អង់គ្លេស និយាយថា មិនចង់ធ្វើសង្គ្រាមដោយផ្ទាល់ជាមួយ រុស្ស៊ី

ថ្លែងទៅកាន់ BBC កាលពីថ្ងៃអាទិត្យទី១៩ខែឧសភា រដ្ឋមន្ត្រីការពារជាតិអង់គ្លេស លោក Grant Shapps បានគូសបញ្ជាក់ថា ប្រទេសលោកខាងលិច មិនចង់បានការប្រឈមមុខដាក់គ្នាខាងយោធាដោយផ្ទាល់ជាមួយរុស្ស៊ី ជុំវិញបញ្ហាជម្លោះអ៊ុយក្រែនទេ រីឯអាល្លឺម៉ង់​ ក៏មិនចង់ផ្តល់មីស៊ីលរយៈចម្ងាយឆ្ងាយដល់ទីក្រុងកៀវដែរ ដោយសារខ្លាចថា មីស៊ីលទាំងនោះនឹងត្រូវបានប្រើដើម្បីវាយប្រហារគោលដៅក្នុងតំបន់គ្រីមៀ របស់រុស្ស៊ី។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

រដ្ឋមន្ត្រីរូបនេះពន្យល់ថា លោកខាងលិច មិនបាញ់ទម្លាក់មីស៊ីលរុស្ស៊ីដែលហោះចូលអ៊ុយក្រែន ព្រោះតែមិនចង់មានជម្លោះផ្ទាល់ជាមួយទីក្រុងមូស្គូ លោកខាងលិចគ្មានបំណងចម្បាំងសង្គ្រាមទេ។

ដោយឡែក ក្នុងបទសម្ភាសន៍មួយទៀតជាមួយ Sky News កាលពីថ្ងៃអាទិត្យដដែលនោះ លោករដ្ឋមន្ត្រី បានសង្កត់ធ្ងន់ថា ចក្រភពអង់គ្លេស កំពុងគិតគូរយ៉ាងដិតដល់ជាទីបំផុត អំពីវិធីដែលអ៊ុយក្រែនអាចប្រើអាវុធរបស់ខ្លួន និងការដែលប្រទេសដទៃទៀត អនុញ្ញាតឲ្យអ៊ុយក្រែនប្រើអាវុធរបស់ពួកគេ តាមអង់គ្លេស ដើម្បីវាយប្រហារតំបន់គ្រីមៀ។

រម្លឹកទៅកាលពីថ្ងៃអង្គារសប្តាហ៍មុន លោក Shapps ប្រកាសថា ចក្រភពអង់គ្លេស បើកដៃឲ្យអ៊ុយក្រែន ប្រើអាវុធរបស់ខ្លួនបាន ដើម្បីវាយប្រហារឧបទ្វីប ដែលរុស្ស៊ីកាត់យកក្នុងឆ្នាំ២០១៤ ក្រោយការធ្វើប្រជាមតិ។ យ៉ាង​ណា​មិញ ប្រទេស​ភាគ​ច្រើន​មិន​ទទួល​ស្គាល់​ទឹកដី​នេះ​ថា​ជា​រុស្ស៊ី​ឡើយ។

មិនមែនតែលោក Shapps ទេ, កាលពីដើមខែនេះ រដ្ឋមន្ត្រីការបរទេសអង់គ្លេស David Cameron ក៏បើកភ្លើងខៀវឲ្យអ៊ុយក្រែន ប្រើអាវុធផ្តល់ដោយទីក្រុងឡុងដ៍ យកទៅវាយប្រហារចូលជ្រៅក្នុងទឹកដីរុស្ស៊ីដែរ។

ពាក់ព័ន្ធបញ្ហានេះដែរ ក្រសួងការបរទេសរុស្ស៊ី បានឆ្លើយតបដោយកោះហៅឯកអគ្គរដ្ឋទូតអង់គ្លេស និងព្រមានថា ទីក្រុងមូស្គូ សូមរក្សាសិទ្ធិសងសឹកប្រឆាំង សព្វាវុធនិងគ្រឿងសឹករបស់អង់គ្លេសទាំងអស់នៅលើទឹកដីនៃអ៊ុយក្រែន និងលើសពីនេះ៕

អត្ថបទ៖ សុខ សុវណ្ណ

ចុចអាន៖ អង់គ្លេសប្រកាសដោយចំហ បើកដៃឲ្យអ៊ុយក្រែន ប្រើអាវុធខ្លួន បាញ់ប្រហារឧបទ្វីប គ្រីមៀ