ព័ត៌មានអន្ដរជាតិ

អាមេរិក-ហ្វីលីពីន បាញ់ពន្លិចនាវា១គ្រឿង ធ្វើជាសេណារីយ៉ូបើមានការលុកលុយពីចិន

បានផុស

១១ ខែ មុន

នៅ

ថ្ងៃព្រហស្បតិ៍ ៩ ឧសភា ២០២៤

ដោយ

Chheang

សហរដ្ឋអាមេរិក និងប្រទេសហ្វីលីពីន បានចាប់ដៃគ្នាធ្វើសមយុទ្ធនៅក្នុងដែនសមុទ្រចិនខាងត្បូង ដោយក្នុងនោះមានការបាញ់ពន្លិចនាវាចម្បាំងអស់ចំនួន១គ្រឿង។ សកម្មភាពបាញ់ពន្លិចនាវាចម្បាំង ដែលបណ្ដាលឲ្យរដ្ឋាភិបាលក្រុងប៉េកាំងនៅមិនសុខបក់មិនល្ហើយនេះ ធ្វើឡើងកាលពីថ្ងៃទី៨ ខែឧសភា ស្ថិតនៅឆ្នេរសមុទ្រទីក្រុង Laoag ខេត្ត Ilocos Norte ភាគខាងជើងប្រទេសហ្វីលីពីន។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

សមយុទ្ធនេះ មានការចូលរួមពីកងទ័ពច្រើនជាង ១៦ ០០០នាក់ មកពីសហរដ្ឋអាមេរិក និងហ្វីលីពីន ព្រមទាំងយោធាប៉ុន្មានរយនាក់ទៀតមកពីអូស្ត្រាលី បូករួមទាំងអ្នកអង្កេតការណ៍ពីប្រទេសចំនួន ១៤។ វាត្រូវគេហៅថា សមយុទ្ធ “Balikatan” ដែលប្រព្រឹត្តចាប់ពីថ្ងៃទី២២ ខែមេសា រហូតដល់ថ្ងៃទី១០ ខែឧសភា។

ការបាញ់ពន្លិចនាវា គឺជាផ្នែកមួយនៃសមយុទ្ធ ហើយធ្វើឡើងក្នុងគោលបំណងបង្កើតជាសេណារីយ៉ូ ត្រៀមទុកសម្រាប់ការឈ្លានពានពីបរទេសមកលើប្រជុំកោះហ្វីលីពីន។

សូមទស្សនាវីដេអូខាងក្រោម៖

សូមបញ្ជាក់ថា សមយុទ្ធនេះ បានឆ្លុះបញ្ជាំងពីការព្យាយាមពង្រឹងសម្ព័ន្ធសនិសញ្ញាការពារជាតិរវាងអាមេរិក និងហ្វីលីពីន ឲ្យកាន់តែខ្លាំងក្លាបន្ថែមទៀត ជុំវិញក្ដីកង្វល់នៅប៉ុន្មានឆ្នាំចុងក្រោយ ដែលចិនបានប្រើសកម្មភាពគំរាមកំហែងកាន់តែច្រើនជាងមុនក្នុងជម្លោះដែនសមុទ្រនៅតំបន់អាស៊ី។

លោក Bongbong Marcos ប្រធានាធិបតីហ្វីលីពីន បានបញ្ជាឲ្យយោធាក្នុងប្រទេស ផ្អាកប្រតិបត្តិការប្រឆាំងចលនាបះបោរក្នុងស្រុក ហើយត្រូវផ្ដោតសំខាន់លើការការពារជាតិពីខាងក្រៅវិញ ខណៈដែលសកម្មភាពក្រុងប៉េកាំងនៅក្នុងសមុទ្រចិនខាងត្បូងបានក្លាយជាក្ដីបារម្ភធំបំផុត។ ការផ្លាស់ប្ដូរយុទ្ធសាស្ត្ររបស់លោក Marcos បានបង្ហាញពីបំណងច្របាច់បញ្ចូលគ្នាជាមួយកិច្ចខំប្រឹងប្រែងរបស់អាមេរិក ដែលចង់ពង្រឹងសម្ព័ន្ធភាពក្នុងតំបន់ឥណ្ឌូ-ប៉ាស៊ីហ្វិក ទប់ទល់នឹងមហាយក្សចិន។

គោលជំហររបស់ហ្វីលីពីន បានបង្កបង្កើតជាផ្កាភ្លើង ដុតកំហឹងចិនឲ្យកាន់តែក្ដៅ ហើយចិនបានព្យាយាមធ្វើទុក្ខបុកម្នេញជាច្រើនដាក់ហ្វីលីពីនវិញ ដូចជា ការបាញ់កាំភ្លើងទឹកសម្ពាធខ្លាំង និងឡាស៊ែរយោធាដាក់នាវាហ្វីលីពីន ការបិទចរាចរណ៍ផ្លូវទឹក និងការធ្វើសមយុទ្ធទ្រង់ទ្រាយធំជាច្រើនលើក ក្បែរតំបន់ជម្លោះដែនសមុទ្រហ្វីលីពីន-ចិន៕

ដោយ៖ ឈាង