ព័ត៌មានអន្ដរជាតិ

អេស៉្បាញ ត្រៀមបញ្ជូនគ្រាប់មីស៊ីលឲ្យទៅអ៊ុយក្រែន តែក្នុងចំនួនតិចតួច

បានផុស

២ ខែ មុន

នៅ

ថ្ងៃសៅរ៍ ២៧ មេសា ២០២៤

ដោយ

ក្រោយមានការដាក់សម្ពាធពីសម្ព័ន្ធមិត្តនៃសហភាពអឺរ៉ុប (EU) និងអង្គការណាតូ (NATO) រដ្ឋាភិបាលប្រទេសអេស្ប៉ាញបានសម្រេចចិត្តនឹងបញ្ជូនជំនួយជាគ្រាប់មីស៊ីល Patriot ឲ្យទៅអ៊ុយក្រែន។ នេះបើយោងតាមការចុះផ្សាយរបស់សារព័ត៌មានអេស៉្បាញ El Pais កាលពីថ្ងៃទី២៦ ខែមេសា។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

ក្រោយមានការវាយប្រហារដែនអាកាសរបស់រុស្ស៊ីទៅលើអ៊ុយក្រែន ថ្នាក់ដឹកនាំ EU បានប្រឹងជំរុញឲ្យបណ្ដាប្រទេសជាសមាជិកបញ្ជូនប្រព័ន្ធការពារបន្ថែមទៀតទៅកាន់ទីក្រុងកៀវ ជាពិសេសនោះគឺប្រទេសក្រិក និងអេស្ប៉ាញ ដែលសម្បូរសព្វាវុធយោធាការពារបែបនេះ។

ក្រិក បានបដិសេធនឹងបំណងរបស់ EU ដោយថា ខ្លួននឹងមិនបញ្ជូនប្រព័ន្ធការពារអាកាសទៅអ៊ុយក្រែននោះឡើយ ក្រោមហេតុផលថាប្រព័ន្ធការពារពិតជាសំខាន់ណាស់សម្រាប់ក្រិកទុកការពារប្រទេសខ្លួនផ្ទាល់។ ដោយឡែកអេស៉្បាញវិញបានយល់ព្រម តែបញ្ជូនត្រឹមជាគ្រាប់មីស៊ីលបាញ់ការពារ (Patriot) ប៉ុណ្ណោះ តែមិនមែនជាប្រព័ន្ធបាញ់ការពារដែនអាកាសនោះទេ ដោយសារតែប្រទេសនេះមានត្រឹមតែប្រព័ន្ធការពារចំនួន ៣គ្រឿង ដែលទិញបានពីអាល្លឺម៉ង់ នៅអំឡុងឆ្នាំ២០០៤ និងឆ្នាំ២០១៤កន្លងទៅ។

តាមសម្រង់សម្ដីមន្ត្រីមួយរូបមកកាន់សារព័ត៌មាន El Pais បានឲ្យដឹងថា គ្រាប់មីស៊ីលដែលអេស៉្បាញជួយអ៊ុយក្រែន នឹងមិនមានចំនួនច្រើនជាដុំកំភួនឡើយ ត្បិតអីនៅអេស៊្បាញផ្ទាល់មានតែគ្រាប់មីស៊ីល Patriot ប្រហែលតែ ៥០គ្រាប់ ហើយណាមួយគ្រាប់ទាំងនោះមានតម្លៃថ្លៃៗខ្លាំងណាស់។

គួររំឭកថា កាលពីដើមខែមេសា ប្រធានាធិបតីអ៊ុយក្រែនលោក Zelenskiy បានស្នើឲ្យសមាជិកអង្គការណាតូ ជួយបញ្ជូនជំនួយជាប្រព័ន្ធការពារអាកាសយ៉ាងហោចណាស់ ៧គ្រឿង ដែលមានម៉ាក Patriots ឬក៏ទំនើបជាងនេះក៏បាន។ ឆ្លើយតបនឹងការស្នើសុំនេះ ប្រទេសអាល្លឺម៉ង់បានសន្យានឹងផ្ដល់ប្រព័ន្ធការពារ Patriot មួយគ្រឿងឲ្យអ៊ុយក្រែន ហើយក៏បានអំពាវនាវឲ្យបណ្ដាសមាជិកផ្សេងនាំគ្នាជួយចំនួន ៦គ្រឿងទៀត៕

ដោយ៖ ឈាង