តើខ្មាន់កាំភ្លើង ប៉ងធ្វើឃាតនាយករដ្ឋមន្ត្រីស្លូវ៉ាគី ត្រូវមានទោសធ្ងន់កម្រិតណា?

តាមសេចក្តីរាយការណ៍របស់ BBC នៅថ្ងៃសុក្រទី១៧ខែឧសភា ពេលនេះខ្មាន់កាំភ្លើងបាញ់នាយករដ្ឋមន្ត្រីស្លូវ៉ាគី Robert Fico ត្រូវបានចោទប្រកាន់ពីបទប៉ុនប៉ងធ្វើឃាតដោយគិតទុកជាមុន ហើយរូបគេ អាចមានទោសជាប់ពន្ធនាគារអស់មួយជីវិត។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

ខ្មាន់កាំភ្លើងឈ្មោះ Juraj Cintula អាយុ៧១ឆ្នាំបានចូលកៀកលោក Fico បាញ់៥គ្រាប់ចំពោះ ហើយក្នុងនោះមានមួយគ្រាប់ធ្លាយដល់ក្រពះខណៈលោកចូលរួមក្នុងពិធីជួបជុំមួយនៅទីក្រុង Handlova ហើយមកទល់ពេលនេះ លោកនៅតែស្ថិតក្នុងបន្ទប់សង្គ្រោះបន្ទាន់ ប៉ុន្តែបានរួចផុតពីសេចក្តីស្លាប់ហើយ។

តាមការបញ្ជាក់ពី រដ្ឋមន្ត្រីមហាផ្ទៃស្លូវ៉ាគី Matus Sutaj Estok បានឲ្យដឹងថា ការវាយប្រហារនេះគឺជាប់ទាក់ទិននឹងបញ្ហានយោបាយសុទ្ធសាធ ហើយខ្មាន់កាំភ្លើងធ្វើសកម្មភាពតែម្នាក់ឯងប៉ុណ្ណោះ។

ស្របពេលជាមួយគ្នានោះដែរ តាមការចុះផ្សាយរបស់ RT, ខ្មាន់កាំភ្លើង ត្រូវបានគេស៊ើបដឹងថា ជាបុគ្គលម្នាក់ ដែលចេញមុខជំទាស់ខ្លាំងៗចំពោះសេចក្តីសម្រេចរបស់រដ្ឋាភិបាលទីក្រុង​ ប្រាទីស្លាវ៉ា ក្នុងការផ្អាកបញ្ជូនជំនួយសព្វាវុធឲ្យអ៊ុយក្រែ​ន ធ្វើសង្គ្រាមជាមួយរុស្ស៊ី។

យោងតាមរដ្ឋមន្ត្រីមហាផ្ទៃ, ជនសង្ស័យតែងតាមដានយ៉ាងដិតដល់នូវព្រឹត្តិការណ៍ក្នុងស្រុក និងអន្តរជាតិ ហើយតែងតវ៉ាប្រឆាំងគោលនយោបាយរដ្ឋាភិបាលមួយចំនួន រួមទាំងការបិទការិយាល័យរដ្ឋអាជ្ញាពិសេស និងការផ្អាកជំនួយយោធាដល់អ៊ុយក្រែនផងដែរ។

ចំពោះលោក Fico, លោកគឺជាអ្នករិះគន់គោលជំហរលោកខាងលិចលើបញ្ហាជម្លោះអ៊ុយក្រែន ហើយក្នុងយុទ្ធនាការឃោសនាបោះឆ្នោត លោកបានដាក់ចេញនូវគោលនយោបាយ កាត់បន្ថយការផ្តល់អាវុធដល់ទីក្រុងកៀវ រហូតដល់នាំឲ្យលោកឈ្នះឆ្នោតឡើងកាន់តំណែងនាយករដ្ឋមន្ត្រីកាលពីឆ្នាំមុន។

ដោយសារតែកត្តាខាងលើទាំងប៉ុន្មាននេះហើយ ទើបគេសន្មត់ថា ជំរុញឲ្យខ្មាន់កាំភ្លើង សម្រេចចិត្តបើកការវាយប្រហារលើលោក Fico តែម្តង៕

អត្ថបទ៖ សុខ សុវណ្ណ

ចុចអាន៖ ស្លូវ៉ាគី បញ្ជាក់ថា លោក Fico រួចផុតពីសេចក្តីស្លាប់ហើយ