មនុស្សរាប់ពាន់នាក់ធ្វើបាតុកម្មខ្នាតធំប្រឆាំងនាយករដ្ឋមន្ត្រី ហុងគ្រី

មនុស្សរាន់ពាន់នាក់បានធ្វើបាតុកម្មទ្រង់ទ្រាយបំផុតក្នុងប្រវត្តិសាស្រ្តរបស់ប្រទេសហុងគ្រីដើម្បីប្រឆាំងនឹងលោកនាយករដ្ឋមន្ត្រីលោក Viktor Orbán ។ នេះបើយោងតាមការចេញផ្សាយរបស់ទីភ្នាក់ងារព័ត៌មាន Reuters កាលពីថ្ងៃទី៥ ខែ ឧសភាកន្លងទៅ ។

មនុស្សប្រហែល ១០,០០០ នាក់បានប្រមូលផ្តុំគ្នានៅទីក្រុង Debrecen ដែលជាទីក្រុងធំទីពីររបស់ប្រទេសហុងគ្រី ដើម្បីគាំទ្រលោក Peter Magyar ដែលជាអ្នកនយោបាយចំណូលថ្មីដែលទើបលេចមុខមាត់ក្នុងរយៈពេលមិនដល់ ៣ ខែផង ដោយសារតែលោកមានភាពលេចធ្លោលើការសន្យាថានឹងបញ្ចប់បញ្ហាដូចជា អំពើពុករលួយ និងការធ្លាក់ចុះនៃជីវភាពរស់នៅរបស់ប្រជាជននៅប្រទេសនេះ ។

ទន្ទឹមនោះ អ្នកចូលរួមបាតុកម្មថែមទាំងបានគ្រវីទង់ជាតិហុងគ្រីដែលមានភ្ជាប់ជាមួយនឹងការសរសេរឈ្មោះទីក្រុង និងកន្លែងនានាដែលពួកគេបានធ្វើដំណើរមក ហើយវាក៏ជាបាតុកម្មទ្រង់ទ្រាយធំបំផុតមិនធ្លាប់មានពីមុនមករបស់ប្រទេសនេះ ពោលបើទោះបីជាការធ្វើបាតុកម្មរបស់គណបក្សលោក Viktor Orbán ក៏មិនមានចំនួនច្រើនបែបនេះនោះដែរ ។

គួររម្លឹកថា លោក Magyar ជាអតីតអ្នកនៅក្នុងគណបក្ស Fidesz ដែលកំពុងកាន់អំណាចរបស់ប្រទេសហុងគ្រី បានរិះគន់ចំៗលើលោក Viktor Orban ថា ប្រកាន់និយោបាយជាតិនិយម ស្របពេលដែលការស្ទង់មតិនាពេលថ្មីៗនេះបង្ហាញថា គណបក្សរបស់លោក Magyar កំពុងក្លាយជាបក្សប្រឆាំងដ៏ធំបំផុត មុនការបោះឆ្នោតខាងមុខ ៕

អត្ថបទ ៖ ប៊ុន សុភាព