ព័ត៌មានអន្ដរជាតិ

នាយករដ្ឋមន្ត្រី កាតា លក់វិមានដ៏ស្កឹមស្កៃតម្លៃ ៤៩ លានដុល្លារនៅក្រុងឡុងដ៍ ឲ្យសែរាជវង្សដូចគ្នា

បានផុស

១០ ខែ មុន

នៅ

ថ្ងៃសៅរ៍ ១១ ឧសភា ២០២៤

ដោយ

នាយករដ្ឋមន្ត្រីកាតានិងជាព្រះអង្គម្ចាស់ Sheikh Mohammed bin Abdulrahman Al Thani បានលក់វិមានដ៏ស្កឹមស្កៃរបស់ទ្រង់ផ្ទាល់នៅ Mayfair នៃក្រុងឡុងដ៍ ទៅឲ្យសមាជិកម្នាក់ទៀត នៃគ្រួសាររាជវង្សរបស់រដ្ឋក្នុងតម្លៃ ៣៩លានផោន (៤៨.៧លានដុល្លារអាមេរិក) ។

កាសែតរដ្ឋរបស់ UAE ជាតិបានរាយការណ៍ដែរថា អចលនទ្រព្យនេះគឺជាអគារដែលបានចុះបញ្ជីថ្នាក់ទី ២ ស្ថិតនៅចន្លោះ Hyde Park និង Berkeley Square ហើយវិមាននេះក៏ត្រូវបានទិញដោយផ្ទាល់ពីព្រះអង្គម្ចាស់ Sheikh Mohammed ក្នុងឆ្នាំ ២០២១ ក្នុងតម្លៃជិត ៤៥ លានផោនឯណោះ។

**នាយករដ្ឋមន្ត្រីកាតា Sheikh Mohammed bin Abdulrahman Al Thani**

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

បើយោងតាមក្រុមហ៊ុនប្រឹក្សាអចលនទ្រព្យ Bidwells ដែលមានមូលដ្ឋាននៅចក្រភពអង់គ្លេស បានគូសបញ្ចាក់ថាអគារដែលបានចុះបញ្ជីថ្នាក់ទី២ គឺជាអគារដែលត្រូវបានគេចាត់ទុកថាមានការចាប់អារម្មណ៍ពិសេស ដោយធានានូវកិច្ចខិតខំប្រឹងប្រែងក្នុងការរក្សាទុកអស់រយៈកាលដ៏យូរណាស់មកហើយ។

ថ្វីបើយ៉ាងណា នាយករដ្ឋមន្ត្រីកាតារូបនេះបានបញ្ចប់ការលក់របស់ទ្រង់ កាលពីខែតុលាឆ្នាំមុន តាមរយៈការចរចាដោយផ្ទាល់ជាមួយរាជវង្សរបស់ទ្រង់ ដែលជាការអនុវត្តទូទៅក្នុងចំណោមគ្រួសារដែលមានទ្រព្យសម្បត្តិច្រើន ដើម្បីគេចចេញពីថ្លៃភ្នាក់ងារ ឬកាត់បន្ថយបំណុលពន្ធមរតកដែលមានសក្តានុពលក្នុងប្រទេសកាតា។

ព្រះអង្គម្ចាស់ Sheikh Mohammed បានក្លាយជានាយករដ្ឋមន្ត្រីរបស់ប្រទេសកាតាកាលពីឆ្នាំមុន ហើយថែមទាំងបានបម្រើការជារដ្ឋមន្ត្រីក្រសួងការបរទេសរបស់រដ្ឋចាប់តាំងពីឆ្នាំ ២០១៦ មកម៉្លេះ។ ទ្រង់គឺជាសមាជិកនៃ House of Thani ដែលជាគ្រួសាររាជវង្សរបស់ប្រទេសកាតា ទ្រព្យសម្បត្តិរបស់ទ្រង់មានតម្លៃយ៉ាងហោចណាស់ ១៥០ ពាន់លានដុល្លារ ដូចដែលបានប៉ាន់ស្មានដោយ Bloomberg Billionaires Index កាលពេលកន្លងមក។

ទន្ទឹមនោះទៀតសោត ការលក់វិមានរបស់នាយករដ្ឋមន្ត្រីកាតានិងជាព្រះអង្គម្ចាស់រូបនេះ បានលេចចេញជាប្រតិបត្តិការអចលនទ្រព្យមួយក្នុងចំណោមប្រតិបត្តិការអចលនទ្រព្យមួយចំនួនក្នុងទីក្រុងឡុងដ៍ដែលមានតម្លៃជាង ៣០ លានផោន។ កាលពីខែវិច្ឆិកាឆ្នាំមុន ប្រធានាធិបតីអារ៉ាប់រួម Sheikh Mohammed bin Zayed Al Nahyan ដែលជារាជវង្ស Emirati បានទិញវិមានមួយនៅតំបន់ Chelsea ក្នុងទីក្រុងនេះក្នុងតម្លៃ ៦៥ លានផោនផងដែរ៕