កើតបាតុភូតចម្លែក លើផ្ទៃមេឃទីក្រុង ហូជីមិញ

អ្នកក្រុងហូជីមិញ នាំគ្នាចេញក្រៅផ្ទះមកទស្សនា និងអ្នកខ្លះទាញទូរស័ព្ទថតទិដ្ឋភាពពពកពណ៌ដូច​ឥន្ទធនូដ៏ចម្លែក ដែលបង្ហាញខ្លួនលើផ្ទៃមេឃ កាលពីរសៀលថ្ងៃអាទិត្យទី១២ខែឧសភា។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

តាមការចុះផ្សាយរបស់ VN Express, បាតុភូតនេះកើតឡើងនៅប្រហែលម៉ោង ៤រសៀល លើផ្ទៃមេឃភាគខាងលិចទីក្រុងហូជីមិញ ហើយវាបង្ហាញខ្លួនរយៈពេលជាង ១ម៉ោង មុនពេលព្រះអាទិត្យអស្ដង្គត។

យោងតាមលោក Le Dinh Quyet ប្រធាននាយកដ្ឋានព្យាករឧតុនិយម នៃស្ថានីយជលសាស្ត្រភាគខាងត្បូង បានឲ្យដឹងថា ពពកមានប្រាំពណ៌នេះ បើតាមបាតុភូតឧតុនិយមគេហៅថា ​Halos។ វាកើតឡើង នៅពេលចលនាភាគល្អិតពពកឬគ្រីស្តាល់ទឹកកក បុកគ្នាបំបែកចេញជាពន្លឺ។

លើសពីនេះទៀត មនុស្សអាចឃើញពពកបែបនេះនៅតាមទីតាំងជាច្រើន មិនដូចឥន្ទធនូដែលជាធម្មតាលេចឡើងតែនៅពេលឈប់ភ្លៀងនោះទេ។

ទោះបីជាយ៉ាងណាក៏ដោយ លោក Quyet បញ្ជាក់ថា “នេះគ្រាន់តែជាបាតុភូតឧតុនិយមធម្មតាប៉ុណ្ណោះ មិនមែនជាសញ្ញាឲ្យហេតុ ឬបម្រែបម្រួលអាកាសធាតុនាពេលខាងមុខអ្វីទេ”។

ស្របពេលជាមួយគ្នានោះដែរ លោកបានប្រាប់ទៅប្រជាជន កុំឲ្យមានក្តីបារម្ភ ទាក់ទិននឹងបាតុភូតដ៏ចម្លែកនេះអី។

សូមបញ្ជាក់ថា នេះមិនមែនទើបលើកដំបូងឡើយដែលទីក្រុងហូជីមិញ ជួបពពកពណ៌ដូច​ឥន្ទធនូ ពោលកាលពីខែកក្កដាឆ្នាំ២០២៣ បាតុភូតដ៏ចម្លែកបែបនេះក៏ធ្លាប់កើតឡើងដែរ៕

អត្ថបទ៖ សុខ សុវណ្ណ

ចុចអាន៖ ទីក្រុងហូជីមិញ កំពុងរងការវាយប្រហារដោយកាំរស្មី UV ខ្លាំងក្លា