ខែមេសាឆ្នាំនេះ បំបែកកំណត់ត្រា ក្លាយជាខែមេសាក្តៅបំផុត ក្នុងប្រវត្តិសាស្រ្ត

សេវាផ្លាស់ប្តូរធាតុអាកាសរបស់សហភាពអឺរ៉ុប Copernicus (C3S) បានឲ្យដឹងថា ពិភពលោក បង្កើតប្រវត្តិសាស្រ្តថ្មីជាមួយខែមេសាដែលក្តៅបំផុតមិនធ្លាប់មានសោះក្នុងកំណត់ត្រា ហើយក្នុងមួយខែមេសានោះទៀតសោត កម្តៅបានហក់ឡើងបំបែកកំណត់ត្រាចំនួន១១លើកជាប់ៗគ្នា។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

យោងតាមសារព័ត៌មាន Daily Mail បានចុះផ្សាយនៅថ្ងៃពុធទី៨ខែឧសភាថា ខែមេសាឆ្នាំ២០២៤ គឺក្តៅជាងខែមេសាណាណាទាំងអស់ ចាប់តាំងពីកំណត់ត្រាបង្កើតឡើងក្នុងឆ្នាំ១៩៤០មក។

សីតុណ្ហភាពខ្យល់សម្រាប់ខែនេះគឺ១៥.០៣អង្សាសេ ពោលគឺលើសកម្រិតមធ្យមខែមេសាឆ្នាំ១៩៩១ដល់២០២០ ចំនួន ០.៦៧អង្សាសេ និងលើសពីកំណត់ត្រាចាស់ឆ្នាំ២០១៦ ចំនួន០.១៤អង្សាសេ។

ស្របពេលជាមួយគ្នានោះ សីតុណ្ហភាពពិភពលោកជាមធ្យម សម្រាប់រយៈពេល១២ខែចុងក្រោយនេះ គិតចាប់ពីខែឧសភាឆ្នាំ២០២៣ដល់ខែមេសាឆ្នាំ២០២៤ ក៏ឈានដល់កម្រិតខ្ពស់បំផុតជាប្រវត្តិសាស្រ្តផងដែរ ពោលគឺលើសពីឆ្នាំ១៨៥០ដល់១៩០០ ចំនួន ១.៦១អង្សាសេ។

អឺរ៉ុបគឺជាទ្វីបក្តៅខ្លាំងបំផុតនៅលើផែនដី ដោយសីតុណ្ហភាពនៅទីនោះ កើនលើសពីកម្រិតមធ្យមឆ្នាំ១៩៩០ដល់២០២០ ចំនួន១.៤៩អង្សាសេ។

ទោះបីជាយ៉ាងណាក៏ដោយ គ្មានអ្វីត្រូវសង្ស័យឡើយ គេដឹងថា កត្តាដែលរុញអាកាសធាតុពិភពលោក ឲ្យឡើងក្តៅសឹងឆេះបែបនេះ គឺបណ្តាលមកពីបាតុភូត El Nino។

សាស្រ្តាចារ្យ Carlo Buontempo នាយក C3S និយាយថា “El Nino បានឡើងដល់ចំណុចកំពូលកាលពីដើមឆ្នាំនេះ ហើយសីតុណ្ហភាពលើផ្ទៃសមុទ្រនៅតំបន់ត្រូពិកភាគខាងកើតប៉ាស៊ីហ្វិក បានឈានដល់កម្រិតខ្ពស់។ យ៉ាងណា ពេល El Nino កន្លងផុត, ពិភពលោកក៏នឹងត្រូវបន្តរងទុក្ខដោយសារអាកាសធាតុដុតរោលផងដែរ ព្រោះតែថាមពលដែលជាប់ក្នុងមហាសមុទ្រ និងបរិយាកាសបង្កើតឡើងដោយឧស្ម័នផ្ទះកញ្ចក់”។

ក្រៅពីអឺរ៉ុប តំបន់ដែលគេមើលឃើញថារងការវាយប្រហារខ្លាំងដោយរលកកម្តៅ គឺអាស៊ីអាគ្នេយ៍ ដោយសីតុណ្ហភាពនៅហ្វីលីពីន បានឡើងដល់ជាង៥០អង្សាសេ ចំណែកនៅប្រទេសកម្ពុជាវិញ អាកាសធាតុក៏ក្តៅខ្លាំងមិនធម្មតាដែរ៕

អត្ថបទ៖ សុខ សុវណ្ណ

ចុចអាន៖ ហុងកុង ជួបខែមេសាក្តៅបំផុត មិនធ្លាប់មានក្នុងប្រវត្តិសាស្រ្ត ១៤០ឆ្នាំ