ព័ត៌មានអន្ដរជាតិ

យន្តហោះ ចិន ៤៥ គ្រឿងប្រទះឃើញហោះឆ្វែលជុំវិញកោះតៃវ៉ាន់

បានផុស

៨ ខែ មុន

នៅ

ថ្ងៃពុធ ១៥ ឧសភា ២០២៤

ដោយ

តៃវ៉ាន់បានប្រទះឃើញយន្តហោះយោធាចិនចំនួន ៤៥ គ្រឿងនៅជុំវិញដែនកោះរបស់ខ្លួន ហើយជាចំនួនយន្តហោះដ៏ច្រើនបំផុតដែលហោះកៀកៗតៃវ៉ាន់ក្នុងរយៈពេលតិចជាង ១ សប្តាហ៍ មុនការស្បថចូលកាន់តំណែងប្រធានាធិបតីថ្មីរបស់កោះនេះ ។ នេះបើយោងតាមការចេញផ្សាយរបស់សារព័ត៌មាន CNA នៅថ្ងៃទី១៥ ខែឧសភា ។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

ក្រសួងការពារជាតិរបស់ក្រុងតៃប៉ិបានប្រទះឃើញយន្តហោះចិនចំនួន ៤៥ គ្រឿង និងនាវាកងទ័ពជើងទឹកចំនួន ៦ គ្រឿងកំពុងប្រតិបត្តិការជុំវិញកោះតៃវ៉ាន់ក្នុងរយៈពេល ២៤ ម៉ោងចុងក្រោយនេះ ហើយក្នុងនោះមានយន្តហោះចំនួន ១៦ គ្រឿងបានហោះឆ្លងកាត់ខ្សែបន្ទាត់មធ្យមនៃច្រកសមុទ្រតៃវ៉ាន់ ។

បច្ចុប្បន្ន ចិននៅតែទាមទារយកកោះតៃវ៉ាន់ និងមិនបោះបង់ការប្រើកម្លាំងយោធាដើម្បីយកតៃវ៉ាន់មកក្រោមការគ្រប់គ្រងរបស់ក្រុងប៉េកាំងឡើយ ខណៈក្នុងប៉ុន្មានឆ្នាំថ្មីៗនេះចិនបានបង្កើនសម្ពាធយោធាលើកោះតៃវ៉ាន់ ដោយរក្សាវត្តមានយន្តហោះចម្បាំង យន្តហោះគ្មានមនុស្សបើក និងនាវាកងទ័ពជើងទឹកនៅជុំវិញកោះនេះស្ទើរតែរាល់ថ្ងៃ ។

ទន្ទឹមនោះ ចិនក៏បានព្រមានដែរថា លោក Lai Ching-te អនាគតប្រធានាធិបតីដែលនឹងស្បថចូលកាន់តំណែងនៅថ្ងៃទី២០ ខែឧសភាខាងមុខអាចនឹងនាំភ្លើងសង្គ្រាមដល់កោះនេះ ខណៈដែលភាពតានតឹងបានកើនឡើងពីមួយថ្ងៃទៅមួយថ្ងៃ ចាប់តាំងពីលោកបានឈ្នះការបោះឆ្នោតខែមករា ។

គួរបញ្ជាក់ថា ក្រៅពីការដាក់ពង្រាយបង្ហាញកម្លាំងយោធា ចិនក៏បានបញ្ជូននាវាឆ្មាំឆ្នេរ និងនាវាផ្សេងទៀតនៅជុំវិញកោះ Kinmen ដែលនៅក្បែរកោះតៃវ៉ាន់តាំងពីខែកុម្ភៈមកម្ល៉េះ ហើយកាលពីថ្ងៃអង្គារសប្ដាហ៍មុន ចិនក៏បានបញ្ជូននាវាឆ្មាំឆ្នេរសមុទ្រចំនួន ៥ គ្រឿងបានធ្វើដំណើរឆ្លងកាត់ដែនទឹកហាមឃាត់របស់កោះ Kinmen រយៈពេល ៣ ម៉ោងទើបចាកចេញទៅវិញ ៕