ព័ត៌មានអន្ដរជាតិ

ត្រីនៅ វៀតណាម ងាប់អណ្ដែតត្រៀបត្រាពេញផ្ទៃទឹក ខណៈរលកកម្ដៅកំពុងអុកឡុកខ្លាំង

បានផុស

១១ ខែ មុន

នៅ

ថ្ងៃព្រហស្បតិ៍ ២ ឧសភា ២០២៤

ដោយ

ត្រីរាប់រយរាប់ពាន់ក្បាលបានងាប់នៅក្នុងអាងស្តុកទឹកមួយកន្លែងក្នុងខេត្ត Dong Nai ភាគខាងត្បូងប្រទេសវៀតណាម ខណៈរលកកម្ដៅកំពុងដុតរោលក្នុងតំបន់អាស៊ីអាគ្នេយ៍ ។ នេះបើយោងតាមការចេញផ្សាយដោយសារព័ត៌មាន CNA នៅថ្ងៃទី២ ខែឧសភានេះ ។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

ដូចប្រទេសអាស៊ីអាគ្នេយ៍ដទៃទៀតដែរ ប្រទេសវៀតណាមថ្មីៗនេះបានបង្ខំឲ្យបិទសាលារៀនមុនកាលកំណត់ ហើយការប្រើប្រាស់អគ្គិសនីបានកើនឡើងគួរឲ្យកត់សម្គាល់ ខណៈភាគខាងត្បូង និងភាគកណ្តាលប្រទេសទទួលឥទ្ធិពលកម្ដៅប៉ះពាល់ខ្លាំងជាងគេ ។

ត្រីទាំងអស់នៅក្នុងអាងស្តុកទឹក Song May ដែលមានទំហំ ៣០០ ហិចតាបានងាប់អណ្ដែតពេញផ្ទៃទឹក ខណៈតំបន់នេះមិនមានភ្លៀងធ្លាក់ច្រើនសប្តាហ៍មកហើយ ស្របពេលដែលទឹកនៅក្នុងអាងក៏មានកម្រិតទាបទៅទៀត ។

អាងស្តុកទឹក គឺជាប្រភពទឹកសម្រាប់ស្រោចដំណាំនៅស្រុក Trang Bom និងស្រុក Vinh Cuu នៃខេត្ត Dong Nai ខណៈពេលកន្លងមកអាងស្តុកទឹកមួយនេះក៏បានបង្ហូរចេញដើម្បីការពារដំណាំនៅខាងក្រោមទឹកផងដែរ ។

បើទោះបីជាអាជ្ញាធរព្យាយាមជួសជុលអាងនេះ ដោយបូមយកភក់ចេញដើម្បីឲ្យមានទឹកច្រើនសម្រាប់ផ្ដល់សីតុណ្ហភាពត្រជាក់ដល់ត្រីក៏ដោយ ក៏កិច្ចខិតខំប្រឹងប្រែងមិនបានសម្រេចដែរ ហើយមិនយូរប៉ុន្មានត្រីជាច្រើនក្បាលបានងាប់ ហើយតាមការប៉ាន់ស្មានអាចមានរហូតដល់ទៅ ២០០ តោនឯណោះ ។ បច្ចុប្បន្នអាជ្ញាធរកំពុងស៊ើបអង្កេតហេតុការណ៍នេះ ខណៈក៏កំពុងធ្វើការដើម្បីយកត្រីដែលងាប់នោះចេញជាបន្ទាន់ផងដែរ ។

គួរបញ្ជាក់ថា យោងតាមអ្នកព្យាករណ៍អាកាសធាតុ សីតុណ្ហភាពនៅក្នុងខេត្ត Dong បានហក់ឡើងដល់ប្រហែល ៤០ អង្សាសេក្នុងខែមេសា ដែលបំបែកកំណត់ត្រាសីតុណ្ហភាពខ្ពស់បំផុត ចាប់តាំងឆ្នាំ ១៩៩៨ មក ។ ទន្ទឹមនឹងនេះ នៅក្នុងប្រទេសថៃ ការប្រើប្រាស់អគ្គិសនីបានកើនឡើងខ្ពស់មិនធ្លាប់មាន ខណៈដែលសីតុណ្ហភាពក្នុងខេត្ត Udon Thani ភាគឦសានបានឡើងដល់ ៤៤ អង្សាសេ ៕