Microsoft ស្នើឲ្យបុគ្គលិកនៅ ចិន ផ្ទេរការងារចេញទៅប្រទេសផ្សេង

ក្រុមហ៊ុន Microsoft កំពុងស្នើសុំបុគ្គលិកមួយចំនួនដែលកំពុងធ្វើការនៅក្នុងប្រទេសចិនពិចារណាលើការផ្ទេរការងារចេញទៅប្រទេសប្រទេសផ្សេង ដោយសារតែទំនាក់ទំនងរវាងសហរដ្ឋអាមេរិក និងចិនកាន់តែល្អកកករលើបច្ចេកវិទ្យាដូចជា បញ្ញាសិប្បនិមិត្ត (AI) និងឧបករណ៍អេឡិចត្រូនិកជាដើម ។ នេះបើយោងតាមការចេញផ្សាយរបស់ទីភ្នាក់ព័ត៌មាន Reuters នៅថ្ងៃទី១៦ ខែឧសភា ។

យោងតាមកាសែត Wall Street Journal បានរាយការណ៍ថា Microsoft កំពុងសាកសួរបុក្គលិកប្រហែល ៧០០ ទៅ ៨០០ នាក់ដែលធ្វើការទាក់ទងនឹងផ្នែកម៉ាស៊ីន និងការងារផ្សេងទៀតដែលទាក់ទងនឹងកុំព្យូទ័រ ដើម្បីពិចារណាផ្លាស់ប្តូរទីតាំងការងារ ហើយក្រុមហ៊ុនក៏ជួយក្នុងការផ្ទេរនេះផងដែរ ។

ឆ្លើយតបនឹងបញ្ហានេះ បុគ្គលិកដែលភាគច្រើនជាវិស្វករសញ្ជាតិចិនកាលពីដើមសប្តាហ៍នេះបានផ្តល់ជម្រើសក្នុងការផ្ទេរទៅសហរដ្ឋអាមេរិក អៀរឡង់ អូស្ត្រាលី និងនូវែលសេឡង់ ខណៈអ្នកនាំពាក្យក្រុមហ៊ុន Microsoft បានលើកឡើងថា ក្រុមហ៊ុននៅតែប្តេជ្ញាចិត្តចំពោះប្រទេសចិន ហើយនឹងបន្តប្រតិបត្តិការនៅទីនោះ និងទីផ្សារផ្សេងៗទៀត ។

គួរបញ្ជាក់ថា ដំណឹងនេះកើតឡើង ចំពេលដែលទំនាក់ទំនងចិន-អាមេរិកកំពុងស្ថិតក្នុងភាពល្អកកករ ខណៈដែលរដ្ឋបាលរបស់ប្រធានាធិបតី Joe Biden បានដំឡើងពន្ធលើទំនិញនាំចូលជាច្រើនរបស់ចិន រួមទាំងអាគុយរថយន្តអគ្គិសនី (EV) បន្ទះឈីប និងផលិតផលវេជ្ជសាស្រ្តជាដើម ៕

អត្ថបទ៖ ប៊ុន សុភាព