រុស្ស៊ី គំរាមបាញ់ពន្លិចអង់គ្លេសចូលសមុទ្រ និងកម្ទេចអាមេរិក ទៅជាផេះ បើទ័ពណាតូ ជាន់ដីអ៊ុយក្រែន

រឿងរ៉ាវពាក់ព័ន្ធការបញ្ជូនកងទ័ពណាតូទៅអ៊ុយក្រែន នៅមិនទាន់ថយកម្តៅនៅលើឡើយទេ ដោយពេលនេះ អ្នកកាសែតដែលគេស្គាល់ថាជាសម្ព័ន្ធមិត្តលោក ពូទីន បានគំរាមបាញ់ពន្លិចចក្រភពអង់គ្លេសចូលក្នុងសមុទ្រនិងកម្ទេចសហរដ្ឋអាមេរិក ឲ្យក្លាយទៅជាផេះ បើទ័ពលោកខាងលិច ឈានជើងចូលដីអ៊ុយក្រែនមែន។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

តាមការចុះផ្សាយរបស់ Daily Mail, លោក Dmitry Kiselyov ពិធីករទូរទស្សន៍ដ៏ធំរបស់រុស្ស៊ី Rossiya 1 បានព្រមានថា “ការប៉ុនប៉ងរបស់លោកខាងលិច ដាក់ទ័ពនៅអ៊ុយក្រែនដើម្បីកម្ចាត់រុស្ស៊ី នឹងបង្កឲ្យមានសង្គ្រាមដ៏វិនាសកម្ម។ ​លោកពូទីន នឹងបាញ់មីស៊ីលមហាប្រល័យ Satan-2 និងអាវុធនុយក្លេអ៊ែរសាហាវៗផ្សេងទៀត​”។

លោកអះអាងថា មិនត្រឹមប៉ុណ្ណឹងទេ សូម្បីតែប្រទេសបារាំង ក៏ប្រហែលបាត់ខ្លួនចេញពីផែនទីដែរ ប្រសិនបើរុស្ស៊ី សម្រេចចិត្តបើកការវាយប្រហារមែន។

មីស៊ីលល្បឿនលឿនជាងសំឡេង Sarmat ឬ Satan-2 គឺជាមីស៊ីលគួរឲ្យខ្លាចមួយលើពិភពលោក។ វាជាអាវុធនុយក្លេអ៊ែរអន្តរទ្វីបទម្ងន់ ២០៨តោន មានទំហំប៉ុនប៉មកម្ពស់១៤ជាន់។

មីស៊ីលប្រភេទនេះ ត្រូវបានលោក ពូទីន អួតថា គ្មានខែលការពារណាអាចបញ្ឈប់វាបានឡើយ ព្រោះមុនពេលវាយប្រហារ វាត្រូវហោះហើរទៅកាន់លំហអាកាសលើប៉ូលខាងត្បូង ឬខាងជើងជាមុនសិន។

កាលពីដើមឆ្នាំនេះ សមាជិកព្រឹទ្ធសភាកំពូលរុស្ស៊ីលោក Konstantin Kosachev ក៏ព្រមានខ្លាំងៗដែរថា ការដាក់ពង្រាយកងទ័ពណាតូ ទៅកាន់ទឹកដីអ៊ុយក្រែន នឹងនាំឲ្យមានសេណារីយ៉ូដ៏មហន្តរាយយ៉ាងធំធេង ហើយអាចចាត់ទុកថាជា “ការប្រកាសសង្គ្រាម” លើទីក្រុងមូស្គូទៀតផង។

លោកព្រមានថា ក្រុមប្រឹក្សាសហព័ន្ធរុស្ស៊ី បានយកចិត្តទុកដាក់យ៉ាងខ្លាំងលើការកត់សម្គាល់របស់ប្រធានាធិបតីបារាំង Emmanuel Macron អំពីលទ្ធភាពនៃការបញ្ជូនកងទ័ព។ វិធីសាស្រ្តដែលបង្ហាញដោយមេដឹកនាំបារាំងរូបនេះ គឺពិតជាមានហានិភ័យណាស់ ច្បាស់ជាបង្កឲ្យស្ថានភាពធ្លាក់ចូលទៅក្នុងសេណារីយ៉ូដ៏មហន្តរាយមិនខានឡើយ។ វិមានក្រឹមឡាំង មិនអត់ឱនចំពោះវិធានការបែបនេះដាច់ខាត។

លោក Kosachev បន្តថា “រឿងបែបនេះសបញ្ជាក់ឲ្យឃើញថា វាមិនមែនគ្រាន់តែជាការចូលរួមរបស់ណាតូក្នុងសង្គ្រាមប៉ុណ្ណោះទេ ប៉ុន្តែវាអាចចាត់ទុកថា នេះជាសម្ព័ន្ធភាពដែលបានចូល ក្នុងអរិភាពដោយផ្ទាល់ ឬអាចជាការប្រកាសសង្រ្គាមជាមួយរុស្ស៊ីទៀតផង”។

សូមបញ្ជាក់ គំនិតនៃការបញ្ជូនទ័ពជើងគោកចូលទៅអ៊ុយក្រែន ត្រូវបានលើកឡើងដោយលោក Macron ក្រោយកិច្ចប្រជុំមេដឹកនាំអឺរ៉ុបនៅទីក្រុងប៉ារីស កាលពីខែកុម្ភៈ។

លោកប្រធានាធិបតីបង្ហើបថា សេណារីយ៉ូណាមួយ រួមទាំងការបញ្ជូនទ័ពផងដែរនោះ មិនអាចទាត់ចោលបានឡើយ ដោយលើកហេតុផលថា លោកខាងលិចមិនគួរឈប់ធ្វើសកម្មភាព ហើយទុកឲ្យរុស្ស៊ីត្រួតត្រាអ៊ុយក្រែនបានទេ៕

អត្ថបទ៖ សុខ សុវណ្ណ

ចុចអាន៖ រុស្ស៊ី ព្រមានកើតមហន្តរាយធំធេង បើទ័ពណាតូ ទៅដល់ដី អ៊ុយក្រែន មែន