ឡាវបន្តចាត់វិធានការក្ដៅតាមព្រំដែនដើម្បីទប់ស្កាត់កូវីដរលកទី ២

អាជ្ញាធរមូលដ្ឋាននៅទូទាំងប្រទេសឡាវបន្តអនុវត្តវិធានការណ៍បង្ការ និងឃ្លាំមើលយ៉ាងដិតដល់ប្រជាជនដែលចូលក្នុងប្រទេសដើម្បីការពារកុំឲ្យមានការផ្ទុះឡើងរលកទីពីរនៃជំងឺកូវីដ ១៩ ។

អគ្គនាយករងនៃនាយកដ្ឋានប្រយុទ្ធនឹងជំងឺឆ្លងនៃក្រសួងសុខាភិបាលឡាវលោក Latsamy Vongkhamsao បានប្រាប់សន្និសីទសារព័ត៌មានក្នុងទីក្រុងវៀងចន្ទន៍នៅថ្ងៃពុធនេះថា ប្រជាជនដែលចូលទៅប្រទេសឡាវជាពិសេសពលករដែលត្រូវបានបញ្ជូនត្រឡប់មកប្រទេសវិញនឹងត្រូវបញ្ជូនទៅមណ្ឌលធ្វើចត្តាឡីស័ករយៈពេល ១៤ ថ្ងៃ ហើយកម្ដៅរបស់មនុស្សម្នាក់ៗត្រូវតែពិនិត្យពេលចូលប្រទេស ។

លោកបាននិយាយថា រហូតមកដល់ពេលនេះមនុស្សសរុបចំនួន ២,៣៣៥ នាក់ត្រូវបានដាក់ឲ្យធ្វើចត្តាឡីស័កនៅមណ្ឌលស្នាក់នៅចំនួន ២៧ កន្លែងនៅទូទាំងប្រទេស ។

ទន្ទឹមនោះគណៈកម្មាធិការជាតិសម្រាប់បង្ការ និងទប់ស្កាត់ជំងឺកូវីដ ១៩ បានជំរុញឲ្យអ្នករាល់គ្នាបន្តលាងដៃជាមួយសាប៊ូ និងពាក់ម៉ាស ពេលចេញទៅខាងក្រៅផ្ទះ និងកន្លែងដែលមានមនុស្សច្រើន ហើយប្រជាជនក៏ត្រូវបន្តអនុវត្តវិធានការគម្លាតសង្គមផងដែរ ។

គួរបញ្ជាក់ថា គិតត្រឹមថ្ងៃពុធនេះប្រទេសឡាវបានបន្តធ្វើតេស្តរកជំងឺកូវីដ ១៩ លើអ្នកសង្ស័យចំនួន ១១១,៧៥៧ នាក់ ខណៈមានករណីឆ្លងចំនួន ៤៥ ករណី និងមិនមានអ្នកស្លាប់នោះទេ ហើយមានអ្នកជាសះស្បើយ ៤២ នាក់ ៕

ប្រែសម្រួលដោយ ៖ ជីវ័ន្ត

ប្រភព ៖ XINHUA

ចុចអាន ៖ ស្ងាត់ៗ ឡាវចាក់វ៉ាក់សាំងកូវីដដល់បុគ្គលិកពេទ្យជាង ៦០០ នាក់បន្ថែមទៀត