ណាសា រកឃើញសញ្ញាជីវិតលើភពមួយ ខណៈគេសង្ស័យថា ជា Alien 

ទីបំផុត ក្រោយការសង្កេតអស់រយៈពេលយ៉ាងយូរ ក្រុមតារាវិទូរបស់អង្គការណាសា បានរកឃើញសញ្ញានៃជីវិតលើភពដ៏ឆ្ងាយមួយ ដែលបង្កឲ្យមានមន្ទិលសង្ស័យថា ប្រហែលជាមាន Alien រស់នៅទីនោះក៏ថាបាន។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

តាមការចុះផ្សាយរបស់ Daily Mail កាលពីថ្ងៃសុក្រទី២៦ខែមេសា, ភពដែលត្រូវបានរកឃើញដោយកែវយឹត James Webb មួយនេះមានឈ្មោះ K2-18b ធំជាងផែនដីពីរដង និងមានចម្ងាយ១២០ឆ្នាំពន្លឺ ហើយវាស្ថិតនៅតំបន់ដែលអាចរស់នៅបាន នៃប្រព័ន្ធផ្កាយក្នុងក្រុមតារានិករ Leo។

កាលពីឆ្នាំមុន ក្រុមអ្នកវិទ្យាសាស្ត្រក៏និយាយដែរ ពួកគេគិតថា ពួកគេបានរកឃើញឧស្ម័ន dimethyl sulphide នៅក្នុងបរិយាកាសរបស់វា ដែលឧស្ម័នប្រភេទនេះ មានតែភាវៈមានជីវិតប៉ុណ្ណោះទើបអាចផលិតវាបាន ហើយឥឡូវ ដើម្បីបញ្ជាក់ពីការរកឃើញនេះ កែវយឹតអវកាស James Webb នឹងធ្វើបន្តការសង្កេតយ៉ាងល្អិតល្អន់បន្ថែមទៀតលើភពមួយនេះ។

ទោះបីជាយ៉ាងណាក៏ដោយ ព័ត៌មានពិត នឹងត្រូវរង់ចាំរយៈពេលជាច្រើនខែទៀត ព្រោះរឿងនេះត្រូវការផ្ទៀងផ្ទាត់ រួចផ្សព្វផ្សាយជាផ្លូវការ។

ការស៊ើបអង្កេតលើភព K2-18b ត្រូវបានដឹកនាំដោយរូបវិទូ Nikku Madhusudhan នៅសាកលវិទ្យាល័យ Cambridge ហើយលោកបានហៅភពនេះថា “hycean” ព្រោះវាមានបរិយាកាសសម្បូរទៅដោយអ៊ីដ្រូសែន និងដែនទឹកដ៏ធំល្វឹងល្វើយដូចមហាសមុទ្រ។

សូមបញ្ជាក់ថា K2-18b ត្រូវបានរកឃើញដំបូងនៅឆ្នាំ២០១៥ ប៉ុន្តែទើបតែមកដល់ឆ្នាំ២០១៩ទេ ដែលមានវត្តមានចំហាយទឹកនៅក្នុងបរិយាកាសភពនេះ ត្រូវបានគេរាយការណ៍។

ក្រោយមក កាលពីឆ្នាំមុន កែវយឹត James Webb ក៏បានរកឃើញឧស្ម័នកាបូនឌីអុកស៊ីត និងមេតាននៅក្នុងបរិយាកាសរបស់វាបន្ថែមទៀត៕

អត្ថបទ៖ សុខ សុវណ្ណ

ចុចអាន៖ អាមេរិក បញ្ជា ណាសា ឲ្យបង្កើតល្វែងម៉ោងស្តង់ដា សម្រាប់ ឋានព្រះចន្ទ