ព័ត៌មានអន្ដរជាតិ

កូរ៉េខាងត្បូង៖ ក្រុងព្យុងយ៉ាង លួចដឹកអាវុធជាង ៦ពាន់កុងតឺន័រ ឲ្យទៅរុស្ស៊ី

បានផុស

៨ ខែ មុន

នៅ

ថ្ងៃចន្ទ ១៣ ឧសភា ២០២៤

ដោយ

Chheang

បើតាមរដ្ឋាភិបាលកូរ៉េខាងត្បូង បានប៉ាន់ស្មានថា សព្វាវុធដែលរដ្ឋាភិបាលលោក គីម ជុងអ៊ុន ផ្ដល់ឲ្យទៅប្រទេសរុស្ស៊ី មានចំនួនប្រហែល ៦ ៧០០កុងតឺន័រ គិតចាប់តាំងពីខែកញ្ញា ឆ្នាំ២០២៣។ នេះបើយោងតាមការចុះផ្សាយរបស់ទីភ្នាក់ព័ត៌មាន Yonhap នៅកូរ៉េខាងត្បូង កាលពីថ្ងៃទី១២ ខែឧសភា។

លោក វ្ល៉ាឌឺមៀ ពូទីន និងលោក គីម ជុងអ៊ុន (រូបភាព៖ AFP)

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

លោក Shin Won-sik បានប្រាប់ថា ការលួចដឹកអាវុធរវាងកូរ៉េខាងជើង និងរុស្ស៊ី បានធ្វើឡើងក្រោយពីជំនួបទស្សនកិច្ចរវាងរដ្ឋាភិបាលទាំង២ កាលពីខែកញ្ញាកន្លងទៅ។ លោករដ្ឋមន្ត្រីក្រសួងការពារជាតិកូរ៉េខាងត្បូង បានបន្តទៀតថា នៅក្នុងការដឹកជញ្ជួននោះ អាចមានគ្រាប់កាំភ្លើងធំប្រវែង១៥២មិល្លីម៉ែត្រចំនួន៣លានគ្រាប់ ឬក៏ជាគ្រាប់កាំភ្លើងធំប្រវែង១២២មិល្លីម៉ែត្រចំនួន ៥០ម៉ឺនគ្រាប់។

ទីភ្នាក់ងារស៊ើបការណ៍សម្ងាត់ជាតិកូរ៉េខាងត្បូង (NIS) បាននិយាយថា ក៏មានការសង្ស័យទៅលើអាវុធកូរ៉េខាងជើងដែលឲ្យរុស្ស៊ី គឺជាប្រភេទគ្រាប់ផលិតក្នុងអំឡុងទសវត្សឆ្នាំ១៩៧០ ដោយហេតុថា គ្រាប់ទាំងនោះក៏ត្រូវបានរកឃើញនៅក្នុងសង្គ្រាមលុកលុយអ៊ុយក្រែននាពេលកន្លងមកដែរ។ NIS បានបន្តថា ខ្លួនកំពុងវិភាគទៅលើកាលៈទេសៈពាក់ព័ន្ធឲ្យបានលម្អិតបន្ថែម ហើយបន្តស៊ើបពីទំនាក់ទំនងយោធារវាងកូរ៉េខាងជើង និងរុស្ស៊ី។

សូមរំឭកឡើងវិញថា រុស្ស៊ីបានពង្រឹងចំណងសម័ន្ធមិត្តបន្ថែមទៀតជាមួយកូរ៉េខាងជើង ចាប់តាំងពីការបើកការវាយប្រហារទ្រង់ទ្រាយធំនៅអ៊ុយក្រែនក្នុងឆ្នាំ២០២២។ ស្ថាប័នអន្តរជាតិ បានជឿជាក់ថា រដ្ឋាភិបាលក្រុងព្យុងយ៉ាងរបស់លោក គីម ជុងអ៊ុន បានលួចផ្គត់ផ្គង់អាវុធជាច្រើនឲ្យទៅលោក វ៉្លាឌឺមៀ ពូទីន មេដឹកនាំរុស្ស៊ី ដែលក្នុងនោះមានដូចជា កាំំភ្លើង និងគ្រាប់មីស៊ីលបាលិស្ទិក ជាដើម ក្នុងការវាយប្រហារអ៊ុយក្រែន។

សហរដ្ឋអាមេរិក បានធ្វើការព្រមានថា ការគំរាមកំហែងសន្តិសុខពិភពលោករបស់កូរ៉េខាងជើង អាចនឹងផ្លាស់ប្ដូរទៅជាអាក្រក់ជាងនេះទៅទៀត ក្នុងរយៈពេល១ទសវត្សទៅមុខ ដោយនេះក៏ព្រោះតែទំនាក់ទំនងកាន់តែជិតស្និទ្ធជាមួយប្រទេសរុស្ស៊ី៕

ដោយ៖ ឈាង