វៀតណាម បង្ហាញមហិច្ឆិតាធំ ចង់មានមហាសេដ្ឋី ១០ រូបទៀត លេចមុខត្រឹមឆ្នាំ ២០៣០

នៅឆ្នាំ២០៣០ សហគ្រិនវៀតណាមយ៉ាងតិចចំនួន១០ នាក់​ គ្រោងនឹងបញ្ចូលទៅក្នុងបញ្ជីមហាសេដ្ឋីប្រាក់ដុល្លារអាមេរិកជាសកល ដោយ ៥ នាក់ក្នុងចំណោមពួកគេ ​ត្រូវបានទទួលស្គាល់ថាជាអ្នកមានឥទ្ធិពលបំផុតនៅអាស៊ីដោយស្ថាប័នអន្តរជាតិល្បីឈ្មោះ នេះបើយោងតាមសេចក្តីសម្រេចចិត្តរបស់រដ្ឋាភិបាល ដែលបានចេញផ្សាយកាលពីថ្ងៃព្រហស្បតិ៍កន្លងទៅ។

យោងតាមតាមបញ្ជី Forbes ឆ្នាំ ២០២៤ នៃអ្នកដែលមានជាងគេបំផុតនៅលើពិភពលោកដែលបានចេញផ្សាយកាលពីខែមុនបានដាក់មហាសេដ្ឋីចំនួនប្រាំមួយរូបរបស់ប្រទេសវៀតណាម ក្នុងចំណោមបុគ្គលដែលមានជាងគេបំផុតចំនួន ២,៧៨១ ទូទាំងពិភពលោក។

ដោយឡែក អ្នកនាំមុខមហាសេដ្ឋីវៀតណាមទាំង៦រូបក្នុងប្រទេសវិញ គឺលោក Pham Nhat Vuong ប្រធានក្រុមហ៊ុន Vingroup ដែលជាក្រុមហ៊ុនចម្រុះ មានទ្រព្យសម្បត្តិសុទ្ធចំនួន ៤.៤ ពាន់លានដុល្លារ។ នាយកប្រតិបត្តិក្រុមហ៊ុនអាកាសចរណ៍ VietJet Air និងជាអនុប្រធាន HDBank លោកស្រី Nguyen Thi Phuong Thao, ប្រធានក្រុមហ៊ុនផលិតដែក Hoa Phat លោក Tran Dinh Long, ប្រធាន Techcombank លោក Ho Hung Anh, ប្រធានក្រុមហ៊ុនផលិតរថយន្ត Thaco លោក Tran Ba Duong & family និងជាប្រធានក្រុមហ៊ុនលក់រាយ Masan លោក Nguyen Dang Quang ។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

លើសពីនេះទៀតដែរ វៀតណាមក៏សង្ឃឹមថា នឹងមានសហគ្រាសយ៉ាងតិចពីរលាននៅឆ្នាំ ២០៣០ រួមទាំងក្រុមសេដ្ឋកិច្ចដែលមានសមត្ថភាពហិរញ្ញវត្ថុខ្ពស់ និងការប្រកួតប្រជែងខ្លាំងនៅក្នុងទីផ្សារក្នុងស្រុក និងអន្តរជាតិ ដើម្បីដឹកនាំវិស័យសំខាន់ៗនៃសេដ្ឋកិច្ចជាតិ។ សហគ្រាសទាំងនេះត្រូវបានគេរំពឹងថានឹងរួមចំណែក ៦៥-៧០ ភាគរយនៃផលិតផលក្នុងស្រុកសរុបរបស់ប្រទេស ៣២-៣៨ ភាគរយនៃចំនួនការងារសរុប និង ៩៨-៩៩ ភាគរយនៃចំណូលពីការនាំចូល-នាំចេញសរុប។ វៀតណាមក៏មានបំណងចង់ឲ្យអាជីវកម្មប្រហែល ២០-២៥ ភាគរយជាកម្មសិទ្ធិរបស់ស្ត្រីដោយ ៣០-៣៥ភាគរយ មាននាយក ឬអ្នកដឹកនាំជាស្ត្រីផងដែរ។

សេចក្តីសម្រេចបានចែងថា ចំនួនក្រុមហ៊ុនដែលបានចុះបញ្ជីក្នុងចំណោមក្រុមហ៊ុនដែលមានតម្លៃម៉ាកយីហោខ្ពស់បំផុតដោយស្ថាប័នចំណាត់ថ្នាក់ដ៏មានកិត្យានុភាពនៅលើពិភពលោកនឹងកើនឡើង ១០ ភាគរយជារៀងរាល់ឆ្នាំ។​ នៅឆ្នាំ២០៤៥ វៀតណាមមានបំណងចង់មានក្រុមដែលមានសមត្ថភាពឈានមុខគេក្នុងខ្សែសង្វាក់តម្លៃ បន្ទាប់មកបង្កើតខ្សែសង្វាក់តម្លៃវៀតណាមក្នុងវិស័យដែលប្រទេសមានចំណុចខ្លាំង។

ទន្ទឹមនោះដែរ ប្រទេសនៅអាស៊ីអាគ្នេយ៍មួយនេះសង្ឃឹមថា​ នឹងអភិវឌ្ឍសហគ្រិនវៀតណាមប្រកបដោយសមត្ថភាព និងគុណវុឌ្ឍិដែលឆ្លើយតបនឹងគោលដៅអភិវឌ្ឍន៍ជាតិ។ ជាពិសសដើម្បីសម្រេចបាននូវគោលដៅទាំងនេះ រដ្ឋាភិបាលបានតម្រូវឲ្យក្រសួង ស្ថាប័ន មូលដ្ឋាន សភាពាណិជ្ជកម្ម និងឧស្សាហកម្មវៀតណាម សមាគមសហគ្រាសធុនតូច និងមធ្យមវៀតណាម និងសមាគមធុរកិច្ច ផ្តោតលើការលើកកម្ពស់ការយល់ដឹងអំពីជំហរ និងតួនាទីរបស់ពាណិជ្ជករក្នុងការទទួលបានរបស់ប្រទេស។ គោលដៅអភិវឌ្ឍន៍ និងការកែលម្អគោលនយោបាយ និងច្បាប់ ដើម្បីបង្កើតបរិយាកាសវិនិយោគ និងអាជីវកម្មអំណោយផល និងស្មើភាពសម្រាប់សហគ្រិន និងសហគ្រាស៕

អត្ថបទ៖ សាង ស្រីល័ក្ខ

ចុចអាន៖នាយករដ្ឋមន្ត្រី កាតា លក់វិមានដ៏ស្កឹមស្កៃតម្លៃ ៤៩ លានដុល្លារនៅក្រុងឡុងដ៍ ឲ្យសែរាជវង្សដូចគ្នា