នាយករដ្ឋមន្ត្រីស្លូវ៉ាគី កំពុងស៊ូទ្រាំជាមួយសេចក្តីស្លាប់ ក្នុងបន្ទប់សង្គ្រោះបន្ទាន់ ក្រោយការប៉ុនប៉ងធ្វើឃាត

ពិភពលោកមានក្តីរន្ធត់តក់ស្លុតយ៉ាងខ្លាំង ចំពោះការប៉ុនប៉ងធ្វើឃាតនាយករដ្ឋមន្ត្រីស្លូវ៉ាគី Robert Fico ដែលត្រូវបានខ្មាន់កាំភ្លើងបាញ់ចំច្រើនគ្រាប់ បណ្តាលឲ្យរងរបួសធ្ងន់ ពេលជួបជាមួយអ្នកគាំទ្រនៅក្នុងព្រឹត្តិការណ៍មួយខាងក្រៅមជ្ឈមណ្ឌលវប្បធម៌ក្នុងទីក្រុង Handlova កាលពីរាត្រីថ្ងៃពុធទី១៥ខែឧសភា (ពេលវេលានៅកម្ពុជា)។ 

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

តាមការដកស្រង់សម្តីដោយ CNN, រដ្ឋមន្ត្រីក្រសួងការពារជាតិ Robert Kalina បានប្រាប់អ្នកយកព័ត៌មាននៅឯមន្ទីរពេទ្យថា លោក Fico កំពុងស៊ូទ្រាំជាមួយសេចក្តីស្លាប់រាប់ម៉ោងមកហើយ ព្រោះថា គ្រាប់កាំភ្លើងត្រូវចំ.ពោះរបស់គាត់។ ការវះកាត់មិនទាន់បញ្ចប់ទេ ហើយស្ថានភាពរបស់គាត់គឺ ធ្ងន់ធ្ងរហួសថ្លែង។

ស្របពេលជាមួយគ្នានោះដែរ រដ្ឋមន្ត្រីក្រសួងមហាផ្ទៃលោក Matus Sutaj Estok បានឲ្យដឹងថា សមត្ថកិច្ចចាប់បានជនសង្ស័យម្នាក់ ហើយការស៊ើបអង្កេតបឋមរកឃើញថា មានហេតុផលនយោបាយយ៉ាងច្បាស់នៅពីក្រោយការប៉ុនប៉ងធ្វើឃាតនេះ។

ពាក់ព័ន្ធប្រតិកម្មពិភពលោកចំពោះការប៉ុនប៉ងធ្វើឃាតនេះ ប្រធានាធិបតីអាមេរិកលោក Joe Biden និយាយថា លោកពិតជាភ្ញាក់ផ្អើលខ្លាំងណាស់ ហើយសូមថ្កោលទោស​អំពើ​ហិង្សា​ដ៏​គួរ​ឲ្យ​រន្ធត់​នេះផងដែរ។

ដោយឡែក អគ្គលេខាធិការអង្គការណាតូ លោក Jens Stoltenberg បានបង្ហោះនៅលើប្រព័ន្ធផ្សព្វផ្សាយសង្គម X ថា លោកតក់ស្លុតនិងរន្ធត់ចិត្តជាពន់ពេក ចំពោះការប៉ុនប៉ងយកជីវិតលោក Fico ខណៈប្រធានគណៈកម្មការអឺរ៉ុបលោកស្រី Ursula von der Leyen ហៅរឿងនេះថាជា “ការវាយប្រហារដ៏អាក្រក់បំផុត”។

សូមបញ្ជាក់ថា លោក Fico បានឡើងកាន់អំណាចកាលពីឆ្នាំមុន ជាមួយសារប្រឆាំងអាមេរិកនិងគាំទ្ររុស្ស៊ី ជាហេតុបង្កក្តីព្រួយបារម្ភខ្លាំងមែនទែនក្នុងចំណោមសមាជិក EU ថា គាត់នឹងដឹកនាំប្រទេសចាកចេញពីទំនាក់ទំនងលោកខាងលិច។

លើសពីនេះ រដ្ឋាភិបាលរបស់គាត់ បានបញ្ឈប់ការចែកចាយអាវុធទៅឲ្យអ៊ុយក្រែន ហើយអ្នករិះគន់មានកង្វល់ថា គាត់នឹងដឹកនាំប្រទេសស្លូវ៉ាគីចាកចេញពីផ្លូវដែលចង្អុលបង្ហាញដោយលោកខាងលិច ហើយដើរតាមគន្លងប្រទេសហុងគ្រី ក្រោមការដឹកនាំរបស់នាយករដ្ឋមន្ត្រីប្រជាជននិយម Viktor Orban៕

អត្ថបទ៖ សុខ សុវណ្ណ

ចុចអាន៖ ប្រទេសមួយនៅ អឺរ៉ុប រងការគំរាមវាយប្រហារបំផ្ទុះគ្រាប់បែក