ទីក្រុងម៉ានីល បញ្ចេញរថយន្តបាញ់ទឹកតាមដងផ្លូវ ដើម្បីទប់ទល់នឹងកម្តៅ

សារព័ត៌មាន GMA News បានរាយការណ៍នៅថ្ងៃទី១ខែឧសភាថា ព្រោះតែមេឃក្តៅបែកផ្សែង រដ្ឋបាលក្រុងម៉ានីល នៃប្រទេសហ្វីលីពីន បានបញ្ចេញរថយន្ត បាញ់ទឹកតាមតាមដងផ្លូវ ដើម្បីនាំមកនូវភាពត្រជាក់ខ្លះ។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

សីតុណ្ហភាពនៅទីក្រុងម៉ានីល បានហក់ឡើងដល់៤០អង្សាសេ ហើយដោយសារតែកម្តៅដ៏ក្តៅគគុកបែបនេះ រដ្ឋបាលក្រុង បានសម្រេចឲ្យក្រុមហ៊ុននានា ប្តូរម៉ោងធ្វើការដោយចាប់ផ្តើមពីម៉ោង៧ព្រឹក ដល់ម៉ោង៤រសៀលវិញ។

ស្របពេលជាមួយគ្នានោះដែរ ដើម្បីទប់ស្កាត់ជំងឺទាក់ទងនឹងកម្តៅ ក្រសួងសុខាភិបាល បានណែនាំដល់សាធារណជនកុំចេញក្រៅបើមិនចាំបាច់ ត្រូវផឹកទឹកឲ្យបានច្រើន និងចៀសវាងផឹកតែ កាហ្វេ សូដា ក៏ដូចជាស្រាផងដែរ។ លើសពីនេះ មនុស្សគួរប្រើឆ័ត្រ មួក និងស្លៀកពាក់ខោអាវដៃវែងជើងវែង។

សូមជម្រាបបន្តិច កាលពីថ្ងៃចន្ទទី២៩ខែមេសាថា ទីក្រុង Iba ក្នុងខេត្ត Zambales នៃប្រទេសហ្វីលីពីន បានជួបប្រទះនឹងថ្ងៃក្តៅបំផុត ដោយសីតុណ្ហភាពហក់ឡើងដល់កម្រិតកំពូល ៥៣អង្សាសេឯណោះ។

យោងតាមការិយាល័យអាកាសធាតុ PAGASA, សីតុណ្ហភាពនៅ Iba បានហក់ឡើងយ៉ាងឆាប់រហ័សត្បិតអី បីបួនថ្ងៃមុននេះ គេវាស់វែងឃើញថា សីតុណ្ហភាពនៅទីនោះ ឈរត្រឹម៤២ទៅ៤៣អង្សាសេប៉ុណ្ណោះ។

សាលារៀនជាច្រើនបានប្រកាសបិទទ្វារ ប៉ុន្តែតម្រូវឲ្យសិស្សរៀនតាមអនឡាញវិញ ព្រោះតែមន្ត្រីគិតគូរពីសុខទុក្ខរបស់សិស្ស ខណៈដែលរលកកម្តៅត្រូវគេព្យាករថា នឹងបន្តវាយប្រហារប្រទេសនេះ រហូតដល់ចុងខែឧសភាឯណោះ ខណៈទិន្នន័យក្រសួងអប់រំបង្ហាញថា សាលារៀនរាប់ពាន់ ត្រូវផ្អាកដោយសារកម្តៅ ជាហេតុប៉ះពាល់ដល់សិស្សជាង ៣.៦លាននាក់។

រម្លឹកទៅកាលពីឆ្នាំមុន សីតុណ្ហភាពសកល បានកើនឡើងខ្ពស់បំផុត ហើយទីភ្នាក់ងារអាកាសធាតុរបស់អង្គការសហប្រជាជាតិ និយាយថា តំបន់អាស៊ី កំពុងឡើងកម្តៅក្នុងល្បឿនយ៉ាងលឿន ជាពិសេសប្រទេសហ្វីលីពីននេះតែម្តង៕

សូមទស្សនាវីដេអូ៖

អត្ថបទ៖ សុខ សុវណ្ណ

ចុចអាន៖ នៅហ្វីលីពីន សីតុណ្ហភាពឡើងដល់កំពូល ៥៣អង្សាសេ