អាមេរិក សាកល្បងប្រើ AI ជំនួសមន្ត្រីអន្តោរប្រវេសន៍ក្នុងការនិយាយជាមួយជនភៀសខ្លួន

នាយកដ្ឋានសន្តិសុខជាតិអាមេរិក (DHS) កំពុងសាកល្បងប្រើបច្ចេកវិទ្យា AI ដើម្បីឲ្យធ្វើជាមន្ត្រីដែលអាចពិនិត្យមើលជនភៀសខ្លួននៅសហរដ្ឋអាមេរិក ។ នេះបើយោងតាមការចេញផ្សាយរបស់សារព័ត៌មាន CNA កាលពីថ្ងៃទី៨ ខែ ឧសភាកន្លងទៅ ។

យោងតាមលោក Alejandro Mayorkas នាយកដ្ឋានសន្តិសុខជាតិអាមេរិកបានឲ្យដឹងថា ដោយសារតែការងារនេះទាមទារកម្លាំងពលកម្មខ្ពស់​ ដូចនេះ DHS កំពុងបណ្តុះបណ្តាលម៉ាស៊ីនដោយប្រើ AI ដើម្បីធ្វើការជាមួយជនភៀសខ្លួន ឲ្យដូចជាមន្រ្តីដែលអាចសម្ភាសន៍ជាមួយជនភៀសខ្លួនបាន ។

ការប្រកាសនេះបានធ្វើឡើងនៅក្នុងសន្និសិទសន្តិសុខ RSA នៅក្នុងទីក្រុង San Francisco ដែលនិយាយលម្អិតអំពីគំនិតផ្តួចផ្តើម AI ដែល DHS បានប្រកាសកាលពីដើមឆ្នាំនេះ ហើយគ្រោងនឹងបង្កើតកម្មវិធីអន្តរកម្មមួយ ដើម្បីបន្ថែមការបណ្តុះបណ្តាលមន្ត្រីអន្តោប្រវេសន៍ដែលជា AI ជំនាន់ថ្មី ។

នាយកដ្ឋានបាននិយាយថា ទីភ្នាក់ងារធ្វើសញ្ជាតិ និងអន្តោប្រវេសន៍សហរដ្ឋអាមេរិកដែលជាទីភ្នាក់ងារមួយនៅក្នុង DHS ក៏នឹងបង្កើតកម្មវិធី AI នេះផងដែរ ដើម្បីរៀបចំ និងកែសម្រួលឯកសារមួយចំនួន ខណៈ AI នឹងមិនធ្វើការសម្រេចចិត្តអំពីអន្តោប្រវេសន៍ដោយខ្លួនឯងនោះទេ ប៉ុន្តែ AI នឹងដឹងពីលក្ខខណ្ឌជាក់លាក់នៃប្រទេសរបស់ជនអន្តោរប្រវេសន៍ និងព័ត៌មានផ្សេងទៀតដើម្បីជួយមន្រ្តី ។

គួរបញ្ជាក់ថា អាមេរិកក៏មានការដាក់ពង្រាយកម្មវិធី AI ដើម្បីរកមើលភាពមិនប្រក្រតី នៅពេលដែលរថយន្តដឹកទំនិញពាណិជ្ជកម្ម និងរថយន្តដឹកអ្នកដំណើរឆ្លងកាត់ព្រំដែនផងដែរ ដើម្បីជួយនាយកដ្ឋានរកឃើញការប៉ុនប៉ងរត់ពន្ធសារធាតុ fentanyl និងរបស់ក្លែងក្លាយផ្សេងទៀតចូលទៅក្នុងសហរដ្ឋអាមេរិក ៕

អត្ថបទ ៖​ ប៊ុន សុភាព