ភ្ញាក់ផ្អើល ពេលដឹងតួលេខមនុស្សស្លាប់ដោយសារជំងឺមហារីក នៅវៀតណាម មួយឆ្នាំៗ

តួលេខដ៏ភ្ញាក់ផ្អើលដែលបញ្ចេញក្នុងសន្និសីទវិទ្យាសាស្ត្របច្ចេកទេស ធ្វើឡើងនៅមន្ទីរពេទ្យជំងឺមហារីកក្នុងទីក្រុងហូជីមិញ កាលពីថ្ងៃសុក្រទី១០ខែឧសភា បានបង្ហាញថា មួយឆ្នាំៗ ប្រទេសវៀតណាម មានមនុស្សស្លាប់ដោយសារជំងឺមហារីកជាង ១២០ ០០០ នាក់។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

តាមសេចក្តីរាយការណ៍របស់ Tuoi Tre, មានអ្នកជំងឺពី ៥០ទៅ៨០%ទៅហើយ ដែលទៅមន្ទីរពេទ្យ ត្រូវបានធ្វើរោគវិនិច្ឆ័យថា មានជំងឺមហារីកដំណាក់កាលទីបីឬទីបួន។

វេជ្ជបណ្ឌិត Diep Bao Tuan អ្នកជំនាញផ្នែកមហារីក បាននិយាយនៅក្នុងសន្និសីទនេះថា ករណីមហារីក និងការស្លាប់កំពុងកើនឡើងក្នុងកម្រិតគួរឲ្យព្រួយបារម្ភ។ ជំងឺមហារីក ​បាន​ក្លាយ​ជា​បន្ទុក​ដល់ក្រុម​គ្រួសារនានា និង​សង្គម​ក្នុង​ពិភព​លោក ជាពិសេសប្រទេសវៀតណាម នេះតែម្តង។

យោងតាមស្ថិតិជំងឺមហារីកសកលឆ្នាំ២០២២ ចេញផ្សាយដោយអង្គការឃ្លាំមើលជំងឺមហារីកសកល, គិតត្រឹមដើមខែមីនាឆ្នាំនេះ ជំងឺមហារីកថ្មីចំនួន ១៩.៩លានករណី ត្រូវបានរកឃើញនៅទូទាំងពិភពលោក។ លើសពីនេះ ពិភពលោកក៏មានមនុស្សស្លាប់ដោយសារជំងឺមហារីកចំនួន ៩.៧ លាននាក់ក្នុងឆ្នាំ២០២២ផងដែរ។

ស្ថិតិ​ថែមទាំង​បង្ហាញទៀត​ថា ប្រទេស​វៀតណាម រកឃើញ​អ្នក​កើតជំងឺ​មហារីក​ថ្មី​ជិត ១៨០ ៤០០ នាក់ និង​ស្លាប់ជាង ១២០ ០០០ នាក់។

យោងតាមតួលេខនេះ វៀតណាម បានជាប់ឈ្មោះជាប្រទេសមួយ ក្នុងចំណោមប្រទេសដែលរងគ្រោះធ្ងន់ធ្ងរដោយបន្ទុកមហារីក ដែលកំពុងកើនឡើងជាសកល។

អ្នកជំនាញលាតត្រដាងថា កត្តាដែលជំរុញឲ្យវៀតណាម មានមនុស្សស្លាប់ដោយសារជំងឺមហារីកច្រើនបែបនេះ គឺព្រោះតែអ្នកជំងឺមិនទៅពិនិត្យឲ្យទាន់ពេល ទម្រាំតែទៅជួបគ្រូពេទ្យគឺហួសពេលទៅហើយ៕

អត្ថបទ៖ សុខ សុវណ្ណ

ចុចអាន៖ ៣ឆ្នាំទៀត វ៉ាក់សាំងមហារីករបស់រុស្ស៊ី នឹងមានលក់លើទីផ្សារ