កូរ៉េខាងជើង ថ្កោលទោសការអនុវត្តទណ្ឌកម្មរបស់សមាជិក UN ថាជា ការបង្កហេតុ​

កូរ៉េខាងជើងបានថ្កោលទោសកិច្ចខិតខំប្រឹងប្រែងរបស់សហគមន៍អន្តរជាតិដើម្បីអនុវត្តដំណោះស្រាយដាក់ទណ្ឌកម្មរបស់ក្រុមប្រឹក្សាសន្តិសុខអង្គការសហប្រជាជាតិ (UNSC) ប្រឆាំងនឹងរដ្ឋាភិបាលទីក្រុងព្យុងយ៉ាងថាជា ការបង្កហេតុនាំឲ្យមានភាពតានតឹង និងអស្ថិរភាពនៅក្នុងតំបន់ ។ នេះបើយោងតាមការចេញផ្សាយរបស់ទីភ្នាក់ងារព័ត៌មាន Yonhab កាលពីថ្ងៃទី១២ ខែឧសភាកន្លងទៅ ។

ក្រសួងការបរទេសកូរ៉េខាងជើងបានអះអាងថា ប្រទេសនានារួមទាំងអូស្ត្រាលី អង់គ្លេស កាណាដា បារាំង អាល្លឺម៉ង់ និងនូវែលសេឡង់ បានដាក់ពង្រាយនាវាចម្បាំង និងយន្តហោះចម្បាំងទៅកាន់តំបន់អាស៊ីប៉ាស៊ីហ្វិក ក្រោមលេសនៃការត្រួតពិនិត្យដំណោះស្រាយទណ្ឌកម្មរបស់ UNSC ។

ជាមួយគ្នានេះក្រសួងការបរទេសកូរ៉េខាងជើង បានសម្តែងនូវការព្រួយបារម្ភយ៉ាងខ្លាំងចំពោះអាកប្បកិរិយាមិនទទួលខុសត្រូវរបស់ប្រទេសមួយចំនួនដែលទាញយកផលប្រយោជន៍ពីគោលនយោបាយអរិភាពរបស់សហរដ្ឋអាមេរិក និងយុទ្ធសាស្រ្តអនុត្តរភាពប្រឆាំងនឹងកូរ៉េខាងជើង ហើយជំរុញឲ្យប្រទេសទាំងនោះបញ្ឈប់ការបង្កហេតុជាបន្ទាន់ ។

គួរបញ្ជាក់ថា កូរ៉េខាងជើងហាក់ដូចជាចង្អុលទៅការល្បាតដែនសមុទ្ររួមគ្នា ដែលកូរ៉េខាងត្បូង និងអង់គ្លេសបានអនុវត្តនៅក្នុងដែនទឹកក្បែរឧបទ្វីបកូរ៉េកាលពីខែមេសា ដើម្បីអនុវត្តដំណោះស្រាយទណ្ឌកម្មរបស់ UNSC ប្រឆាំងនឹងកូរ៉េខាងជើង ។ ទន្ទឹមនោះកូរ៉េខាងជើងក៏បានព្រមានចាត់វិធានការចាំបាច់ដើម្បីការពារអធិបតេយ្យភាព និងសន្តិសុខរបស់ខ្លួនប្រឆាំងនឹងទង្វើនេះផងដែរ ៕

អត្ថបទ ៖ ប៊ុន សុភាព