ព័ត៌មានអន្ដរជាតិ

ស្លាប់២ របួស៣ ក្នុងករណីប្លន់រំដោះស្ដេចគ្រឿងញៀននៅបារាំង

បានផុស

៩ ខែ មុន

នៅ

ថ្ងៃពុធ ១៥ ឧសភា ២០២៤

ដោយ

Chheang

ខ្មាន់កំាភ្លើង៤នាក់ បានវាយប្រហារក្បួនរថយន្តប៉ូលិសកំពុងដឹកអ្នកទោស ស្ថិតនៅភាគខាងជើងប្រទេសបារាំង កាលពីថ្ងៃទី១៤ ខែឧសភា ម្សិលមិញ ដែលបណ្ដាលឲ្យឆ្មាំយាមគុក២នាក់បានបាត់បង់ជីវិត និង៣នាក់ទៀតរងរបួស។ ក្នុងហេតុការណ៍នេះ មានអ្នកទោសម្នាក់រហស្សនាម “The Fly” បានរត់គេចខ្លួនបាត់។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

អ្នកទោសដែលរត់គេចបានសម្រេច មានឈ្មោះថា Mohamed Amra អាយុ៣០ឆ្នាំ ជាមេក្លោងគ្រឿងញៀនដ៏ល្បីមួយរូបនៅបារាំង។ មុនកើតហតុ អ្នកទោសរូបនេះកំពុងត្រូវប៉ូលិសដឹកតាមក្បួនរថយន្តត្រឡប់ទៅពន្ធនាគារនៅតំបន់ Evreux បន្ទាប់ពីបានចូលរួមក្នុងសវនាការតុលាការរួច។

ខ្មាន់កាំភ្លើង បានបើករថយន្ត Peugeot 5008 តាមពីក្រោយ ហើយបើកបំបុករថយន្តប៉ូលិស ដែលកំពុងដឹក Amra នៅលើផ្លូវហាយវ៉េ រួចក៏បានប្រើកាំភ្លើងស្វ័យប្រវត្ត បាញ់បោះជាមួយប៉ូលិសអស់រយៈពេលប្រហែល ២នាទី។ ខ្មាន់កំាភ្លើង និង Amra បានរត់គេចខ្លួនបានសម្រេចពីកន្លែងកើតហេតុ ដោយចូលជិះក្នុងរថយន្ត១គ្រឿងទៀតម៉ាក Audi។ រថយន្តដែលជនល្មើសបានប្រើប្រាស់ ត្រូវបានដុតកម្ទេចចោល នៅចម្ងាយមិនប៉ុន្មានគីឡូម៉ែត្រនោះទេពីកន្លែងកើតហេតុ។

ឆ្មាំយាមគុក២រូប ត្រូវបានសម្លាប់ ដែលនេះគឺជាករណីដំបូងគេបង្អស់ក្នុងរយៈពេលជាង ៣ទសវត្សកន្លងមកសម្រាប់ហេតុការណ៍ប្លន់អ្នកទោសនៅបារាំង។

លោក Emmanuel Macron ប្រធានាធិបតីបារាំង បានបង្ហោះនៅលើបណ្ដាញសង្គម X ថា “ការវាយប្រហារព្រឹកនេះ ដែលឆក់យកជីវិតអ្នកយាមពន្ធនាគារ គឺជារឿងគួរឲ្យភ្ញាក់ផ្អើលសម្រាប់យើងរាល់គ្នា”។ បន្ថែមពីនេះ លោកបានចេញបញ្ជាឲ្យមានការតាមចាប់ខ្លួន Amra និងបក្សពួកត្រឡប់មកវិញឲ្យបាន៕