ព័ត៌មានអន្ដរជាតិ

តើលោក ពូទីន ធ្លាប់អញ្ជើញទៅ ចិន ប៉ុន្មានលើកហើយ ពេលណាដែលពិភពលោកចងចាំមិនភ្លេច?

បានផុស

១ ខែ មុន

នៅ

ថ្ងៃព្រហស្បតិ៍ ១៦ ឧសភា ២០២៤

ដោយ

លោកប្រធានាធិបតីរុស្ស៊ី វ្ល៉ាឌីមៀរ ពូទីន បានអញ្ជើញទៅដល់ទីក្រុងប៉េកាំងហើយដើម្បីបំពេញទស្សនកិច្ចផ្លូវរដ្ឋនៅប្រទេសចិនរយៈពេល ២ ថ្ងៃ ចាប់ពីថ្ងៃទី១៦ ដល់ថ្ងៃទី១៧ ខែឧសភា ហើយនេះក៏ជាដំណើរហោះហើរចេញក្រៅប្រទេសលើកដំបូងរបស់បុរសខ្លាឃ្មុំទឹកកកវ័យ ៧២ ឆ្នាំរូបនេះផងដែរ ចាប់តាំងពីស្បថចូលកាន់តំណែងក្នុងអាណត្តិថ្មីបន្តកាច់ចង្កូតនាវារុស្ស៊ីរយៈពេល ៦ ឆ្នាំទៀត ។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

ទន្ទឹមនោះ ដំណើរទស្សនកិច្ចរបស់លោក ពូទីន មកកាន់ប្រទេសចិននាពេលនេះក៏ជាលើកទី ២ ផងដែរក្នុងរយៈពេលត្រឹមតែជាង ៦ ខែប៉ុណ្ណោះ ពោលបន្ទាប់ពីបស្ចិមប្រទេសបញ្ចេញកណ្ដាប់ដៃដែកដាក់ទណ្ឌកម្មមកលើទីក្រុងមូស្គូចំពោះភ្លើងសង្គ្រាមលុកលុយនៅអ៊ុយក្រែនដែលអូសបន្លាយពេលជាង ២ ឆ្នាំមកនេះ ។

ទោះយ៉ាងណា នេះមិនមែនជាលើកទី ២ ឬលើកទី ៣ នោះទេសម្រាប់លោក ពូទីន ដែលហោះមកកាន់ទឹកដីនៃប្រទេសចិននោះ ។ យោងតាមការចេញផ្សាយដោយសារព័ត៌មាន South China Morning Post (SCMP) បានឲ្យដឹងថា លោក ពូទីន បានអញ្ជើញហោះមកទីក្រុងប៉េកាំងចំនួន ១៩ ដងហើយគិតទាំងពេលនេះ ខណៈលើកដំបូងកើតមានឡើងកាលពីខែកក្កដា ឆ្នាំ ២០០០ ហើយក៏ជាពេលដែលបុរសខ្លាឃ្មុំទឹកកករូបនេះឡើងកាន់ការជាប្រធានាធិបតីរុស្ស៊ីលើកដំបូងផងដែរ ។

***លោក ពូទីន (ឆ្វេង) និងលោក Zemin (ស្ដាំ)***

បើតាមការចុះផ្សាយដោយកាសែតអាមេរិក New York Times បានឲ្យដឹងថា ក្នុងអំឡុងពេលនោះ លោក ពូទីន បានជួបពិភាក្សាការងារជាមួយលោកប្រធានាធិបតីចិន Jiang Zemin ជាមេដឹកនាំមួយរូបដែលហ៊ានថ្កោលទោសចំពោះសំណើរបស់អាមេរិកពាក់ព័ន្ធនឹងការដាក់ពង្រាយប្រព័ន្ធខែលការពារដែនអាកាសនៅអាមេរិកខាងជើង និងនៅតំបន់អាស៊ី ។

ប៉ុន្តែក្នុងចំណោមដំណើរទស្សនកិច្ចរបស់លោក ពូទីន មកកាន់ប្រទេសចិនទាំងប៉ុន្មានជើងនោះគឺមាន ១ លើកដែលទាញឲ្យពិភពលោកចងចាំមិនភ្លេចគឺកាលពីឆ្នាំ ២០២២ ។ ទីភ្នាក់ងាព័ត៌មាន Reuters បានរាយការណ៍ថា ក្រោពីបំពេញដំណើរទស្សនកិច្ចនៅទីក្រុងប៉េកាំងរួចហើយ ជាពិសេសក្រោយពេល ចិន-រុស្ស៊ី ប្រកាសពីភាពជាដៃគូគ្មានដែនកំណត់មិនទាន់បានប៉ុន្មានស្រួលបួលផង ស្រាប់តែលោក ពូទីន លើកកម្លាំងទ័ពរាប់ម៉ឺននាក់ចូលទៅវាយលុកប្រទេសអ៊ុយក្រែនតែម្តង ។

