អ៊ីស្រាអែល បញ្ជាឲ្យជម្លៀសមនុស្សចេញពីទីក្រុង Rafah ជាប្រញាប់

តាមសេចក្តីរាយការណ៍របស់ CNN នាថ្ងៃចន្ទទី៦ខែឧសភា, យោធាអ៊ីស្រាអែល បានចេញបញ្ជាឲ្យជនស៊ីវិលប៉ាឡេស្ទីន ចាកចេញពីភាគខាងកើតទីក្រុង Rafah ជាបន្ទាន់ មុនពេលខ្លួនបើកប្រតិបត្តិការតាមការគ្រោងទុកនៅក្នុងទីក្រុងភាគខាងត្បូងជ្រោយហ្គាហ្សាមួយនេះ។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

យោធាអ៊ីស្រាអែលនិយាយថា ពួកគេបានផ្ញើសារ​ជា​អក្សរ ចែកខិត្តប័ណ្ណ និងប្រើប្រាស់​ប្រព័ន្ធ​ផ្សព្វផ្សាយ​សង្គម ដើម្បី​ប្រាប់​ប្រជាជន​ឲ្យជម្លៀស ខណៈមនុស្សប្រហែល ១០០ ០០០នាក់ ត្រូវបានដឹកឆ្ពោះទៅកាន់ទីក្រុង Khan Younis និង Al Mawasi ដែលស្ថិតនៅក្បែរនោះ។

ត្បិតតែអន្តរជាតិបង្ហាញក្តីបារម្ភម្តងហើយម្តងទៀត ចំពោះប្រតិបត្តិការនៅ Rafah ក៏ដោយ ប៉ុន្តែនាយករដ្ឋមន្ត្រីអ៊ីស្រាអែលលោក Benjamin Netanyahu តែងតែអះអាងថា ប្រតិបត្តិការយោធានៅទីនោះ ពិតជាចាំបាច់ណាស់ ដើម្បីកម្ចាត់សកម្មប្រយុទ្ធក្រុមហាម៉ាសដែលនៅសេសសល់។

បទបញ្ជាជម្លៀសនេះទៀតសោត កើតឡើងចំពេល កិច្ចពិភាក្សាស្វែងរកបទឈប់បាញ់ ក្នុងតំបន់ហ្គាហ្សា និងការរំដោះចំណាប់ខ្មាំង នៅតែជាប់គាំង។

មូលហេតុចម្បងមួយដែលធ្វើឲ្យកិច្ចព្រមព្រៀងនេះពិបាកលេចឡើងជារូបរាងគឺថា ទាំងអ៊ីស្រាអែល និងក្រុមហាម៉ាស សុទ្ធតែមិនឯកភាពគ្នាលើលក្ខខណ្ឌរៀងៗខ្លួន។

សំណើបទឈប់បាញ់នេះ ត្រូវគេជឿថា មានពាក់ព័ន្ធនឹងការផ្អាកបាញ់រយៈពេល ៤០ថ្ងៃ ដោយអនុញ្ញាតឲ្យមានការដោះលែងចំណាប់ខ្មាំងនៅហ្គាហ្សា និងអ្នកទោសប៉ាឡេស្ទីនមួយចំនួនដែលកំពុងជាប់ឃុំក្នុងពន្ធនាគារអ៊ីស្រាអែល។

ក្រុម ហាម៉ាស និយាយថា ខ្លួនមើលឃើញមានភាពសញ្ញាវិជ្ជមានខ្លះចំពោះបទឈប់បាញ់នេះ ប៉ុន្តែចំណុចជាប់គាំងសំខាន់គឺថា ខ្លួនចង់បានកិច្ចកិច្ចព្រមព្រៀងឈប់បាញ់ជាអចិន្ត្រៃយ៍។

ក្រុមនេះក៏ទទូចចង់បានកិច្ចព្រមព្រៀងជាក់លាក់មួយឆ្ពោះទៅរកការបញ្ចប់សង្គ្រាមដែរ ប៉ុន្តែលោក Netanyahu ច្រានចោល ដោយបញ្ជាក់ ធ្វើបែបនេះ អ៊ីស្រាអែល នឹងក្លាយជាអ្នកចាញ់ដ៏អាម៉ាស។

សូមបញ្ជក់ជាថ្មី ក្រុមហាម៉ាស បានសម្រុកចូលវាយប្រហារភាគខាងត្បូងប្រទេសអ៊ីស្រាអែលកាលពី​ថ្ងៃ​ទី​៧ ខែ​តុលាឆ្នាំ២០២៣ ​ដោយសម្លាប់មនុស្សយ៉ាងតិច ១ ២០០ នាក់ និង ២៥០ នាក់​ត្រូវ​បាន​ចាប់​ជា​ចំណាប់​ខ្មាំង។

ជាការសងសឹក អ៊ីស្រាអែលក៏ផ្តើមវាយប្រហារតាមអាកាស និងជើងគោក ដោយសម្លាប់ពលរដ្ឋប៉ាឡេស្ទីន ៣៤ ៥៦៨ នាក់ ខណៈ ៧៧ ៧៦៥ នាក់ផ្សេងទៀតរងរបួស៕

អត្ថបទ៖ សុខ សុវណ្ណ

ចុចអាន៖ រុស្ស៊ី៖ អាមេរិក ចាប់ក្រុមប្រឹក្សាសន្តិសុខ UN ជាចំណាប់ខ្មាំង