អ៊ីស្រាអែល ទម្លាក់គ្រាប់បែកចាស់ដៃ លើទីក្រុង Rafah មិនខ្វល់សម្តីអាមេរិក

ជាបរាជ័យមួយទៀត ដែលភាគីជម្លោះអ៊ីស្រាអែលនិងហាម៉ាស មិនអាចធ្វើឲ្យបទឈប់បាញ់លេចចេញជារូបរាងបាន ខណៈកងទ័ពរបស់លោក Benjamin Netanyahu កំពុងតែវាយសន្ធាប់យ៉ាងខ្លាំងក្លានៅទីក្រុង Rafah មិនខ្វល់សម្តីអាមេរិក។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

ទោះសម្ព័ន្ធមិត្តអាមេរិក ព្រមានម្តងហើយម្តងទៀត កុំឲ្យអ៊ីស្រាអែល វាយលុកចូលទីក្រុងស្ថិតនៅភាគខាងត្បូងជ្រោយហ្គាហ្សានេះក៏ដោយ តែលោក Netanyahu ធ្វើមិនដឹង ហើយចេញបញ្ជាដាច់ណាត់ ឲ្យបើកប្រតិបត្តិការនៅទីនោះ ទាល់តែបាន។

តាមសេចក្តីរាយការណ៍របស់ Reuters កាលពីថ្ងៃព្រហស្បតិ៍ទី៩ខែឧសភា, ទ័ពអ៊ីស្រាអែល បានបើកប្រតិបត្តិការទម្លាក់គ្រាប់បែកទ្រង់ទ្រាយធំលើទីក្រុង Rafah ដោយបណ្តាលឲ្យជនស៊ីវិលស្លូតត្រង់ជាច្រើនស្លាប់និងរបួស។

ការវាយប្រហារអាកាសនៅសង្កាត់ Sabra បានសម្លាប់មនុស្សចំនួន១២នាក់ រួមមានទាំងស្រ្តីនិងកុមារផងដែរ។ យ៉ាងណា ក្នុងចំណោមនោះ គេដឹងថា មានមេបញ្ជាការជាន់ខ្ពស់នៃកងពលតូចសកម្មប្រយុទ្ធ Al-Mujahedeen និងក្រុមគ្រួសាររបស់គាត់ ព្រមទាំងក្រុមគ្រួសាររបស់មេដឹកនាំក្រុមមួយផ្សេងទៀត។

ពាក់ព័ន្ធការសម្រេចចិត្តបើកប្រតិបត្តិការវាយលុកនៅ Rafah នេះដែរ ត្រូវបានអ៊ីស្រាអែលអះអាងថា គឺដោយសារសកម្មប្រយុទ្ធហាម៉ាស កំពុងសំងំលាក់ខ្លួននៅក្នុងទីក្រុងនេះ ទោះទីនោះក៏មានជនភៀសសឹកហ្គាហ្សារាប់ម៉ឺននាក់ កំពុងស្នាក់អាស្រ័យក៏ដោយ។

ការវាយប្រហារនេះទៀតសោត កើតឡើងចំពេល កិច្ចពិភាក្សាចុងក្រោយបំផុតក្នុងទីក្រុងគែរ ប្រទេសអេហ្ស៊ីប ដើម្បីបញ្ឈប់អរិភាពនៅតំបន់ហ្គាហ្សា ត្រូវជាប់គាំង ដោយសារភាគីជម្លោះមិនឯកភាពគ្នាលើលក្ខខណ្ឌរៀងៗខ្លួន ពោលគឺអ៊ីស្រាអែល បដិសេធសំណើបញ្ចប់សង្គ្រាម ចំណែកក្រុមហាម៉ាស ថា ខ្លួនមិនទទួលបានសម្បទានគ្រប់គ្រាន់ឡើយ។

សូមជម្រាបថា តាមការបញ្ជាក់ពីក្រសួង​សុខាភិបាល​ហ្គាហ្សា​, គិតត្រឹមពេលនេះ ប្រតិបត្តិការ​របស់​អ៊ីស្រាអែល បាន​សម្លាប់​ប្រជាជន​ប៉ាឡេស្ទីន​ជិត ៣៥ ០០០ នាក់ និង​របួស​ជិត ៨ ម៉ឺន​នាក់ ភាគ​ច្រើន​ជា​ជនស៊ីវិលស្លូតត្រង់។

នេះគឺដើម្បីសងសឹកទៅនឹងការវាយប្រហារឆ្លងដែនរបស់ក្រុមសកម្មប្រយុទ្ធហាម៉ាស លើប្រទេសអ៊ីស្រាអែលនៅថ្ងៃទី៧ខែតុលា ដែលពេលនោះបានផ្តាច់ជីវិតមនុស្សប្រហែល ១ ២០០ នាក់ និងចាប់ពង្រត់ ២៥២នាក់ទៀត៕

អត្ថបទ៖ សុខ សុវណ្ណ

ចុចអាន៖ ក្រោយប្រកាសលែងហុចគ្រាប់ ពេលនេះ អាមេរិក ព្រមានឈប់ផ្តល់អាវុធឲ្យអ៊ីស្រាអែល តែម្តង