ព័ត៌មានអន្ដរជាតិ

លោក Lee Hsien Loong ប្រគល់លិខិតលាលែង ខណៈនាយករដ្ឋមន្ត្រីសិង្ហបុរីថ្មីនឹងចូលកាន់តំណែងផ្លូវការថ្ងៃទី១៥ឧសភា

បានផុស

៨ ខែ មុន

នៅ

ថ្ងៃអង្គារ ១៤ ឧសភា ២០២៤

ដោយ

Chheang

លោក Lee Hsien Loong កាលពីថ្ងៃចន្ទទី១៣ ខែឧសភា ម្សិលមិញ បានប្រគល់លិខិតលាលែងពីតំណែងជានាយករដ្ឋមន្ត្រីទៅកាន់លោកប្រធានាធិបតី Tharman Shanmugaratnam ជាផ្លូវការហើយ។ តំណែងថ្មីជានាយករដ្ឋមន្ត្រីសិង្ហបុរី នឹងត្រូវលោក Lawrence Wong ចូលមកជំនួសវិញ នៅថ្ងៃទី១៥ ខែឧសភា ស្អែកនេះ។

លោក Lee Hsien Loong និងលោក Lawrence Wong (រូបភាព៖ ANN)

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

ក្នុងរយៈពេល២០ឆ្នាំមកនេះ វាជាលើកដំបូងហើយដែលសិង្ហបុរី មានការតែងតាំងនាយករដ្ឋមន្ត្រីថ្មី បន្ទាប់ពីអាណត្តិរបស់លោក Lee Hsien Loong គិតចាប់តាំងពីខែសីហា ឆ្នាំ២០០៤កន្លងទៅ។

លោក Lawrence Wong ដែលជារដ្ឋមន្ត្រីក្រសួងហិរញ្ញវត្ថុ និងជាឧបនាយករដ្ឋមន្ត្រីផងដែរនោះ នឹងក្លាយជាមេដឹកនាំទី៤ នៅក្នុងប្រវត្តិសាស្ត្រកកើតមានសិង្ហបុរីរយៈពេល៥៩ឆ្នាំកន្លងទៅ បន្ទាប់ពីទទួលបាននូវឯករាជ្យភាព។ លោកក៏ជាសមាជិកគណបក្សសកម្មភាពប្រជាជន (PAP) ដូចជាលោក Lee Hsien Loong ដែរ។

ក្បាលម៉ាស៊ីនដឹកនាំគណៈរដ្ឋមន្ត្រីថ្មីរបស់សិង្ហបុរី នឹងត្រូវដឹកនាំដោយលោក Lawrence Wong ហើយលោកក៏នៅតែកាន់តួនាទីជារដ្ឋមន្ត្រីក្រសួងហិរញ្ញវត្ថុដដែល។ ចំណែកឯលោក Lee Hsien Loong នឹងក្លាយជាទេសរដ្ឋមន្ត្រី ទទួលបន្ទុកជាប្រធានក្រុមប្រឹក្សាស្រាវជ្រាវ អភិវឌ្ឍន៍ និងសហគ្រាស។ ដោយឡែកតំណែងជាឧបនាយករដ្ឋមន្ត្រី មានចំនួន២នាក់គឺលោក Gan Kim Yong និងលោក Heng Swee Keat៕