អាមេរិក និងសម្ព័ន្តមិត្ត ជំរុញក្រុមហាម៉ាសឲ្យទទួលយកសំណើបទឈប់​បាញ់របស់ អ៊ីស្រាអែល

សហរដ្ឋអាមេរិក និងចក្រភពអង់គ្លេសបានជំរុញឲ្យក្រុមប្រដាប់អាវុធប៉ាឡេស្ទីនហាម៉ាសទទួលយកសំណើរបស់អ៊ីស្រាអែលចំពោះបទឈប់បាញ់ក្នុងសង្គ្រាមនៅហ្គាហ្សា និងការដោះលែងចំណាប់ខ្មាំងមួយចំនួន ។ នេះបើយោងតាមការចេញផ្សាយដោយសារព័ត៌មាន Al Jazeera នៅថ្ងៃទី៣០ ខែមេសា​នេះ ។

នៅឯកិច្ចប្រជុំវេទិកាសេដ្ឋកិច្ចពិភពលោកក្នុងរដ្ឋធានីរីយ៉ាដ ប្រទេសអារ៉ាប៊ីសាអូឌីត​ រដ្ឋមន្ត្រីការបរទេសអង់គ្លេសលោក David Cameron បានឲ្យដឹងថា សំណើរបស់អ៊ីស្រាអែលដែលប្រគល់ទៅឲ្យក្រុមហាម៉ាសរួមមានបទឈប់បាញ់រយៈពេល ៤០ ថ្ងៃនៅក្នុងសង្គ្រាមនៅតំបន់ហ្គាហ្សា និងការដោះលែងអ្នកទោសប៉ាឡេស្ទីនរាប់ពាន់នាក់ ជាថ្នូរនឹងការដោះលែងចំណាប់ខ្មាំងអ៊ីស្រាអែលមួយចំនួន ។

លោកសង្ឃឹមថា ក្រុមហាម៉ាសនឹងទទួលយកសំណើនេះ ហើយបានសង្កត់ធ្ងន់ថា សង្រ្គាមនឹងមិនបញ្ចប់នោះទេរហូតដល់ចំណាប់ខ្មាំងទាំងអស់ត្រូវបានដោះលែង ។ ចំណែក​រដ្ឋមន្ត្រីការបរទេសអាមេរិក លោក Antony Blinken ក៏ដាក់ក្ដីសង្ឃឹមដែរថា ក្រុមហាម៉ាសនឹងទទួលយកសំណើនេះ ។

សំណើបទឈប់បាញ់រយៈពេល ៤០ ថ្ងៃនេះកើតឡើង នៅពេលដែលគណៈប្រតិភូជាន់ខ្ពស់របស់ក្រុមហាម៉ាសធ្វើដំណើរទៅកាន់ប្រទេសអេហ្ស៊ីបសម្រាប់ការចរចាចុងក្រោយដែលមានគោលបំណងផ្អាក ឬបញ្ឈប់សង្គ្រាមឥតឈប់ឈររបស់អ៊ីស្រាអែលទៅលើតំបន់ហ្គាហ្សា ខណៈគណៈប្រតិភូក្រុមហាម៉ាសរំពឹងឆ្លើយតបទៅនឹងសំណើចុងក្រោយនេះ ។

កន្លងមកអេហ្ស៊ីប កាតា និងអាមេរិកបានធ្វើការសម្រុះសម្រួលកិច្ចព្រមព្រៀងរវាងអ៊ីស្រាអែល និងក្រុមហាម៉ាសអស់រយៈពេលជាច្រើនខែ ប៉ុន្តែការចរចារការទូតនៅប៉ុន្មានថ្ងៃថ្មីៗនេះហាក់ដូចជាបង្ហាញពីការជំរុញថ្មីមួយឆ្ពោះទៅរកការបញ្ឈប់ភ្លើងសង្គ្រាមជិត ៧ ខែនេះ ។

គួរបញ្ជាក់ថា យ៉ាងហោចណាស់មនុស្ស ៣៤,៤៨៨ នាក់ត្រូវបានសម្លាប់ និង ៧៧,៦៤៣ នាក់ផ្សេងទៀតបានរងរបួសនៅក្នុងការវាយលុករបស់អ៊ីស្រាអែលលើតំបន់ហ្គាហ្សា ចាប់តាំងពីថ្ងៃទី៧ ខែតុលា ឆ្នាំ២០២៣ មក ខណៈខាងអ៊ីស្រាអែលវិញក៏មានមនុស្សស្លាប់បាត់បង់ជីវិតប្រមាណ ១,២០០ នាក់ផងដែរ ៕

អត្ថបទ ៖ ប៊ុន សុភាព