ម៉ាឡេស៊ី រកឃើញដង្កូវប៉ារ៉ាស៊ីត ក្នុងត្រីខកំប៉ុង ១៦តោន នាំចូលពីចិន 

សារព័ត៌មាន VN Express រាយការណ៍នៅថ្ងៃសៅរ៍ទី២៧ខែមេសាថា អាជ្ញាធរម៉ាឡេស៊ី បានរកឃើញដង្កូវប៉ារ៉ាស៊ីតនៅក្នុងត្រីខកំប៉ុងចំនួន ១៦តោន ដែលនាំចូលពីប្រទេសចិន ឆ្លងកាត់សិង្ហបុរី។

ដង្កូវប៉ារ៉ាស៊ីតដែលគេរកឃើញនេះ ​ត្រូវ​បាន​កំណត់​ថា​ជា ព្រូន Anisakis ដែលជាប្រភព​បង្កឲ្យ​កើត​ជំងឺព្រូន Anisakiasis ក្នុងខ្លួន​មនុស្ស។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

ជាធម្មតា ជំងឺប្រភេទនេះ កើតឡើងដោយសារមនុស្សបរិភោគអាហារសមុទ្រឆៅ ឬមិនទាន់ឆ្អិន ដូចជាត្រីដែលឆ្លងប៉ារ៉ាស៊ីតជាដើម ហើយវាអាចបណ្តាលឲ្យឈឺពោះ ក្អួតចង្អោរ និងរាគ។

បើយោងតាមមន្ត្រីអធិការកិច្ចម៉ាឡេស៊ី, តាមពិតទៅទំនិញទាំងនេះ ត្រូវបានរឹបអូសតាំងតែពីដើមខែនេះមកម្ល៉េះ ពោលគឺរឹបអូសពីឡានដឹកទំនិញដែលចេញដំណើរពីសិង្ហបុរី ហើយហ៊ានចូលម៉ាឡេស៊ីដោយគ្មានការអនុញ្ញាត។

ទោះបីជាយ៉ាងណាក៏ដោយ អាជ្ញាធរម៉ាឡេស៊ី មិនបានបញ្ជាក់លម្អិតអំពីករណីនេះទេ ហើយក៏មិនប្រាប់ឈ្មោះត្រីខកំប៉ុងដែរ ដោយគ្រាន់តែអះអាងថា មិនមានការចាប់ខ្លួនអ្នកបើកបរយានយន្តណាម្នាក់ឡើយ៕

អត្ថបទ៖ សុខ សុវណ្ណ

ចុចអាន៖ សង្ស័យពុលត្រីខកំប៉ុង មនុស្ស​៧​នាក់​ត្រូវបានបញ្ជូនទៅសង្គ្រោះភ្លាមៗ​