ឥណ្ឌូណេស៊ី រងទុក្ខដោយសារផ្ទុះភ្នំភ្លើង មួយទៀត

តាមសេចក្តីរាយការណ៍របស់ CNA នៅថ្ងៃចន្ទទី១៣ខែឧសភា ឥណ្ឌូណេស៊ី កំពុងរងគ្រោះដោយការផ្ទុះភ្នំភ្លើងមួយទៀត ស្របពេលដែលខ្លួនកំពុងជួបប្រទះ​​គ្រោះ​ទឹក​ជំនន់ និង​ការ​ហូរ​ធ្លាក់​​ភក់​នៃ​​កម្អែភ្នំភ្លើង​ សម្លាប់មនុស្ស​ចំនួន ៣៧​នាក់ នៅ​ភាគ​ខាង​ជើងប្រទេស។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

ភ្នំភ្លើង Ibu ស្ថិតលើកោះ Halmahera ក្នុងខេត្ត North Maluku បានផ្ទុះឡើងនៅថ្ងៃចន្ទទី១៣ខែឧសភា ដោយបាញ់ផេះឡើងទៅលើមេឃកម្ពស់ជាង៥គីឡូម៉ែត្រ ខណៈហេតុការណ៍នេះ កើតឡើងមួយសប្តាហ៍បន្ទាប់ពីអាជ្ញាធរ ដំឡើងកម្រិតប្រកាសអាសន្នដល់កម្រិតខ្ពស់បំផុត លំដាប់ទីពីរ។

ទោះបីជាយ៉ាងណាក៏ដោយ ភ្លាមៗ មិនទាន់មានសេចក្តីរាយការណ៍អំពីតួលេខមនុស្សស្លាប់ និងរបួស ឬទំហំនៃការខូចខាតទេ។

ស្របពេលជាមួយគ្នានោះដែរ តាមការបញ្ជាក់ពីអាជ្ញាធរ, នេះគឺជាការផ្ទុះដ៏ខ្លាំងបំផុតមួយ ​ដែលគេមិនធ្លាប់ជួបប្រទះសោះ ក្នុងរយៈពេលប៉ុន្មានខែមកនេះ ហើយបានណែនាំដល់ប្រជាពលរដ្ឋ ឲ្យពាក់ម៉ាសនិងអនុវត្តវិធានការការពារខ្លួន ចៀសវាងមានគ្រោះថ្នាក់ជាយថាហេតុ។

សូមបញ្ជាក់ ឥណ្ឌូណេស៊ី ជាប្រទេសប្រជុំកោះដ៏ធំ ហើយតែងជួបប្រទះការរញ្ជួយដី និងមានសកម្មភាពភ្នំភ្លើងញឹកញាប់ ព្រោះតែទីតាំងរបស់ខ្លួន ស្ថិតនៅលើតំបន់ខ្សែក្រវាត់ភ្នំភ្លើងប៉ាស៊ីហ្វិក “Ring of Fire”។

ចំណែក Ibu គឺជាភ្នំភ្លើងសកម្មបំផុតមួយរបស់ប្រទេសនេះ ដែលបានផ្ទុះជាង ២១ ០០០ដងកាលពីឆ្នាំមុន។ មន្ត្រីទីភ្នាក់ងារភូគព្ភសាស្ត្រឥណ្ឌូណេស៊ីបញ្ជាក់ថា ភ្នំភ្លើង Ibu បានបញ្ចេញសកម្មភាពផ្ទុះជាមធ្យម៥៨លើក ក្នុងមួយថ្ងៃកាលពីឆ្នាំ២០២៣៕

អត្ថបទ៖ សុខ សុវណ្ណ

ចុចអាន៖ ស្លាប់​៣៧​នាក់ ព្រោះ​គ្រោះ​ទឹក​ជំនន់ និង​​ការ​ហូរ​​ធ្លាក់​កម្អែល​ភ្នំភ្លើង​​នៅ​ឥណ្ឌូណេស៊ី