាមសម្ដីរបស់មន្ត្រីទីក្រុង Fujikawaguchiko នៅថ្ងៃទី២៦ ខែមេសា ដែលថ្លែងទៅកាន់សារព័ត៌មាន AFP។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

ប្រភពពីមន្ត្រីនៅក្នុងតំបន់ដដែល បានបញ្ជាក់ថា វាជារឿងគួរឲ្យសោកស្ដាយ ដែលត្រូវធ្វើបែបនេះ ដោយសារតែក្រុមទេសចរមួយចំនួនមិនបានគោរពច្បាប់ទម្លាប់ ហើយចោលសំរាមតែផ្ដេសផ្ដាស ព្រមទាំងបំពានច្បាប់ចរាចរណ៍ថែមទៀតផង។ ភាគច្រើននៃក្រុមទេសចរអសីលធម៌គឺជាជនបរទេស។

ការដាក់រនាំងនេះ គឺបិទតែទេសភាពភ្នំហ្វូជីពីមួយជ្រុងតែប៉ុណ្ណោះ ពោលគឺដើម្បីបាំងទេសភាពពីជ្រុងដែលមានទេសចរប្រមូលផ្ដុំគ្នាថតរូបច្រើនជាងគេ។ ទេសចរអាចផ្ដិតយករូបភាពភ្នំហ្វូជីពីច្រើនជ្រុងបាន ប៉ុន្តែជ្រុងដែលជប៉ុនចង់បាំងនោះ មានភាពពេញនិយមជាងគេបំផុត ត្បិតអីអ្នកទេសចរអាចមើលឃើញទេសភាពភ្នំភ្លើងយ៉ាងច្បាស់ឈរនៅចំពីក្រោយហាងទំនិញយីហោល្បីនៅជប៉ុន។

មន្ត្រីក្នុងតំបន់ ថា ជ្រុងថតដែលពេញនិយមនេះនៅពេលបង្ហោះលើបណ្ដាញសង្គម គឺមានភាពទាក់ទាញខ្លាំង ដោយគ្រាន់តែក្រឡេកមួយភ្លែតគឺដឹងថាថតនៅប្រទេសជប៉ុន។

ពាក់ព័ន្ធនឹងបញ្ហានេះ មន្ត្រីក្នុងតំបន់ខាងលើ បានបន្ថែមថា រនាំងដែលនឹងត្រូវដាក់ គឺជាចំណាត់ការបណ្ដោះអាសន្នរហូតដល់ស្ថានភាពនៅទីនោះមានសភាពល្អប្រសើរឡើងវិញជាថ្មីម្ដងទៀត។

សូមបញ្ជាក់ថា វិស័យទេសចរណ៍នៅជប៉ុន ចាប់ផ្ដើមមានសន្ទុះឡើងវិញលឿនគួរឲ្យកត់សម្គាល់ ក្រោយពេលវិធានការរឹងបន្តឹងព្រំដែនអំឡុងពេលកូវីដ១៩ត្រូវបានបញ្ឈប់។ ផ្ទុយពីអ្វីដែលរដ្ឋាភិបាលជប៉ុនរំពឹងចង់បាន ប្រជាជនជប៉ុនមួយចំនួនហាក់មិនសូវពេញចិត្តនឹងការកើនឡើងចំនួនទេសចរនេះឡើយ ព្រោះតែភាពអសីលធម៌មួយចំនួនរបស់អ្នកដែលមកទស្សនា។ ជាឧទាហរណ៍ជាក់ស្ដែង ថ្មីៗនៅក្នុងឆ្នាំនេះ ផ្លូវលំមួយដែលមានរក្សាទុករូបតុក្កតាបុរាណ Geisha ស្ថិតក្នុងតំបន់ទេសចរណ៍ Gion ត្រូវបានពលរដ្ឋបិទហាមមិនឲ្យទេសចរចូលមកទស្សនាឡើយ៕

ដោយ៖ ឈាង

Related Topics:ប្រទេសជប៉ុន