លោក ហ្សេលេនស្គី៖ ដើម្បីចូលណាតូបាន អ៊ុយក្រែន មានផ្លូវតែមួយគត់

តាមការចុះផ្សាយរបស់ RT នៅថ្ងៃព្រហស្បតិ៍ទី២ខែឧសភា លោក វ្ល៉ាឌីមៀរ ហ្សេលេនស្គី បានប្រកាសច្បាស់ៗថា ផ្លូវតែមួយគត់ដែលអ៊ុយក្រែន អាចចូលជាសមាជិកអង្គការណាតូបាន គឺលុះត្រាតែប្រទេសនេះ ផ្តួលរុស្ស៊ីលើសមរភូមិឲ្យបានសិន ខណៈសម្ព័ន្ធភាពដឹកនាំដោយសហរដ្ឋអាមេរិកមួយនេះ ធ្លាប់បញ្ជាក់ហើយថា ទីក្រុងកៀវ មិនអាចក្លាយជាសមាជិកខ្លួនបានឡើយ បើការប្រយុទ្ធគ្នានៅតែបន្ត។ 

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

ក្នុងអំឡុងពេលជួបប្រជុំជាមួយមន្ត្រីយោធាក្នុងទីក្រុងកៀវ លោក ហ្សេលេនស្គី អះអាងថា “ខ្ញុំ​ជឿ​ថា យើង​មិនអាចចូល​ក្នុង​អង្គការ ណាតូ បានឡើយ លុះត្រា​តែ​យើង​ឈ្នះសិន។ ខ្ញុំ​មិន​គិត​ថា គេនឹង​អនុញ្ញាតឲ្យយើង​ចូលទេ ទាំងដែលប្រទេសរបស់យើងកំពុងមានសង្គ្រាមនោះ”។

លោកថែមពន្យល់ថា ការចូលជាសមាជិក ក៏តម្រូវឲ្យមានការយល់ព្រមជាឯកច្ឆ័ន្ទ ពីសមាជិកទាំង៣២របស់សម្ព័ន្ធភាពនេះដែរ។ ម្យ៉ាងប្រទេសខ្លះស្ទាក់ស្ទើរ មិនហ៊ានទទួលស្គាល់អ៊ុយក្រែនទាំងដែលកំពុងមានជម្លោះប្រដាប់អាវុធទេ។ ហេតុផលគឺដោយសារតែ ពួកគេមានអារម្មណ៍ប្រឈមហានិភ័យ។ ដូច្នេះ ដើម្បី​ឲ្យ​អ៊ុយក្រែនចូលក្នុង​សម្ព័ន្ធភាពនេះបាន យើង​ត្រូវ​ការ​ឈ្នះរុស្ស៊ីសិន។

អ៊ុយក្រែន បានដាក់ពាក្យជាផ្លូវការ ដើម្បីចូលរួមប្លុកការពារឆ្លងមហាសមុទ្រអាត្លង់ទិកមួយនេះ ក្នុងខែកញ្ញាឆ្នាំ២០២២ ហើយពេលនោះឯង អគ្គលេខាធិការអង្គការណាតូលោក Jens Stoltenberg និងសមាជិកផ្សេងៗបានបញ្ចេញយោបល់ថា ថ្ងៃណាមួយ​ អ៊ុយក្រែនច្បាស់ ក្លាយជាផ្នែកមួយនៃអង្គការនេះជាក់ជាមិនខាន គ្រាន់តែមិនដឹងពេលណាប៉ុណ្ណោះ។

ទោះបីជាយ៉ាងណាក៏ដោយ រុស្ស៊ីមិនសប្បាយចិត្តឡើយហើយតែងតែប្រឆាំងចំពោះការប៉ុនប៉ុងចូលណាតូរបស់អ៊ុយក្រែន។ លើសពីនេះ ទីក្រុងមូស្គូ ចាត់ទុកការពង្រីករបស់ណាតូឆ្ពោះទៅព្រំដែនរបស់ខ្លួន ថាជាការគំរាមកំហែងសន្តិសុខដ៏ធំ ខណៈប្រធានាធិបតី វ្ល៉ាឌីមៀរ ពូទីន អះអាងថា មហាអំណាចលោកខាងលិចកំពុងប្រើទីក្រុងកៀវ ដើម្បីប្រឆាំងរុស្ស៊ី បន្ទាប់ពីការដួលរលំនៃសហភាពសូវៀត៕

អត្ថបទ៖ សុខ សុវណ្ណ

ចុចអាន៖ ២ប្រទេស ចេញមុខប្រឆាំងអ៊ុយក្រែនដាច់ខាត រឿងចង់ចូលណាតូ