សមត្ថកិច្ច កម្ពុជា ចាប់ខ្លួនជនសង្ស័យទី ៣ ក្នុងករណីសម្លាប់ជនជាតិ កូរ៉េខាងត្បូង ញាត់ចូលធុងជ័រនៅ ថៃ

សមត្ថកិច្ច​កម្ពុជា​បាន​ចាប់​ខ្លួន​ជន​សង្ស័យ​ទី ៣ ​ក្នុង​ករណីឃាតកម្ម​លើ​បុរសជនជាតិ​កូរ៉េ​ខាង​ត្បូង​ម្នាក់​នៅក្នុងទឹកដីនៃ​ប្រទេស​ថៃ បន្ទាប់ពី​សាកសព​ត្រូវ​បាន​គេ​ប្រទះ​ឃើញ​ញាត់ដាក់ក្នុង​ធុង​ជ័រ​បោះ​ចូល​ក្នុង​អាង​ស្តុក​ទឹក Map Prachan នៃ​ស្រុក Bang Lamung ខេត្ត Chon Buri ។ នេះបើយោងតាមការចេញផ្សាយដោយសារព័ត៌មាន Thai PBS កាលពីថ្ងៃទី១៤ ខែឧសភាកន្លងទៅ ។

លោកឧត្តមសេនីយ៍ឯក Noppasilp Poonsawat ស្នងការរងក្រុងបានលើកឡើងថា លោកទទួលដំណឹង សមត្ថកិច្ចកម្ពុជាបានចាប់ខ្លួនជនសង្ស័យជនជាតិកូរ៉េខាងត្បូងម្នាក់ឈ្មោះ Lee Youngjin នៅឯផ្ទះសំណាក់មួយកន្លែងក្នុងរាជធានីភ្នំពេញកាលពីថ្ងៃចន្ទ ហើយឥឡូវនេះកំពុងរៀបចំធ្វើបត្យាប័នជនសង្ស័យរូបនេះដើម្បីធ្វើតាមនីតិវិធី និងដាក់ទោសទណ្ឌតាមច្បាប់នៅប្រទេសកូរ៉េខាងត្បូង ។

បើតាមការស៊ើបអង្កេតរបស់ប៉ូលិសថៃបានឲ្យដឹងថា ការកំណត់អត្តសញ្ញាណសាកសពនៅក្នុងធុងជ័រពីសំណាក់បងស្រីរបស់ជនរងគ្រោះ ក៏ដូចជាការប្រៀបធៀប DNA បានបញ្ជាក់ថា អ្នកស្លាប់នោះគឺមានឈ្មោះ Roh Eui Jong អាយុ ៣៤ ឆ្នាំ ហើយបានបាត់ខ្លួនតាំងតែពីថ្ងៃទី៣ ខែឧសភាមកម្ល៉េះ ។

ទន្ទឹមនោះ កម្លាំងជំនាញកំពុងរង់ចាំរបាយការណ៍ផ្លូវការពីវិទ្យាស្ថានកោសល្យវិច្ច័យ មុននឹងបញ្ចប់សំណុំរឿង និងស្វែងរកដីកាចាប់ខ្លួនជនសង្ស័យទាំង ៣ នាក់ ដោយចោទប្រកាន់ពីបទឃាតកម្មគិតទុកជាមុន ការឃុំខ្លួនដោយខុសច្បាប់ និងការលាក់សាកសពដើម្បីបិទបាំងឧក្រិដ្ឋកម្ម ។

ចំណែកមូលហេតុពិតប្រាកដនៃករណីឃាតកម្មនេះមិនទាន់បើកបង្ហាញនៅឡើយទេ ប៉ុន្តែបើយោងតាមព័ស្តុតាងដែលប៉ូលិសថៃរកឃើញនោះបានឲ្យដឹងថា ម្រាម​ដៃ​របស់​ជន​រង​គ្រោះ​ឈ្មោះ Roh Eui Jong ត្រូវ​បាន​គេ​កាត់​ ខណៈ​ប៉ូលិសដាក់ការ​សង្ស័យ​ថា ​ជាទង្វើ​រារាំងជនរងគ្រោះមិនឲ្យផ្ដិតស្នាមម្រាមដៃក្នុង​ការ​ធ្វើ​អត្ត​សញ្ញាណ​ប័ណ្ណ ។

គួរបញ្ជាក់ថា ជនរងគ្រោះឈ្មោះ Roh Eui Jong បានបាត់ខ្លួនកាលពីដើមខែឧសភា បន្ទាប់ពីម្តាយរបស់គាត់នៅក្នុងប្រទេសកូរ៉េខាងត្បូងបានទទួលការហៅទូរស័ព្ទទាមទារប្រាក់លោះចំនួន ៣ លានបាត (ជាង ៨២,០០០ ដុល្លារអាមេរិក) សម្រាប់ការដោះលែងគាត់ ខណៈអ្នក​ហៅទូរស័ព្ទទៅបាន​ប្រាប់​ថា លុយ​នោះ​គឺ​សម្រាប់​ជួញ​ដូរ​ថ្នាំ​ញៀន​ខុស​ច្បាប់ ៕

ដោយ ៖ សុខ ជីវ័ន្ត

ចុចអាន ៖ កងកម្លាំងមិនស្គាល់មុខ មីយ៉ាន់ម៉ា ផ្ទុះការប្រយុទ្ធគ្នា និងបោកគ្រាប់បែកជិត ព្រំដែន ថៃ