តាំងពីចប់សង្ក្រាន្តមក ថៃ ធ្ងន់ធ្ងរខ្លាំងដោយសារកូវីដ ឯអ្នកស្លាប់ ក៏មានច្រើនទៅៗ

ចាប់តាំងពីបញ្ចប់ពិធីបុណ្យសង្ក្រាន្តមក ប្រទេសថៃ បានជួបប្រទះនូវស្ថានភាពយ៉ាងធ្ងន់ធ្ងរពាក់ព័ន្ធជំងឺកូវីដ១៩ ដោយមានអ្នកឆ្លងនិងស្លាប់ជាបន្តបន្ទាប់។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

តាមការចុះផ្សាយរបស់ Bangkok Post នៅថ្ងៃពុធទី៨ខែឧសភា, ត្រឹមមួយសប្តាហ៍ គិតចាប់ពីថ្ងៃទី២៨ខែមេសា ដល់ថ្ងៃទី៤ខែឧសភា ថៃ មានអ្នកឆ្លងកូវីដចំនួន ១ ៧៩២នាក់ ពោលជាមធ្យមឆ្លង២៥៦នាក់ក្នុងមួយថ្ងៃ ហើយអ្វីដែលគួរឲ្យព្រួយបារម្ភគឺថា ក៏មានអ្នកជំងឺ១២នាក់ផងដែរ ត្រូវបាត់បង់ជីវិត។

យ៉ាងណាក៏ដោយ បើយោងតាមទិន្នន័យពីនាយកដ្ឋានបង្ការនិងគ្រប់គ្រងជំងឺ, គិតចាប់ពីថ្ងៃទី១ខែមករា ដល់ថ្ងៃទី៤ខែឧសភា មានករណីឆ្លងសរុប ១៣ ០៥៧ករណី និងស្លាប់ ៩៣ នាក់ឯណោះខណៈអ្នកស្លាប់ គឺសុទ្ធសឹងជាក្រុមមនុស្សដែលងាយរងគ្រោះ។

ពាក់ព័ន្ធនឹងករណីឆ្លងហក់ឡើងខ្ពស់សាជាថ្មីនេះ ប្រទេសថៃ បានចង្អុលចំៗទៅមេរោគកូវីដបំប្លែងខ្លួនប្រភេទ JN.1 ដែលគេនិយាយថា មានសមត្ថភាពអាចគេចផុតពីប្រព័ន្ធភាពស៊ាំបាន។

ទោះបែបនេះក្តី ថៃ បានប្រកាសកុំឲ្យមានក្តីព្រួយបារម្ភអ្វីទាំងអស់ ព្រោះថា អ្នកដែលចាក់វ៉ាក់សាំងគ្រប់គ្រាន់ នៅតែអាចការពារខ្លួនពីមេរោគនេះបាន ទោះឆ្លងក៏មិនឈឺធ្ងន់ឬឈានដល់ស្លាប់ដែរ។

ស្របពេលជាមួយគ្នានោះដែរ បើតាមការបញ្ជាក់ពីលោក Taweechai Wisanuyothin ប្រធានការិយាល័យគ្រប់គ្រងជំងឺឆ្លងរបស់នាយកដ្ឋាននេះប្រចាំខេត្ត Nakhon Ratchasima, មូលហេតុដែលបច្ចុប្បន្ន កូវីដផ្ទុះឡើងខ្លាំងគឺបណ្តាលមកពី មនុស្សយល់ច្រឡំជំងឺនេះ ជាមួយគ្រុនផ្តាសាយធម្មតា ទើបពួកគេមិនធ្វើតេស្ត និងអនុវត្តវិធានការទប់ស្កាត់ការចម្លង៕

អត្ថបទ៖ សុខ សុវណ្ណ

ចុចអាន៖ ថៃ បន្តមានអ្នកស្លាប់ដោយសារកូវីដ ខណៈករណីឆ្លង ហក់ឡើងគួរឲ្យព្រួយបារម្ភ