ប៉ូលិសបារាំងបណ្ដេញនិស្សិតគាំទ្រប៉ាឡេស្ទីន ចេញពីទីធ្លាសាកលវិទ្យាល័យក្នុងក្រុងប៉ារីស

ប៉ូលិសបារាំងបានបណ្ដេញនិស្សិតរាប់សិបនាក់ចេញពីសាកលវិទ្យាល័យ Sorbonne បន្ទាប់ពីពួកគេយកទីធ្លាសាលាដើម្បីធ្វើបាតុកម្មគាំទ្រដល់ប្រជាជននៅប៉ាឡេស្ទីន ។ នេះបើយោងតាមការចេញផ្សាយដោយទីភ្នាក់ងារព័ត៌មាន AP នៅថ្ងៃទី៣០ ខែមេសានេះ ។

បាតុករប្រហែល ៥០ នាក់បានបោះតង់នៅឯទីធ្លាសាកលវិទ្យាល័យ Sorbonne ដើម្បីបង្ហាញការគាំទ្រដល់ប្រជាជនប៉ាឡេស្ទីន ជាមួយនឹងការកាន់ទង់ជាតិប៉ាឡេស្ទីនដ៏ធំ និងស្រែកពាក្យស្លោកគាំទ្រប៉ាឡេស្ទីននៅតំបន់ហ្គាហ្សា ស្របពេលដែលអ៊ីស្រាអែលនៅតែបន្តការវាយលុកឥតឈប់ឈរលើទឹកដីប៉ាឡេស្ទីន ។

ទន្ទឹមនោះ ក្រុមបាតុករគាំទ្រប៉ាឡេស្ទីន និងគាំទ្រអ៊ីស្រាអែលក៏បានប្រឈមមុខដាក់គ្នាយ៉ាងតានតឹងផងដែរនៅតាមផ្លូវខាងក្រៅសាលា ខណៈប៉ូលិសបានចេញធ្វើអន្តរាគមន៍ដើម្បីបំបែកក្រុមប្រឆាំង ។ ទោះបីជាយ៉ាងណា ការតវ៉ាបានបញ្ចប់ដោយសន្តិវិធី នៅពេលដែលនិស្សិតបានយល់ព្រមចាកចេញពីអគារ និងបានធ្វើកិច្ចសន្យាជាមួយខាងសាលា ។

គួរបញ្ជាក់ថា មិនមែនមានត្រឹមតែ​សកលវិទ្យាល័យ Sorbonne ប៉ុណ្ណោះទេដែលផ្ទុះបាតុកម្ម ពោល​ក៏មានការប្រមូលផ្ដុំគ្នាធ្វើបាតុកម្មផ្សេងទៀតនៅ​តាមសកលវិទ្យាល័យនានានៅក្រុងប៉ារីសផងដែរ ​ខណៈការតវ៉ានៅអាមេរិកមានទ្រង់ទ្រាយធំជាងគេ ៕

អត្ថបទ ៖ ប៊ុន សុភាព