លោក ពូទីន ប្រកាសធ្វើសមយុទ្ធនុយក្លេអ៊ែរ គំរាម ណាតូ

តាមការចុះផ្សាយរបស់ RT, លោកប្រធានាធិបតី វ្ល៉ាឌីមៀរ ពូទីន បានប្រកាសថា ប្រទេសរុស្ស៊ី នឹងធ្វើសមយុទ្ធយោធាដែលក៏រួមបញ្ចូលទាំងការអនុវត្តវិធីប្រើប្រាស់អាវុធនុយក្លេអ៊ែរយុទ្ធសាស្ត្រផងដែរ ដើម្បីគំរាមលោកខាងលិច ជាពិសេសអង្គការណាតូតែម្តង។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

សមយុទ្ធនេះធ្វើឡើងបន្ទាប់ពី ក្រសួងការពារជាតិរុស្ស៊ីអះអាងថា ប្រទេសលោកខាងលិចបានធ្វើរឿងបង្កហេតុ បញ្ឆេះស្ថានការណ៍ឲ្យក្តៅឆួល ម្តងហើយម្តងទៀតមិនឈប់ឈរ។

ស្របពេលជាមួយគ្នានោះដែរ ក្រសួងការពារជាតិអះអាងថា សមយុទ្ធនេះនឹងត្រូវបញ្ជាដោយលោក ពូទីន ផ្ទាល់ ហើយនឹងដាក់បញ្ចូលនូវការសាកល្បង ត្រៀមខ្លួនរបស់កងកម្លាំងនុយក្លេអ៊ែរ សម្រាប់បំពេញបេសកកម្មប្រយុទ្ធ ពេលមានសង្គ្រាមពិតកើតឡើង។

លើសពីនេះ តាមការបញ្ជាក់ពីក្រសួង សមយុទ្ធយោធានេះក៏នឹងជាប់ពាក់ព័ន្ធជាមួយ ការដាក់ពង្រាយ អាវុធនុយក្លេអ៊ែរមិនមែនយុទ្ធសាស្ត្រ ដោយមានការចូលរួមពីសំណាក់កងទ័ពជើងទឹកផងដែរ។

សមយុទ្ធនេះមានគោលបំណងធានានូវបូរណភាពទឹកដី និងអធិបតេយ្យរបស់រុស្ស៊ី ហើយដើម្បីជាការឆ្លើយតបទៅនឹងវោហាសាសន៍បង្កហេតុ និងគំរាមកំហែងដោយមន្ត្រីលោកខាងលិចមួយចំនួនប្រឆាំងប្រទេសដែលមានឃ្លាំងអាវុធនុយក្លេអ៊ែរធំបំផុតលើពិភពលោក មួយនេះ។

ទោះបីជាយ៉ាងណាក៏ដោយ រុស្ស៊ីមិនបានបញ្ជាក់កាលបរិច្ឆេទនៃសមយុទ្ធនេះទេ ខណៈមជ្ឈដ្ឋានអន្តរជាតិ កំពុងតាមដានរឿងនេះយ៉ាងយកចិត្តទុកដាក់។

សូមបញ្ជាក់ថា ក្រោយពេលលោក ពូទីន សម្រេចចិត្ត បើកការវាយលុកអ៊ុយក្រែនក្នុងឆ្នាំ២០២២, ទំនាក់ទំនងរវាងរុស្ស៊ីនិងបណ្តាប្រទេសលោកខាងលិច បានធ្លាក់ដល់ចំណុចទាបបំផុត ចាប់តាំងពីវិបត្តិមីស៊ីលគុយបាឆ្នាំ១៩៦២។

រុស្ស៊ីតែងចាត់ទុកសង្រ្គាមនេះថាជាសមរភូមិជាមួយលោកខាងលិច ព្រោះលោកពូទីន ទម្លាយថា បស្ចិមប្រទេសមិនដែលអើពើនឹងការប៉ុនប៉ងចាប់ដៃជាមិត្តភាពរបស់ទីក្រុងមូស្គូឡើយ បន្ទាប់ពីការដួលរលំសហភាពសូវៀតឆ្នាំ១៩៩១ ហើយលោកខាងលិច តែងព្យាយាមដាក់ការគ្រប់គ្រងអ៊ុយក្រែន រួមទាំងពង្រីកសម្ព័ន្ធមិត្តយោធារបស់ណាតូនៅភាគខាងកើតទៀតផង៕

អត្ថបទ៖ សុខ សុវណ្ណ

ចុចអាន៖ រុស្ស៊ី បញ្ជាក់ជាថ្មី នូវលក្ខខណ្ឌបាញ់នុយក្លេអ៊ែរ