លោក ហ្សេលេនស្គី ចង់ឲ្យអាមេរិក ជួយ១០ឆ្នាំទៀត

ទោះបីជាអ៊ុយក្រែន កាន់តែពិបាកទៅៗ ដើម្បីសុំជំនួយពីសហរដ្ឋអាមេរិកក៏ដោយ ប៉ុន្តែពេលនេះ បើយោងតាមការអះអាងថាពីលោក វ្ល៉ាឌីមៀរ ហ្សេលេនស្គី បានឲ្យដឹងថា ទីក្រុងកៀវ កំពុងចរចាជាមួយរដ្ឋបាលរបស់លោកប្រធានាធិបតី ចូ បៃដិន លើកិច្ចព្រមព្រៀងរយៈពេលវែង ដែលនឹងនាំឲ្យទីក្រុងវ៉ាស៊ីនតោន ផ្តល់ការគាំទ្រផ្នែកយោធា សេដ្ឋកិច្ច និងនយោបាយដល់អ៊ុយក្រែន រយៈពេល១០ឆ្នាំទៀត។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

ក្នុងសុន្ទរកថាជាវីដេអូប្រចាំថ្ងៃកាលពីថ្ងៃអាទិត្យទី២៨ខែមេសានិងផ្សាយបន្តដោយសារព័ត៌មាន RT, លោកហ្សេលេនស្គីទទូចថា ការប្តេជ្ញាចិត្តបែបនេះ ពិតជាចាំបាច់ណាស់ដើម្បីធានាដល់អ៊ុយក្រែន អំពីប្រសិទ្ធភាពនៃជំនួយដែលខ្លួនត្រូវការបំផុត ដើម្បីទប់ស្កាត់ការវាយសន្ធាប់លើសមរភូមិ ដោយកងកម្លាំងរុស្ស៊ី។

លោកនិយាយថា “យើងកំពុងធ្វើការទៅលើកម្រិតនៃការគាំទ្រជាក់ស្តែងសម្រាប់ឆ្នាំនេះ និងសម្រាប់រយៈពេលដប់ឆ្នាំខាងមុខ។ វានឹងរួមមានការគាំទ្រផ្នែកយោធា ហិរញ្ញវត្ថុ និងនយោបាយ ក៏ដូចជាទាក់ទងនឹងការផលិតអាវុធរួមគ្នាផងដែរ”។

សូមបញ្ជាក់ថា ទីក្រុងកៀវ ​បាន​ចុះ​ហត្ថលេខា​លើ​កិច្ចព្រមព្រៀង​សន្តិសុខ​ទ្វេភាគី ​ជាមួយ​សមាជិក​ណាតូ​មួយ​ចំនួន​រួចទៅ​ហើយ រួម​មានដូចជា​អង់គ្លេស អាល្លឺម៉ង់ និង​បារាំង ហើយលោកហ្សេលេនស្គី សង្កត់ធ្ងន់ថា លោកចង់ឲ្យកិច្ចព្រមព្រៀងរយៈពេលវែងក្រោមការចរចាជាមួយទីក្រុងវ៉ាស៊ីនតោន ក្លាយជាកិច្ចព្រមព្រៀងដ៏រឹងមាំបំផុតសម្រាប់អ៊ុយក្រែន។

យ៉ាងណាក៏ដោយ កិច្ចព្រមព្រៀងទ្វេភាគីរបស់អ៊ុយក្រែនជាមួយអ្នកគាំទ្រលោកខាងលិច មិនអាចជួយអ្វីដល់អ៊ុយក្រែនបានទេ ពោលគឺមានតែពាក្យសន្យាផ្តល់ជំនួយរយៈពេលវែង រួមទាំងការគាំទ្រក្នុងករណីមានការវាយប្រហារនាពេលខាងមុខប៉ុណ្ណោះ។

កាលពីដើមខែមេសា សមាជិកសភាអាមេរិក បានអនុម័តលើជំនួយបន្ថែមតម្លៃ៦១ពាន់លានដុល្លារដល់អ៊ុយក្រែន បន្ទាប់ពីប្រធានរដ្ឋសភាលោក Mike Johnson នៃគណបក្សសាធារណរដ្ឋ ប្រែចិត្តបើកភ្លើងខៀវស្របតាមអ្នកប្រជាធិបតេយ្យជុំវិញជំនួយនេះវិញ។

សូមបញ្ជាក់ថា គិតត្រឹមពេលនេះ រដ្ឋបាលលោក បៃដិន បានជះលុយជួយអ៊ុយក្រែន អស់ប្រមាណ១១៣ពាន់លានដុល្លាររួចទៅហើយ ចាប់តាំងពីជម្លោះជាមួយរុស្ស៊ី ផ្ទុះឡើងក្នុងខែកុម្ភៈឆ្នាំ២០២២៕

អត្ថបទ៖ សុខ សុវណ្ណ

ចុចអាន៖ ក្រោយរដ្ឋសភាអាមេរិកអនុម័តជំនួយ លោក ហ្សេលេនស្គី ប្រកាសថា អ៊ុយក្រែន នឹងឈ្នះ