ព័ត៌មានអន្ដរជាតិ

អាមេរិក អង្វរប្រទេសនានាឈប់លក់អាវុធឲ្យស៊ូដង់ ខ្លាចផ្ទុះមានរបបប្រល័យពូជសាសន៍

បានផុស

១១ ខែ មុន

នៅ

ថ្ងៃអង្គារ ៣០ មេសា ២០២៤

ដោយ

Chheang

រដ្ឋាភិបាលអាមេរិក បានអំពាវនាវឲ្យបណ្ដាលប្រទេសនានាលើសកលលោក ជាពិសេសនោះគឺសហព័ន្ធអារ៉ាប់រួម បញ្ឈប់ការលក់គ្រឿងសព្វាវុធឲ្យទៅភាគីសង្គ្រាមនៅក្នុងប្រទេសស៊ូដង់ ដោយហេតុថាខ្លាចនឹងមានការសម្លាប់រង្គាសជាថ្មីម្ដងទៀត។ នេះជាអ្វីដែលលោកស្រី Linda Thomas-Greenfield ឯកអគ្គរដ្ឋទូតអាមេរិក លើកឡើងនៅក្នុងជំនួបទីប្រឹក្សាសន្តិសុខអង្គការសហប្រជាជាតិ កាលពីថ្ងៃទី២៩ ខែមេសា។

លោកស្រី Linda Thomas-Greenfield ឯកអគ្គរដ្ឋទូតអាមេរិក (រូបថត៖ AP)

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

សង្គ្រាមចាប់ផ្ដើមផ្ទុះឡើងនៅស៊ូដង់ កាលពី១ឆ្នាំមុន រវាងក្រុមទាហានស៊ូដង់ (SAF) និងក្រុមកម្លាំងជំនួយរហ័សប៉ារ៉ាយោធា (RSF) ដែលបង្កជាវិបត្តិបង្ខំឲ្យប្រជាជនជម្លៀសខ្លួនផ្លាស់ប្ដូរលំនៅក្នុងទំហំធំបំផុតនៅលើពិភពលោក។ អង្គសហប្រជាជាតិ បានបង្ហាញក្ដីបារម្ភកាលពីថ្មីៗនេះថា ក្រុម RSF អាចនឹងវាយប្រហារដណ្ដើមយករដ្ឋធានី al-Fashir ចំតំបន់ Dafur នៃភាគខាងជើងប្រទេសស៊ូដង់ ដែលទីតាំងនេះគឺជាចំណុចស្នូលនៃការប្រមូលផ្ដុំអំណាចនៅស៊ូដង់ និងធ្លាប់ជាតំបន់កើតមានរបបប្រល័យពូជសាសន៍កាលពី២០ឆ្នាំមុន។

អង្គការ UN បានលើកឡើងថា សហព័ន្ធអារ៉ាប់រួមបានផ្ដល់ការគាំទ្រផ្នែកយោធាឲ្យទៅក្រុម RSF នៅស៊ូដង់។ ឆ្លើយតបនឹងការចោទប្រកាន់នេះ សហព័ន្ធអារ៉ាប់រួម បានបដិសេធការជាប់ពាក់ព័ន្ធនៅក្នុងការគាំទ្រយោធាណាមួយនៅក្នុងភាគីប្រឆាំងរដ្ឋាភិបាលស៊ូដង់។ អ្នកនាំពាក្យសហព័ន្ធអារ៉ាប់រួម បានប្រាប់ UN ថា “សហព័ន្ធអារ៉ាប់រួម មិនបានកំពុងបញ្ជូនសព្វាវុធឬយុទ្ធភ័ណ្ឌសោះឡើយឲ្យទៅបក្សពួកណាមួយនៅក្នុងជម្លោះកំពុងកើតមាននៅស៊ូដង់នោះទេ”។

លោកស្រី Linda បានព្រមានថា ប្រវត្តិសាស្ត្រអាក្រក់នៅស៊ូដង់ អាចនឹងកើតឡើងជាថ្មីម្ដងទៀត ដែលអាចបណ្ដាលឲ្យមនុស្សប្រមាណ ៨០ម៉ឺននាក់ស្ថិតនៅក្នុងស្ថានភាពគ្រោះថ្នាក់ជាទីបំផុត។ លោកស្រីក៏បានជំរុញឲ្យក្រុម RSF និងកម្លាំងប្រឆាំងរដ្ឋាភិបាល ចាត់វិធានការបន្ទាន់ ដើម្បីកាត់បន្ថយអំពើហិង្សា ហើយចូលរួមនៅក្នុងកិច្ចចរចាដោយផ្ទាល់។