ងាកមកកាន់ការបំពេញទស្សនកិច្ចនាពេលនេះវិញ ក្រៅពីការបង្ហាញសាមគ្គីភាព និងរឹតចំណងទំនាក់ទំនងរវាងមហាមិត្តទាំងពីរ, ដំណើរទស្សនកិច្ចរបស់លោក ពូទីន មកកាន់ចិនលើកទី ១៩ ក៏នឹងពិភាក្សាលើបញ្ហាក្តៅជាសកលចំនួន ២ ផងដែរ ហើយនោះគឺរឿងរ៉ាវសេដ្ឋកិច្ច និងសង្គ្រាម ជាពិសេសភ្នក់ភ្លើងសង្គ្រាមអ៊ុយក្រែនតែម្តង ។

ស្របពេលជាមួយគ្នានេះ សារព័ត៌មាន Sputnik ក៏បានរាយការណ៍ដែរថា បន្ទាប់ពីជំនួបជាមួយលោកប្រធានាធិបតីចិន ស៊ី ជីនពីង ហើយ, លោក ពូទីន ក៏នឹងអញ្ជើញជួបជាមួយនាយករដ្ឋមន្ត្រីចិនលោក លី ឈាង ផងដែរដើម្បីពិភាក្សាអំពីកិច្ចសហប្រតិបត្តិការសេដ្ឋកិច្ច ហើយចិន និងរុស្ស៊ី អាចនឹងចុះហត្ថលេខាលើសេចក្តីថ្លែងការណ៍រួមមួយរបស់ប្រមុខដឹកនាំទាំងពីរ និងលើឯកសារទ្វេភាគីមួយចំនួនទៀត ។ មិនត្រឹមប៉ុណ្ណឹង មេដឹកនាំទាំងពីរនឹងកំណត់ទិសដៅសម្រាប់ការអភិវឌ្ឍបន្ថែមទៀតនៃកិច្ចសហប្រតិបត្តិការ និងកិច្ចពិភាក្សាអំពីបញ្ហាសំខាន់ៗបំផុត ។

ដោយឡែក បើតាមការបញ្ជាក់ពីអ្នកនាំពាក្យក្រសួងការបរទេសចិន លោក Wang Wenbin វិញបានឲ្យដឹងថា ក្នុងដំណើរទស្សនកិច្ចនេះ លោក ស៊ី និងលោក ពូទីន នឹងផ្លាស់ប្តូរទស្សនៈគ្នាស្តីពីទំនាក់ទំនងទ្វេភាគី និងកិច្ចសហប្រតិបត្តិការលើវិស័យផ្សេងៗ ក៏ដូចជាលើបញ្ហាអន្តរជាតិ និងតំបន់ដែលជាផលប្រយោជន៍រួម ក្នុងបរិបទនៃខួបលើកទី ៧៥ នៃការបង្កើតទំនាក់ទំនងការទូតរវាងចិន និងរុស្ស៊ីផងដែរ ។

គួរបញ្ជាក់ថា លោក ស៊ី ជីនពីង ក៏ធ្លាប់បានហោះទៅកាន់ប្រទេសរុស្ស៊ីផងដែរ ក្នុងដំណើរទស្សនកិច្ចក្រៅប្រទេសលើកដំបូង បន្ទាប់ពីជំងឺរាតត្បាតកូវីដ ១៩ កាលពីខែមីនាឆ្នាំមុន ពោលភ្លាមៗបន្ទាប់ពីចាប់ផ្តើមអាណត្តិទី ៣ ជាប្រធានាធិបតីចិន ហើយបើនិយាយពីការជួបគ្នា មេដឹកនាំទាំងពីរបានជួបចរចាជាង ៤០ ដងមកហើយ ខណៈដែលជំនួបចាប់ដៃលើកចុងក្រោយគឺធ្វើឡើងនៅក្នុងខែតុលា ឆ្នាំ២០២៣ នៅពេលដែលលោក ពូទីន អញ្ជើញចូលរួមកិច្ចប្រជុំកំពូលខ្សែក្រវាត់ និងផ្លូវរបស់ប្រទេសចិននៅទីក្រុងប៉េកាំង ៕